LONG ol Hibru long Graun Bilong Promis, nomol yia bilong ol i save kirap long taim bilong brukim graun na planim kaikai, long nau em haptaim namel long mun Septemba na Oktoba.

Kalenda o yia i bihainim wokabaut bilong mun i gat 12-pela mun long en (we i gat 29 o 30 de long ol) i sotpela moa winim yia tru we i bihainim wokabaut bilong san. Ol i bin yusim narapela narapela rot bilong bungim tupela wantaim. Ol i ken kaunim sampela ekstra de i go insait long yia, o ol i skelim gut na sampela haptaim ol i makim wanpela ekstra mun i go long yia, ating paslain long kirap bilong yia. Long dispela rot, ol de na mun i kamap stret long taim bilong planim na kamautim kaikai.

Long taim bilong Moses, God i tokim lain bilong Em olsem yia bilong lotu bai kirap long mun Abip, o Nisan, em namel long mun Mas na Epril bilong nau. (Kis. 12:2; 13:4) Wanpela bung bilong lotu i save kamap long dispela mun em taim bilong kisim bali i redi long gaden.​—Kis. 23:15, 16.

Long buk The History of the Jewish People in the Age of Jesus Christ, (175 B.C.–A.D. 135), saveman Emil Schürer i tok: “Lo em ol i kamapim bilong bungim dispela mun i go insait long kalenda o nogat, em isi tru. Ol i mas mekim bung bilong Pasova long taim bilong ful mun long mun Nisan (de namba 14 bilong mun Nisan), na oltaim ol i mas mekim dispela bung bihain long spring ikwinoks—em wanpela de long yia we longpela bilong de na nait i wankain stret . . . Olsem na klostu long pinis bilong yia taim ol i lukim olsem Pasova bai kamap paslain long spring ikwinoks, orait ol i save makim [namba 13] mun bilong dispela yia paslain long Nisan.”

Ol Witnes Bilong Jehova i save tingim dispela lo taim ol i makim det bilong mekim Kaikai Bilong Bikpela, em i save kamap namel long mun Mas na Epril, em long Nisan 14 bilong Hibru kalenda. Ol i save toksave long ol kongrigesen long olgeta hap bilong graun long dispela det paslain tru long taim bilong bung. *

Tasol hau na ol Hibru i save long taim we wanpela mun bai pinis na narapela mun bai kirap? Long nau, yu inap lukim wanpela kalenda yu gat o wanpela kalenda aplikesen long fon o teblet bilong yu. Tasol long taim bilong ol man i raitim Baibel, ol i no inap mekim olsem.

Long taim bilong Bikpela Tait, ol mun i gat 30 de long en. (Stt. 7:11, 24; 8:3, 4) Bihain long en, long taim bilong ol Hibru, ol mun i no gat 30 de stret long en. Long Hibru kalenda, wanpela mun i save kirap taim mun i kam antap nupela. Em inap 29 o 30 de bihain long kirap bilong mun i go pinis.

Wanpela taim Devit na Jonatan i tok long wanpela mun olsem: “Tumora em de bilong mekim bung bilong nupela mun.” (1 Sml. 20:5, 18) So i luk olsem long yia 1100 B.C.E., ol i save kaunim ol mun paslain long mun i kirap. Olsem wanem wanpela Israel inap save long wanem taim nupela mun bai kirap? Buk Misna, em buk i gat stori bilong ol lo na ol kastam bilong ol Juda i mekim sampela tok long dispela samting. Em i soim olsem taim ol Israel i lusim kalabus long Babilon na kam bek, lain Sanhedrin (suprim kot bilong Juda) i save wokim ol disisen. Insait long 7-pela mun we ol i save mekim ol bung bilong lotu, kot i save bung long namba 30 de bilong ol dispela wan wan mun. Ol dispela man i gat wok long makim wanem taim nupela mun bai kirap. Hau ol i save long dispela?

Ol i makim ol man long sanap antap long ol maunten long Jerusalem bilong lukluk long skai long nait na lukim wanem taim nupela mun i kirap long kam antap. Na kwiktaim ol i save tokim lain Sanhedrin. Taim ol man long dispela kot i pilim olsem ol i kisim dispela toksave long planti aiwitnes olsem ol i lukim mun i kirap, orait ol i save tokaut olsem nupela mun i kirap. Tasol olsem wanem sapos klaut o bikpela smok i karamapim skai na ol i no inap lukim nupela mun i kirap long kam antap? Long kain taim olsem, ol i save tokaut  olsem dispela mun bai i gat 30 de long en na nupela mun i ken kirap nau.

Buk Misna i tok lain Sanhedrin i save tokaut long dispela disisen long rot bilong wokim wanpela bikpela paia antap long Maunten Oliv, klostu long Jerusalem. Na ol man i save wokim ol kain paia long ol narapela maunten bilong spredim dispela toksave. Long ol yia bihain, ol i save salim ol man bilong karim toksave i go long ol manmeri. Long dispela rot, ol Juda long Jerusalem, long Israel olgeta, na long ol ples i stap nabaut ol i ken kisim toksave long kirap bilong nupela mun. Olsem bai olgeta i ken mekim ol bung bilong lotu long wankain taim.

Yu ken lukim dispela sat bilong helpim yu long kliagut long hau ol mun, ol bung bilong lotu, na ol sisen long kalenda bilong ol Hibru i wok gut wantaim.