MI KAMAP bikpela long Graz, Austria. Taim mi gat 7-pela krismas, papamama i putim mi long skul bilong lain long mekim wok lotu. Tasol mi kirap nogut long lukim ol pris na ol sister i mekim pasin pamuk. Olsem na mama bilong mi i orait long mi ken lusim skul insait long 1-pela yia.

Bihain, mi go long wanpela boding skul. Wanpela nait, Papa i kam na kisim mi long skul bikos ol birua i tromoi bom long Graz. Mipela i go hait long taun Schladming. Bihain tasol long mipela i krosim bris na i go long hapsait, ol birua i bomim bris. Wanpela taim, sampela balus i flai i kam daun klostu long mipela na i sut long gan long mi na bubu meri long haus bilong mipela. Taim woa i pinis, mipela i luksave olsem lotu na gavman i no tingim mipela.

Long 1950, wanpela Witnes Bilong Jehova i autim tok bilong Baibel long mama bilong mi. Mi save putim yau long stori bilong tupela, na sampela taim mi bihainim Mama i go long ol miting. Mama i bilip tru olsem ol Witnes Bilong Jehova i autim tok i tru, olsem na em i kisim baptais long 1952.

Long dispela taim, mi ting olsem kongrigesen em ples bilong ol lapun meri long i kam bung. Tasol bihain, mipela i go visitim narapela kongrigesen we i gat planti yangpela i stap—nau mi pilim olsem kongrigesen i no ples bilong ol lapun meri tasol long i kam bung! Taim mipela i go bek long Graz, mi kirap long i go long olgeta miting, na i no longtaim mi bilip olsem tok mi lainim em tok i tru. Na tu, mi kisim save olsem Jehova em God i save sapotim ol wokman bilong em. Em i save sapotim yumi long taim yumi pilim olsem i hatwok long karim ol hevi i painim yumi.—Sng. 3:5, 6.

Mi laik tokim ol narapela long tok i tru mi lainim. Pastaim, mi autim tok long brata na ol susa bilong mi. Fopela bikpela susa bilong mi i mekim wok olsem ol tisa na ol i no stap moa wantaim mipela. Tasol mi save go visitim ol long ol  ples ol i stap long en na kirapim ol long stadi long Baibel. I no longtaim, olgeta bratasusa bilong mi i kamap Witnes Bilong Jehova.

Long namba 2 wik bilong mi long autim tok long ol haus, mi bungim wanpela meri i gat 30 krismas samting na mi kirapim Baibel stadi wantaim em. Em i winim mak na kisim baptais, na bihain man bilong em na 2-pela pikinini man bilong ol i mekim wankain samting. Stadi mitupela i mekim i strongim mi long sait bilong bilip. Bilong wanem? Long wanem, i no gat wanpela i bin stadi wantaim mi long Baibel. Mi mas redi gut long ol tok mipela bai stadi long en. Mi mekim olsem bilong skulim mi yet, na bihain mi ken skulim ol sumatin bilong mi! Dispela i helpim mi long kliagut long tok i tru. Long Epril 1954, mi kamapim klia dediket bilong mi long Jehova long rot bilong kisim baptais.

Long 1955, mi go long intenesenel kibung long Jemani, Frans, na Inglan. Taim mi stap long London, mi bungim Albert Schroeder. Em i stap olsem tisa long Baibel Skul Bilong Gileat, na bihain em i kamap memba bilong Gavening Bodi. Taim mipela i go visitim musium bilong Briten, Brata Schroeder i soim mipela sampela manuskrip bilong Baibel. Ol dispela manuskrip i gat nem bilong God long ol leta Hibru, na Brata Schroeder i stori long risen na em i bikpela samting long nem bilong God i stap long ol dispela manuskrip. Dispela i mekim na pasin bilong mi long laikim Jehova na tok i tru i go bikpela moa, na mi tingting strong long sapotim tok i tru i stap long Tok Bilong God.

Long Janueri 1, 1956, mi kirap long mekim wok painia oltaim. Fopela mun bihain, ol i singautim mi long mekim wok olsem spesel painia long Ostria. Long dispela taim, i no gat ol Witnes long Mistlebach, em taun mi bai mekim wok painia long en. Na tu, i gat narapela samting i givim hatwok long mi. Mi na painia poroman bilong mi i gat narapela narapela pasin. Mi gat klostu 19 krismas na mi kamap bikpela long taun, tasol em i gat 25 krismas na em i kamap bikpela long kantri sait. Taim moning i kamap, mi save laik slip yet, tasol em i save kirap hariap. Long nait, mi no save slip hariap, tasol em i save laik long slip hariap. Maski i olsem, mipela i bihainim ol skultok bilong Baibel na dispela i helpim mipela long amamas long mekim asainmen bilong mipela.

Mipela i bungim ol narapela hevi tu. Sampela lain i birua long mipela, “tasol God i no save lusim mipela.” (2 Kor. 4:7-9) Wanpela taim mipela i autim tok long wanpela ples i stap longwe, na ol manmeri long dispela ples i lusim ol dok na ol i ron i kam long mipela. Ol dok i kam raunim mitupela na singaut na soim tit bilong ol long mitupela. Mitupela i holim han na mi beten olsem, “Plis Jehova, sapos ol i kaikaim mitupela, orait i gutpela mipela i dai kwiktaim!” Taim ol dok i kam klostu long mipela, ol i stop na tanim tanim tel bilong ol na ol i lusim mitupela na i go. Mipela i pilim olsem Jehova i lukautim mipela. Bihain mipela i autim tok na ol manmeri long dispela hap i amamas na ol i putim gut yau. Ating ol i kirap nogut olsem ol dok i no kaikaim mipela, na tu, mipela i strongim bel na mekim wok maski mitupela i bin pret nogut tru. I no longtaim, sampela bilong ol i kamap Witnes.

I gat narapela samting i mekim na mipela i pret. Wanpela taim papagraun i dring spak na em i kam bek long haus na em i laik kilim mipela. Em i sutim tok olsem mipela i wok long distebim  ol neiba. Meri bilong em i traim long stopim em, tasol em i no inap pasim em. Mipela i stap long rum antap na mipela inap harim olgeta tok em i mekim. Kwiktaim, mitupela i putim ol sia long fran bilong dua na stat long putim ol klos bilong mipela insait long ol sutkeis. Taim mipela i opim dua, papagraun i sanap antap long step na em i holim traipela busnaip. Olsem na mitupela i go long baksait dua na ranawe bihainim rot i go long plaua gaden wantaim ol sutkeis bilong mipela, na mipela i no kam bek gen.

Mipela i go long wanpela hotel na askim bos sapos mipela inap stap long wanpela rum. Mipela i stap long dispela hotel klostu 1-pela yia, na dispela i helpim wok autim tok bilong mitupela. Olsem wanem mitupela i kisim helpim? Hotel i stap namel tru long taun, na sampela Baibel sumatin i laik stadi long dispela hap. I no longtaim, mipela i save mekim buk stadi na Wastaua Stadi long rum bilong mipela, na klostu 15  manmeri i save kam long ol dispela bung.

Mipela i stap long Mistlebach winim 1-pela yia. Bihain ol i salim mi i go long Feldbach, em ples i stap long saut-is bilong Graz. Mi gat nupela painia poroman, tasol i no gat kongrigesen long dispela hap. Mipela i stap long wanpela liklik rum long namba 2 plua bilong haus em ol i wokim long diwai. Win i save kam insait long ol hul namel long ol plang bilong plua, olsem na mipela i traim long pasim wantaim ol niuspepa. Na tu, mipela i mas i go kisim wara long hulwara. Maski i olsem, gutpela samting i kamap. Insait long sampela mun tasol, mipela i kirapim wanpela grup. I no longtaim, klostu 30 manmeri bilong wanpela famili em mipela i stadi wantaim ol, ol i kam insait long tok i tru!

Ol kain ekspiriens olsem i kirapim mi long tok tenkyu long Jehova bikos em i save sapotim ol lain i putim Kingdom i stap namba 1 samting long laip bilong ol. Maski yumi ting olsem i no gat wanpela man inap helpim yumi, olgeta taim Jehova i stap bilong helpim yumi.—Sng. 121:1-3.

Long 1958, wanpela intenesenel kibung i kamap long Yanki Stediam na Polo Grounds long New York City. Mi putim aplikesen bilong i go long dispela kibung, na brens ofis bilong Ostria i askim mi sapos mi laik i go long namba 32 klas bilong Skul Gileat. Mi amamas tru long dispela blesing mi kisim, olsem na kwiktaim mi tok, “Yes!”

Long Skul Gileat, mi sindaun klostu long Martin Poetzinger. Em i bin sanap strong taim  bikpela hevi i painim em long kalabus nogut bilong lain Natsi. Bihain em tu i kamap memba bilong Gavening Bodi. Long taim bilong skul, sampela taim Martin bai toktok isi long mi olsem, “Erika, wanem mining bilong dispela tok long tokples Jeman?”

Klostu long skul i laik pinis, Nathan Knorr i tokaut long ol asainmen bilong mipela. Mi kisim asainmen bilong i go long Paragwai. Mi yangpela tumas, olsem na mi mas kisim tok orait bilong Papa long i go long dispela kantri. Papa i tok orait, olsem na mi go long Paragwai long Mas 1959. Ol i salim mi long i go stap long haus misineri long Asunción. Mi stap wantaim wanpela sista husat i mekim wok painia wantaim mi.

I no longtaim mi bungim Walter Bright, em wanpela misineri husat i grediuet long namba 30 klas bilong Skul Gileat. Bihain, mitupela i marit na mipela i redi long karim ol hevi wantaim. Maski wanem hevi i painim mipela, mipela i save ritim tok promis bilong Jehova long Aisaia 41:10. Em i tok: “Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela.” Dispela tok promis i strongim bilip bilong mipela olsem sapos mipela i stap gut long God na putim Kingdom i stap namba 1, em bai no inap tru long lusim mipela.

Bihain ol i salim mipela i go long wanpela ples i stap klostu long boda bilong Brasil. Long dispela hap, pasto i kirapim ol yangpela manmeri long tromoi ston long haus misineri em mipela i stap long en. Dispela haus i wok long bagarap. Bihain Walter i kirap stadi wantaim bikman bilong ol polis. Dispela bikman i stretim rot na ol polis i sanap klostu long haus bilong mipela inap 1-pela wik, na ol birua i no kam moa na mekim nogut long mipela. I no longtaim, mipela i muv i go long narapela gutpela haus long boda bilong Brasil. Dispela senis i gutpela bikos mipela inap mekim ol miting long tokples Paragwai na tokples Brasil. Paslain long mipela i lusim asainmen bilong mipela, 2-pela liklik kongrigesen i kamap.

Ol dokta i tokim mi olsem mi no inap karim pikinini. Tasol long 1962, mipela i kirap nogut olsem mi gat bel! Olsem na mipela i go stap klostu long famili bilong Walter long Hollywood, Florida. Mipela i mas lukautim tupela pikinini man bilong mipela. Olsem na inap sampela yia, mitupela Walter i no inap mekim wok painia. Maski i olsem, mipela i wok yet long putim wok bilong Kingdom i stap namba 1.—Mat. 6:33.

Taim mipela i kamap long Florida long Novemba  1962, mipela i kirap nogut olsem ol blakskin na ol waitskin bratasista i no save bung na mekim miting wantaim. Na tu, ol i autim tok long narapela narapela teritori, long wanem, ol man bilong dispela hap i bihainim dispela pasin. Tasol Jehova i no save laikim wanpela lain na birua long narapela, nogat. Olsem na i no longtaim, olgeta kongrigesen i bung wantaim. Jehova i blesim dispela disisen, na nau i gat planti kongrigesen long dispela hap.

Sori tru olsem long 2015, Walter i dai long sik kensa bilong kru. Em i stap gutpela man marit bilong mi winim 55 yia, na em i laikim tru Jehova na em i helpim planti bratasista. Mi luk fowed long lukim em long taim em i kirap bek na i gat gutpela helt.—Apo. 24:15.

Mi amamas olsem mi insait long fultaim sevis winim 40 yia. Long ol dispela yia, mi kisim bikpela amamas na planti blesing. Kain olsem, mitupela Walter i lukim 136 Baibel sumatin bilong mipela i kisim baptais. Ol hevi i painim mipela, tasol mipela i no larim ol dispela samting i pasim mipela long mekim laik bilong God. Mipela i go klostu long em na bilip olsem long taim stret em bai stretim ol dispela hevi. Tru tumas, God i bin helpim mipela!—2 Tim. 4:16, 17.

Mi misim tru Walter, tasol wok painia i helpim mi long karim dispela hevi. Taim mi skulim ol narapela na stori wantaim ol long kirap bek, dispela i save helpim mi. Tru tumas, Jehova i bin lukautim mi long planti rot. Long rot bilong ol tok promis bilong em, em i helpim mi, strongim mi, na long “bikpela strong” bilong em, em i lukautim mi.—Ais. 41:10.