Long 2012, ol saveman i painim ol hap hap bilong wanpela sospen graun ol man i wokim inap 3,000 yia i go pinis, tasol ol i laik mekim sampela moa wok painimaut. Wanem samting i kirapim laik bilong ol long mekim wok painimaut? Wanpela nem i stap long dispela sospen.

Ol saveman i joinim ol hap hap bilong dispela sospen na ol inap ritim rait i stap long en, em rait bilong lain Kenan long bipo. Rait i tok: “Esbal Ben [pikinini bilong] Beda’.” Em fes taim ol saveman i painim dispela nem long ol rait bilong bipo.

Baibel i stori long narapela Esbal—wanpela pikinini man bilong King Sol. (1 Sto. 8:33; 9:39) Profesa Yosef Garfinkel em wanpela bilong ol saveman i painim dispela sospen graun, na em i tok: “Em narapela kain tru olsem dispela nem Esbal i stap long Baibel, long taim bilong King Devit, na nau dispela nem i stap tu long rekod bilong ol samting bilong bipo em ol saveman i painim.” Sampela man i tok ol man i yusim dispela nem long taim bilong King Devit tasol na ol i no yusim long ol narapela haptaim. Wok painimaut bilong ol saveman i sapotim stori bilong Baibel.

Long narapela hap bilong Baibel, ol i raitim nem Esbal olsem Isboset. Ol i senisim “bal” na raitim “boset.” (2 Sml. 2:10) Ol saveman i tok: “Long Buk 2 Samuel, ol i no yusim nem Esbal bikos dispela nem i makim god Bal bilong ol Kenan, em god bilong strongpela win na ren, tasol ol i raitim dispela nem . . . long Buk Stori.”