GOD JEHOVA i kirapim ol Kristen long kisim pasin bilong i stap wanbel wantaim ol narapela. Em i laik bai yumi tingim dispela pasin olsem bikpela samting moa. Taim yumi stap wanbel, bel isi bai stap namel long ol lain i lotuim God. Dispela bai helpim ol lain i painim bel isi long bung wantaim kongrigesen Kristen.

Wanpela glasman long Madagaska em planti man i save long em i luksave olsem ol Witnes Bilong Jehova i gat pasin bilong i stap wanbel. Em i tok, ‘Sapos mi laik joinim wanpela lotu, bai mi joinim ol Witnes.’ I no longtaim, em i lusim wok bilong ol spirit nogut, na insait long sampela mun em i stretim marit bilong em na kirap lotuim Jehova, em God bilong bel isi.

Wankain olsem dispela man, long olgeta yia planti tausen manmeri i bung wantaim kongrigesen Kristen na kisim bel isi em ol i painim inap longpela taim. Tasol Baibel i kamapim klia olsem “pasin bilong jeles nogut tru na pasin bilong kros” inap bagarapim pasin pren insait long kongrigesen. (Jems 3:14-16) Yumi amamas tru olsem Baibel i kamapim ol gutpela stiatok long hau yumi inap abrusim ol kain pasin olsem na strongim pasin wanbel. Yumi ken skelim sampela ekspiriens bilong ol bratasista.

“Hevi i kamap namel long mi na wanpela brata em mipela i wok wantaim. Wanpela taim mipela i wok long bikmaus long narapela narapela, na 2-pela man i kam na lukim mitupela i kros.”—CHRIS.

“Oltaim mi na wanpela sista i save autim tok wantaim, tasol bihain em i stop long i go autim tok wantaim mi. Na tu, em i no moa toktok long mi. Mi no save long risen na em i mekim olsem.”—JANET.

“Mi na 2-pela narapela i toktok long fon long wankain taim. Wanpela bilong ol i tok gutbai, na mi ting olsem em i ofim fon. Olsem na mi mekim ol tok i bagarapim bel bilong dispela man, tasol mi no save olsem em i wok long harim i stap.”—MICHAEL.

“Long kongrigesen bilong mipela, tupela painia sista i gat hevi namel long ol yet. Wanpela sista i mekim ol tok i bagarapim bel bilong narapela. Pasin ol i mekim i pundaunim ol narapela.”​—GARY.

Yu inap ting em ol liklik hevi. Tasol ol kain hevi olsem inap bagarapim bel na tingting bilong ol narapela, na pundaunim ol long sait bilong bilip. Ol dispela bratasista i larim tok bilong Baibel i stiaim ol long kamap wanbel gen. Ol i bihainim wanem ol stiatok bilong Baibel long stretim ol hevi?

 “Yupela go na yupela i no ken kros namel long yupela yet.” (Stt. 45:24) Josep i mekim dispela tok long ol brata bilong em taim ol i go bek long papa bilong ol. Ol dispela tok i gutpela tru! Taim man i no bosim bel na tingting na em i bel hevi hariap, em inap kirapim ol narapela long kros. Chris i luksave olsem em i gat pasin antap na em i no redi long kisim ol tok bilong stiaim em. Em i laik senisim pasin bilong em, olsem na em i tok sori long brata em i bin kros wantaim, na Chris i wok strong long bosim bel. Dispela brata tu i senisim pasin bilong em. Long nau, tupela i amamas long mekim wok bilong Jehova.

“Sapos man i no toktok gut wantaim ol narapela, ol samting em i laik mekim i no inap kamap gut.” (Snd. 15:22, NW ) Janet i luksave olsem em i mas kisim pasin bilong laikim tok i tru. Em i “toktok gut” wantaim sista em i bin kros wantaim na ol i stretim hevi. Taim tupela i toktok, long gutpela pasin Janet i kirapim dispela sista long kamapim tingting bilong em long risen na em i bel hevi. Ating i hatwok liklik long tupela i toktok wantaim. Tasol long pasin isi ol i stretim hevi. Sista i luksave olsem em i no kliagut long samting i kamap, na em i kolim nating nem bilong Janet. Em i tok sori, na nau tupela wantaim i mekim wok bilong Jehova.

“Sapos yu bringim ofa bilong yu i go long alta pinis na yu tingim brata bilong yu em i gat tok long yu, orait lusim ofa bilong yu long ai bilong alta na go. Pastaim stretim tok wantaim brata bilong yu.” (Mat. 5:23, 24) Jisas i mekim dispela tok long Bikpela Tok Long Maunten. Michael i pilim nogut tru taim em i luksave olsem em i no tingim brata bilong em na mekim gutpela pasin. Olsem na em i tingting strong long mekim ol samting bilong kamap wanbel gen wantaim em. Em i daunim em yet, na em i go lukim brata bilong em na i tok sori long em. Wanem gutpela samting i kamap? Michael i tok, “Brata bilong mi i fogivim mi.” Tupela i kamap pren gen.

“Yupela i mas wok yet long karim hevi narapela i putim long yupela na amamas long fogivim narapela, na mekim olsem maski sapos i gat as na wanpela i gat tok long narapela.” (Kol. 3:12-14) Wanpela elda i helpim 2-pela painia sista long tingim ol dispela askim: ‘I stret long mitupela i kros na mekim ol narapela i bel hevi? I gat gutpela risen na yumi mas wok yet long fogivim narapela narapela na mekim yet wok bilong Jehova wantaim bel isi?’ Ol i amamas long tok kaunsel elda i givim na ol i bihainim. Long nau, ol i stap gutpela pren na autim gutnius wantaim.

 Taim yumi bihainim tok bilong Baibel long Kolosi 3:12-14, yumi inap stretim hevi taim wanpela i bagarapim bel bilong yumi. Planti i luksave olsem man i gat pasin daun bai fogivim narapela na i no tingim rong bilong em. Sapos hevi i stap yet, yu ting yu inap bihainim stiatok i stap long Matyu 18:15? Skultok bilong Jisas i helpim yumi long save long samting man i mas mekim taim em i mekim bikpela rong long narapela. Tasol dispela stiatok inap helpim yumi long stretim ol liklik hevi. Long pasin daun, toktok wantaim brata o sista na stretim hevi.

Baibel i gat ol narapela gutpela stiatok bilong helpim yumi. Yu inap bihainim ol dispela stiatok sapos yu kamapim “ol pasin holi spirit i kamapim em olsem, pasin laikim, amamas, bel isi, i no les kwik, pasin helpim, gutpela pasin, bilip, pasin isi, na bosim bel.” (Gal. 5:22, 23) Ol man i save putim oil long masin bambai masin i ken wok gut. Olsem tasol, ol pasin holi spirit i kamapim inap helpim yu long stretim hevi na kamap wanbel gen wantaim ol narapela.

Yumi olgeta i gat narapela narapela pasin. Maski i olsem, yumi inap i stap olsem ol gutpela pren na stap wanbel wantaim. Tasol sampela taim hevi inap kamap. Wanpela brata i mekim wok elda inap longpela taim, em i tok: “Sapos man i gat pasin bilong sem, em bai pilim hatwok long i stap wantaim wanpela husat i save toktok tumas. Yumi inap ting olsem em i liklik samting, tasol bikpela hevi inap kamap.” Olsem wanem? Yu ting ol man i gat narapela narapela pasin i no inap tru long i stap wanbel wantaim? Tingim stori bilong 2-pela aposel. Pita i gat wanem kain pasin? Ating yu inap tingim em olsem man bilong toktok na hariap long mekim samting. Olsem wanem long Jon? Em man i gat pasin laikim na em i save skelim gut toktok na pasin bilong em. I klia tru olsem pasin bilong tupela i narapela narapela,  tasol tupela i wok gut wantaim. (Apo. 8:14; Gal. 2:9) Olsem tasol, maski yumi gat narapela narapela pasin, yumi inap wok gut wantaim ol narapela.

Ating wanpela brata long kongrigesen i save mekim ol tok na pasin we i sikirapim bel bilong yu. Maski i olsem, yu mas luksave olsem Krais i dai bilong helpim dispela brata, olsem na yu mas soim pasin laikim long em. (Jon 13:34, 35; Rom 5:6-8) Sapos yu tingting long pinisim pasin pren bilong yu wantaim dispela brata o yu no laik toktok moa wantaim em, orait askim yu yet: ‘Brata bilong mi i mekim pasin we i brukim lo bilong Baibel? Em i tingting long bagarapim bel bilong mi na em i mekim dispela pasin? O mitupela i gat narapela narapela pasin?’ Na tu, tingim dispela askim: ‘Mi inap bihainim wanem ol gutpela pasin bilong em?’

I gutpela long tingim laspela askim. Sapos dispela brata i gat pasin bilong toktok na yu gat pasin bilong stap isi, skelim gut pasin bilong em long kirapim tok long taim bilong autim tok. Ating yu inap askim em long wok wantaim em long taim bilong autim tok na yu inap lainim pasin bilong em long toktok. Sapos dispela brata i gat pasin bilong mekim gut long ol narapela na yu gat pasin bilong tingim yu yet, orait luksave long amamas yu inap kisim taim yu helpim ol lapun, ol lain i gat sik, na ol lain i nidim helpim. Maski yu na dispela brata i gat narapela narapela pasin, sapos yu tingim ol gutpela pasin bilong em, orait yutupela inap pas gut na stap gutpela pren. Taim yumi mekim olsem, olgeta insait long kongrigesen inap pas gut wantaim na stap wanbel.

Yuodia na Sintike i gat narapela narapela pasin. Tasol aposel Pol i kirapim ol “long kamap wanbel na pas wantaim Bikpela.” (Fili. 4:2) Yu ting yu inap bihainim pasin bilong ol na wok strong long i stap wanbel wantaim ol narapela?

Wankain olsem gras nogut i kamap planti long plaua gaden, pasin bilong bel nogut inap kamap strong sapos yumi no wok strong long senisim dispela pasin. Taim man i bel kros inap longpela taim, dispela inap bagarapim pasin wanbel bilong kongrigesen.  Sapos yumi laikim Jehova na ol bratasista, yumi bai mekim olgeta samting yumi inap mekim bambai yumi no larim ol pasin kranki bilong yumi i bagarapim pasin wanbel namel long ol manmeri bilong God.

Taim yumi stretim ol hevi na i stap wanbel, yumi bai amamas long lukim ol gutpela samting i kamap. Tingim ekspiriens bilong wanpela sista, em i tok: “Mi pilim olsem wanpela sista i mekim pasin long mi olsem wanpela liklik pikinini. Mi no amamas long pasin em i mekim. Mi bel hevi tru, olsem na mi no moa toktok long em. Mi tingting olsem, ‘Em i no rispektim mi, olsem na mi no inap rispektim em.’”

Dispela sista i kirap long tingim ol pasin bilong em yet. Em i tok: “Mi luksave long ol pasin kranki bilong mi, na mi bel hevi tru. Olsem na mi beten long Jehova long dispela samting, na mi baim wanpela presen na raitim wanpela liklik kat bilong tok sori. Mipela i hagim narapela narapela na wanbel long lusim tingting long dispela samting. Nau mipela i stap wanbel.”

Ol manmeri i laik tru long i stap bel isi. Tasol taim man i kisim pasin antap na em i tingim namba em i holim, dispela bai kirapim em long mekim ol pasin we i no inap kamapim pasin wanbel. Ol lain i lotuim Jehova i gat pasin bilong i stap wanbel, tasol ol man i no lotuim God i no gat dispela pasin. God i stiaim Pol long mekim dispela tok: “Mi laik kirapim yupela long wokabaut long pasin i stret long dispela singaut yupela i bin kisim. Na oltaim yupela i mas mekim wantaim pasin daun, pasin isi, na pasin bilong i no les kwik, na karim hevi ol arapela i putim long yupela na mekim wantaim pasin laikim. Na wok strong long holimpas pasin wanbel bilong holi spirit na stap bel isi, em pasin i save bungim yumi wantaim.” (Efe. 4:1-3) “Pasin wanbel” i gutpela samting tru. Yumi mas wok strong long kamapim pasin wanbel na stretim ol hevi i kamap namel long yumi na ol narapela.