1-2. Ol Witnes Bilong Jehova i save amamas tru long stori long wanem ol samting?

YUMI insait long 2-pela bikpela tok—wok bos bilong God na wok bilong mekim holi nem bilong em. Yumi stap olsem ol Witnes Bilong Jehova, olsem na yumi save amamas tru long stori long ol dispela samting. Dispela 2-pela samting, wok bos bilong God na wok bilong mekim holi nem bilong em, ol i sapotim narapela narapela.

² Yumi kisim save olsem nem bilong God i mas i stap holi. Na tu, ol man i mas save olsem wok bos bilong Jehova em i nambawan tru. Em i bikpela samting long yumi mas tingim gut dispela 2-pela bikpela tok.

3. Nem Jehova i makim tu wanem samting?

³ Nem Jehova i makim olgeta pasin bilong God na olgeta samting em i save mekim, na dispela nem i makim tu wei bilong em long mekim wok bos. So sapos yumi tok nambawan bikpela samting em wok bilong mekim holi nem bilong Jehova, orait dispela i makim tu olsem i mas i gat evidens i soim olsem wok bos bilong Jehova em i nambawan tru. Nem bilong Jehova i sapotim wei bilong em long mekim wok bos olsem Nambawan King bilong heven na graun.—Lukim blok “Ol Samting Insait Long Bikpela Tok.”

4. (a) Song 135:13 i tok wanem long nem bilong God? (b) Long dispela atikol, yumi bai kisim bekim bilong wanem ol askim?

⁴ Nem Jehova em spesel na i narakain tru. (Ritim Buk Song 135:13.) Wanem samting i mekim na nem bilong God i spesel na i narakain tru? Wanem samting i kamap na i bagarapim nem bilong God? Olsem wanem God i save mekim holi nem bilong em? Hau bai yumi inap sambai long nem bilong God? Yumi ken skelim ol dispela askim.

5. Sampela inap holim wanem tingting long nem bilong God i mas i stap holi?

⁵ “Nem bilong yu i mas i stap holi.” (Mat. 6:9) Jisas i tok taim yumi beten, yumi mas beten long nem bilong God i mas i stap holi. Wanem mining bilong dispela tok? Ol samting i mas i stap klin na bai ol inap kamap holi. Sampela inap tingting olsem, ‘Nem bilong Jehova em i holi na klin pinis!’ Yumi inap kliagut long dispela sapos yumi tingim ol samting i stap insait long wanpela nem.

6. Wai na nem em i bikpela samting?

⁶ Nem em wanpela wed yumi save raitim long pepa na kolim, tasol em i makim sampela samting moa. Baibel i tok: “I gutpela moa long man i makim na kisim gutpela nem, dispela i winim planti mani kago.” (Prov. 22:1; Ekl. 7:1) Wai na nem em i bikpela samting? Taim ol narapela i harim nem bilong wanpela man, ol i save tingim ol pasin bilong em. Hau yumi spelim nem long pepa—o wei yumi kolim dispela nem—em i no bikpela samting; bikpela samting moa em tingting ol man i gat taim ol i lukim o harim dispela nem.

7. Ol man i mekim wanem na ol i bagarapim gutnem bilong God?

⁷ Taim ol man i mekim ol tok giaman long Jehova, ol i bagarapim gutnem bilong em. Taim ol i bagarapim gutnem bilong em, ol i sutim tok na daunim nem bilong em. Festaim ol man i sutim tok long gutnem bilong God em long Gaden Iden. Skelim samting yumi inap lainim long dispela stori.

8. (a) Adam na Iv i save long wanem samting? (b) Yumi laik save long bekim bilong wanem ol askim?

⁸ Adam na Iv i save long nem bilong Jehova, na ol i save tu long ol bikpela samting em i bin mekim. Ol i save olsem em i Krieta, em i givim laip long ol, em i redim ples paradais ol inap stap long en, na em i givim poroman i gutpela olgeta. (Stt. 1:26-28; 2:18) Ol i gutpela olgeta, olsem na yu ting ol bai tingim tingim yet olgeta samting Jehova i bin mekim bilong helpim ol? Yu ting ol bai strongim pasin bilong ol long laikim na tok tenkyu long Jehova? Yumi luksave long bekim bilong ol dispela askim taim birua bilong God i traim tupela.

9. (a) Olsem Stat 2:16, 17 na 3:1-5 i kamapim, Jehova i tok wanem long fes man na meri? (b) Olsem wanem Satan i paulim tok i tru?

⁹ Ritim Stat 2:16, 17 na 3:1-5. Satan i yusim  snek long toktok long Iv na askim olsem: “Tru tru God i tokim yutupela long no ken kaikai prut bilong olgeta diwai bilong gaden, a?” Dispela askim i gat tok giaman long en, na dispela tok giaman i kirapim Iv long kisim tingting kranki long God. God i tok ol i ken kaikai prut bilong olgeta diwai, na i gat wanpela diwai tasol ol i no ken kaikaim prut bilong en. I gat planti kain kain diwai em Adam na Iv inap kaikaim prut bilong ol. (Stt. 2:9) Jehova i givim planti samting long ol. Tasol God i tambuim Adam na Iv long kaikai prut bilong wanpela diwai em yet i makim. So askim bilong Satan i paulim tok i tru. I olsem Satan i tok God i no givim planti samting long tupela. Iv inap tingting olsem, ‘God i no laik givim sampela samting long mi, a?’

10. (a) Hau na Satan i bagarapim stret nem bilong God? (b) Dispela i kamapim wanem samting?

¹⁰ Taim Satan i tromoi dispela askim, Iv i tingim yet Jehova olsem Bosman bilong em. Iv i tokim Satan long tok God i bin mekim. Em i tok tu olsem tupela i no ken tatsim dispela prut. Em i save long tok lukaut bilong God olsem tupela bai dai sapos tupela i sakim tok. Tasol Satan i tok: “Tru tumas, yutupela i no inap i dai.” (Stt. 3:2-4) Pastaim Satan i laik kirapim Iv long kisim tingting kranki, tasol nau em i tokaut stret. Em i bagarapim stret nem bilong God; em i tokim Iv olsem Jehova em God bilong tok giaman. Olsem na Satan i kamap devil, o man bilong bagarapim gutnem bilong narapela. Satan i giamanim Iv gut stret, na Iv i bilipim Satan. (1 Tim. 2:14) Iv i trastim Satan, na em i no moa trastim Jehova. Olsem na Iv i mekim rong disisen we i kamapim bikpela hevi tru. Em i mekim disisen long sakim tok bilong Jehova. Em i kaikaim prut em Jehova i tambuim em long kaikai. Bihain, em i givim dispela prut long Adam.—Stt. 3:6.

11. Adam na Iv inap mekim wanem, tasol ol i no bin mekim?

¹¹ Traim tingim tok em Iv inap mekim long Satan. Piksaim sapos em i bin mekim kain tok olsem: “Mi no save long yu; mi save long Papa bilong mi, Jehova, na mi laikim em na trastim em. Em i givim olgeta samting long mitupela Adam. I no stret liklik long yu mekim kain tok olsem long em! Yu klia!” Ating Jehova bai amamas tru long harim pikinini meri bilong em i mekim kain naispela tok olsem bilong sambai long em! (Prov. 27:11) Iv i no laikim tru Jehova na stap gut long em; Adam tu i no gat dispela pasin. Olsem na tupela i no sambai long nem bilong Jehova.

12. (a) Olsem wanem Satan i kirapim Iv long kisim ol tingting kranki? (b) Adam na Iv i no bin mekim wanem?

¹² Olsem yumi skelim pinis, Satan i kirapim Iv long kisim ol tingting kranki. Satan i kirapim Iv long holim 2-pela tingting long God, nem bilong em Jehova. Adam na Iv i no sambai long nem na gutnem bilong Jehova. Tupela i larim ol tok giaman bilong Satan i kirapim ol long mekim pasin bikhet na sakim tok bilong Papa. Satan i save mekim wankain samting  long nau. Em i birua long nem bilong Jehova na bagarapim gutnem bilong em. Taim ol man i bilipim ol tok giaman bilong Satan, em i save pulim ol long sakim stretpela wok bos bilong Jehova.

13. Olsem wanem Esekiel 36:23 i kamapim klia bikpela tok bilong Baibel?

¹³ Taim Satan i bagarapim gutnem bilong Jehova, yu ting Jehova i lukluk tasol na em i no mekim wanpela samting bilong sambai long em yet? Nogat tru! Baibel olgeta i stori long ol samting Jehova i mekim bilong stretim bek nem bilong em stat long taim Satan i bagarapim nem bilong God long Gaden Iden. (Stt. 3:15) Bikpela tok bilong Baibel em olsem: Jisas i stap King long Kingdom, na Jehova bai yusim dispela Kingdom long mekim holi nem bilong em, na stretpela pasin na bel isi bai stap gen long olgeta hap bilong graun. Baibel i kamapim ol tok we i helpim yumi long kliagut long hau Jehova i mekim holi nem bilong em.—Ritim Esekiel 36:23.

14. Hau na Jehova i mekim holi nem bilong em taim pasin bikhet i kamap long Gaden Iden?

¹⁴ Satan i mekim olgeta kain samting bilong stopim Jehova long mekim ol samting Em i tingting pinis long mekim. Tasol oltaim Satan i feil. Baibel i stori long ol samting Jehova i mekim, na dispela i soim olsem i no gat wanpela man o god i wankain olsem God Jehova. Em tru olsem Jehova i bel hevi long pasin bikhet bilong Satan na ol man i stap long sait bilong Satan. (Sng. 78:40) Tasol God i bihainim savetingting, na em i no les kwik, na em i mekim stretpela pasin. Na tu, em i mekim planti samting we i soim klia bikpela strong bilong em. Pasin laikim bilong em i stap ples klia long olgeta samting em i mekim. (1 Jon 4:8) Oltaim Jehova i mekim olgeta kain samting long mekim holi nem bilong em.

15. (a) Long nau, olsem wanem Satan i wok yet long bagarapim nem bilong God? (b) Dispela inap kirapim ol manmeri long mekim wanem?

¹⁵ Long nau, Satan i wok yet long bagarapim nem bilong God. Em i trikim ol manmeri na ol i kisim 2-pela tingting long bikpela strong, stretpela pasin, savetingting, na pasin laikim  bilong God. Eksampel, Satan i laik kirapim ol man long ting olsem Jehova em i no Krieta. Na sapos ol man i bilip olsem God i stap tru, Satan i laik bai ol i ting olsem God na ol lo bilong em i hatpela tumas na i no fea. Satan i skulim tu ol manmeri olsem Jehova i no gat pasin laikim na pasin sori, na em i save kukim ol man long helpaia. Taim ol manmeri i bilipim ol kain tok giaman olsem, dispela inap kirapim ol long sakim stretpela wok bos bilong Jehova. Satan i mekim wok bos yet, olsem na em bai wok yet long bagarapim gutnem bilong Jehova, na em bai traim long stiaim yu tu long sakim wok bos bilong Jehova. Yu ting Satan bai win?

16. Yu inap mekim wanem samting em Adam na Iv i no bin mekim?

¹⁶ Jehova i larim ol sinman tu long insait long wok bilong mekim holi nem bilong em. Olsem na yu inap mekim samting em Adam na Iv i no bin mekim. Maski yumi stap namel long ol manmeri husat i save sutim tok na tok bilas long nem bilong Jehova, rot i op long yu inap autim tok i tru—olsem Jehova em i holi, em i gat stretpela pasin, em i save mekim gutpela pasin, na em i gat pasin laikim. (Ais. 29:23) Yu inap sapotim wok bos bilong God. Yu inap helpim ol manmeri long luksave olsem wok bos bilong Jehova tasol i stretpela olgeta, na dispela wok bos bai bringim bel isi na amamas long olgeta lain long graun na long ples antap.—Sng. 37:9, 37; 146:5, 6, 10.

17. Olsem wanem Jisas i helpim ol man long save long nem bilong Papa bilong em?

¹⁷ Taim yumi sambai long nem bilong Jehova, yumi bihainim eksampel bilong Jisas Krais. (Jon 17:26) Jisas i helpim ol man long save long nem bilong Papa taim em i yusim dispela nem na sambai long gutnem bilong Jehova. Eksampel, em i givim strongpela tok long ol Farisi bikos ol i kirapim ol man long tingim Jehova olsem God bilong mekim hatpela pasin, ol lo bilong em i strik tumas, em i stap longwe long ol manmeri, na em i no gat pasin marimari. Jisas i helpim ol manmeri long luksave olsem Papa i save bihainim stretpela tingting, em i gat pasin isi, pasin laikim, na pasin bilong fogivim man. Na tu, em i bihainim gut ol pasin bilong Papa long olgeta samting em i mekim, na dispela i helpim ol manmeri long luksave long ol pasin tru bilong Papa.—Jon 14:9.

18. Hau bai yumi inap daunim ol tok giaman em Satan i mekim bilong bagarapim gutnem bilong Jehova?

 ¹⁸ Olsem Jisas, yumi save gut long ol pasin bilong Jehova, olsem na yumi inap skulim ol manmeri olsem Jehova em God i gat pasin laikim na pasin helpim. Long dispela rot, yumi daunim ol tok giaman em Satan i mekim bilong bagarapim gutnem bilong Jehova. Yumi mekim holi nem bilong Jehova, na ol manmeri i tingim dispela nem olsem nem holi. Yumi tu inap bihainim ol pasin bilong Jehova. Yumi inap mekim olsem maski yumi sinman. (Efe. 5:1, 2) Toktok na pasin bilong yumi inap helpim ol manmeri long luksave long pasin tru bilong Jehova; long dispela rot, yumi mekim holi nem bilong em. Yumi stretim gutnem bilong God taim yumi helpim ol manmeri long kisim stretpela save long God na bai ol inap sakim ol tok giaman. * Na tu, yumi soim klia olsem ol sinman inap stap gut long God.—Jop 27:5.

19. Olsem Aisaia 63:7 i kamapim, yumi mas holim wanem tingting taim yumi skulim ol manmeri?

¹⁹ Skelim tu narapela samting yumi inap mekim. Taim yumi skulim ol narapela long ol tok i tru bilong Baibel, planti taim yumi save stori long wok bos bilong God, na tokaut klia olsem Jehova i gat rait long bosim heven na graun, na dispela tok em i tru na i stret olgeta. Em tru olsem yumi mas skulim ol man long ol lo bilong God, tasol bikpela tingting bilong yumi em long helpim ol long kisim pasin bilong laikim Jehova, em Papa bilong yumi, na stap gut long em. Olsem na yumi mas tokim ol long ol naispela pasin bilong Jehova, na helpim ol long luksave olsem Jehova em i wanem kain God. (Ritim Aisaia 63:7.) Taim yumi skulim ol gut long Jehova, yumi bai helpim ol long laikim Jehova na daun long em bikos ol i laik stap gut long em.

20. Long neks atikol, yumi bai bekim wanem askim?

²⁰ Orait, olsem wanem pasin na wok tisa bilong yumi inap helpim ol manmeri long kisim stretpela tingting taim ol i harim nem bilong Jehova, na dispela inap kirapim ol long i go klostu long em? Neks atikol bai bekim dispela askim.