YUMI olgeta i bilip olsem Jehova i dairektim na lukautim ol manmeri bilong em long sait bilong bilip long dispela haptaim bilong “las de.” (2 Tim. 3:1) Yumi olgeta wan wan i gat wok long bihainim tok bilong God. Ol samting yumi mekim i wankain long samting lain Israel i mekim taim ol i stap long ples drai nating. Ol i mas mekim sampela samting taim ol i harim krai bilong trampet.

Jehova i tokim Moses long kisim silva na paitim long hama na wokim 2-pela trampet na yusim “bilong singautim ol manmeri i kam bung na bilong toksave long ol manmeri long redim ol samting bilong wokabaut i go.” (Nam. 10:2) Ol pris i mas winim ol dispela trampet long narapela narapela wei na bai ol manmeri inap save long samting ol i mas mekim. (Nam. 10:3-8) Long nau, God i givim tok long ol manmeri bilong em long narapela narapela wei. Skelim 3-pela wei bilong kisim tok na dispela i kirapim yumi long tingim krai bilong ol trampet long bipo. Long nau, ol manmeri bilong God i save kisim ol invatesen bilong i go long ol bikpela bung, ol ovasia i kisim trening, na olgeta kongrigesen i save kisim ol nupela tok long wei bilong oganaisim ol samting.

Taim Jehova i laik bai “olgeta manmeri” i mas bung long geit long hap is bilong haus sel bilong bung, ol pris i save winim 2-pela trampet wantaim. (Nam. 10:3) Olgeta traib, em ol i wokim kem raunim haus sel long 4-pela narapela narapela grup, ol i save harim krai bilong trampet. Ol lain em kem bilong ol i stap klostu long geit, ating ol inap kam bung long haus sel insait long sampela minit tasol. Ol narapela i stap longwe, so ating ol bai lusim bikpela moa haptaim na strong bilong ol long kam long haus sel. Maski ol i stap longwe o klostu, Jehova i laik bai olgeta i kam bung na kisim ol tok bilong helpim ol.

Long nau, yumi no save go bung long haus sel, tasol yumi save kisim invatesen bilong bung wantaim ol manmeri bilong God. Em ol bung olsem ol rijinel kibung na ol narapela spesel bung, we yumi save kisim ol tok bilong lukautim na stiaim yumi. Long olgeta hap, ol manmeri bilong Jehova i save kisim wankain program. Ol lain i bihainim invatesen bilong i go long ol dispela bung, ol i save amamas long bung wantaim ol narapela. Sampela bilong ol i kam long ol longwe ples. Maski i olsem, ol i wanbel olsem hatwok bilong ol i no inap lus nating.

Olsem wanem long ol manmeri i stap long ol longwe ples na ol i no inap go long ol dispela bikpela bung? Teknoloji i opim rot na ol dispela lain inap harim wankain program na pilim olsem ol tu i insait long ol dispela bung. Eksampel: Long wanpela visit bilong brata em hetkota i salim, brens long Benin i konek long Arlit, Niger, wanpela taun long Sahara Desert, na bai ol lain long hap i ken harim program. Inap 21 bratasista na ol narapela manmeri i kam bung long harim tok. Maski ol i stap longwe tru, ol i pilim olsem ol tu i stap long dispela bikpela bung we 44,131 manmeri i stap long en. Wanpela brata i  tok: “Tenkyu tru long ol brata i stretim rot na mipela inap harim program. Dispela i soim klia olsem yupela i laikim tru mipela.”

Taim pris bilong Israel i winim wanpela trampet tasol, “orait ol hetman, em ol man i bosim planti tausen Israel,” ol i mas kam long haus sel bilong bung. (Nam. 10:4) Moses bai skulim ol na trenim ol. Dispela bai helpim ol long mekim gut ol wok bilong ol long wan wan traib. Sapos yu wanpela bilong ol dispela hetman, ating yu bai mekim olgeta samting yu inap mekim bilong go long dispela bung na kisim helpim, a?

Long nau, ol elda i no stap olsem “ol hetman”; ol i lukautim ol sipsip bilong God, olsem na ol i no mekim hatpela pasin long bosim ol. (1 Pita 5:1-3) Tasol ol i save givim bel tru long lukautim gut lain sipsip bilong God. Olsem na ol i save amamas taim ol i kisim invatesen bilong kisim sampela moa trening, olsem go long Skul Bilong Wok Kingdom. Long dispela skul, ol elda i kisim save long hau ol inap mekim gut ol wok insait long kongrigesen. Dispela skul i helpim ol long kamap strong moa long bilip na ol inap helpim olgeta long kongrigesen. Maski sapos yu no bin go long wanpela bilong ol dispela skul, ating yu wok long kisim helpim long ol lain i bin go long dispela skul.

Sampela taim, ol pris i save winim trampet na krai bilong en i save senis senis. Dispela i makim olsem Jehova i laik bai olgeta i lusim ples ol i bin wokim kem long en. (Nam. 10:5, 6) Taim ol manmeri i lusim ples ol i wokim kem long en, dispela i soim olsem ol i oganaisim gut ol samting, tasol i gat bikpela hatwok bilong en. Ating sampela bilong ol i save kisim 2-pela tingting long dispela samting. Wai?

Ating sampela i pilim olsem singaut bilong muv i save kamap planti taim tumas na dispela singaut i save kamap taim ol i no redi. Baibel i tok, sapos klaut i stap antap long haus lotu sel, lain Israel bai stap long kem. Na “sampela taim klaut i save stap tasol long nait i go inap long moning.” Taim ol i muv i go long narapela hap, klaut i save stap inap “2-pela de o 1-pela mun o em i stap longpela taim liklik.” (Nam. 9:21, 22) Hamaspela taim ol i lusim wanpela hap na go long narapela hap? Buk Namba sapta 33 i tok lain Israel i bin wokim kem long klostu 40 ples olgeta.

Sampela taim, ol i painim ples i gat seid. Ating ol i amamas taim ol i painim seid long “wanpela bikpela ples nating i narakain tru.” (Lo 1:19) Olsem na taim ol i kisim toksave bilong muv, ol inap ting olsem ol bai go sindaun long ples i no gutpela tumas.

Taim ol traib i stat long lusim ples ol i wokim kem long en, dispela inap traim ol narapela olsem ol bai wet liklik o ol bai les kwik long wet. Olgeta i save harim krai bilong trampet, tasol olgeta i no inap lusim ples long seim taim. Taim ol pris i winim trampet na krai bilong en i senis senis, dispela em toksave i go long ol traib i stap long hap is, em traib bilong Juda, Isakar, na Sebulun, olsem ol i mas lusim ples ol i kem long en. (Nam. 2:3-7; 10:5, 6) Bihain long ol dispela traib i go, ol pris bai winim trampet namba 2 taim bilong toksave long 3-pela traib em ol i wokim kem long hap saut. Ol pris bai mekim olsem i go inap long olgeta manmeri i lusim ples ol i wokim kem long en.

Ating yu tingting planti taim sampela senis i kamap insait long oganaisesen. Ating yu pilim olsem planti senis tumas i kamap na yu no redi long en. O ating yu laikim ol arensmen i stap pinis na yu no amamas tumas long ol senis i bin kamap. Maski yu pilim olsem wanem, dispela inap traim pasin bilong yu long no ken les kwik, na sampela haptaim i mas lus paslain long yu lain long ol nupela senis. Maski i olsem, sapos yumi redi long bihainim ol senis i kamap, yumi bai luksave olsem God i blesim yumi.

Long taim bilong Moses, Jehova i stiaim planti milion man, meri, na ol pikinini taim ol i lusim wanpela hap na go long narapela hap long ples drai nating. Sapos Jehova i no lukautim na stiaim ol, ol inap lusim laip bilong ol. Long nau, Jehova i stiaim yumi, olsem na yumi stap gut long bilip. Bilip bilong yumi i stap strong! Olsem na yumi olgeta i mas tingting strong long bihainim tok wankain olsem lain Israel i mekim taim ol i harim ol narapela narapela krai bilong ol trampet!