1. Ol Kristen long taim bilong ol aposel i bungim wanem hevi?

NAMEL long yia 62 C.E. na 64 C.E. samting, aposel Pita i raitim pas i go long “ol tripman i stap nabaut long Pontus, Galesia, Kapadosia, Esia, na Bitinia.” (1 Pita 1:1) Ol Kristen bilong narapela narapela hap i stap long ol dispela kongrigesen long Esia Maina, na ol i nidim tok bilong strongim na stiaim ol. Ol man i birua na mekim ol tok nogut bilong daunim ol dispela Kristen. Ol i karim “ol hevi i olsem paia.” Pita i tok: “Pinis bilong olgeta samting i kam klostu.” Bihain long 8-pela yia samting, ol pasin na ol lo em ol Juda i stap aninit long en bai pinis. Wanem samting bai helpim ol Kristen long olgeta hap long sanap strong na karim hevi?—1 Pita 4:4, 7, 12.

2, 3. Bilong wanem Pita i kirapim ol Kristen long mekim gut long ol arapela? (Lukim piksa long kirap bilong stadi.)

² Pita i tokim ol Kristen: “Yupela i mas amamas long mekim gut long ol arapela.” (1 Pita 4:9) Dispela tok “mekim gut long ol arapela” i kam long wanpela tok Grik, na i makim “pasin bilong laikim o helpim ol man em yu no save long ol.” Tasol aposel Pita i kirapim ol Kristen long mekim gut long ol lain  ol i save bung wantaim. Olsem wanem pasin bilong mekim gut long ol narapela i helpim ol Kristen?

³ Dispela pasin bai helpim ol long pas gut wantaim. Olsem wanem? Yu amamas taim wanpela i invaitim yu i go long haus bilong em? Yu tingim bek amamas yu kisim taim yupela i bung wantaim? Taim yu invaitim ol narapela long kongrigesen, olsem wanem dispela i strongim pasin pren bilong yupela? Taim yumi mekim gut long ol bratasista, yumi bai save gut long ol. Ol Kristen long taim bilong Pita i gat wok long pas gut wantaim bikos pasin bilong birua long ol Kristen i go bikpela moa. Olsem tasol, ol Kristen i stap long “taim bilong las de,” ol i mas pas gut wantaim.—2 Tim. 3:1.

4. Yumi bai skelim wanem ol askim long dispela stadi?

⁴ Olsem wanem yumi inap mekim gut long “ol arapela”? Olsem wanem yumi inap daunim pasin bilong surik long mekim gut long ol arapela? Yumi ken mekim wanem gutpela pasin taim ol narapela i invaitim yumi?

5. Olsem wanem yumi inap mekim gut long ol arapela long taim bilong miting?

⁵ Long miting: Yumi mas welkamim ol lain i kam long ol miting long kisim kaikai bilong strongim bilip. Jehova na oganaisesen bilong em i welkamim olgeta manmeri. (Rom 15:7) Yumi bihainim pasin bilong ol long welkamim ol nupela lain. Yumi mas i go pas long welkamim ol, maski ol i no bilas gut. (Jems 2:1-4) Sapos wanpela nupela i no gat ples sindaun, yu ken tokim em long sindaun wantaim yu. Ating em bai amamas taim yu helpim em long bihainim ol hap bilong miting na painim ol skripsa. Dispela em gutpela rot bilong “bihainim pasin bilong mekim gut long ol arapela.”—Rom 12:13.

6. Husat ol nambawan lain em yumi mas invaitim ol?

⁶ Bung na kaikai wantaim: Long taim bilong ol man i raitim Baibel, ol man i mekim gut long ol narapela taim ol i singautim ol long kaikai wantaim ol. (Stt. 18:1-8; Het. 13:15, 16; Luk 24:28-30) Taim ol man i kaikai wantaim ol narapela, dispela i makim olsem ol i laik stap pren na stap wanbel. Husat ol nambawan lain em yumi mas invaitim ol? Yumi inap invaitim ol lain em yumi save bung oltaim wantaim ol, em ol bratasista long kongrigesen. Taim hevi i kamap, yumi bai helpim narapela narapela. Yumi mas pas gut na stap wanbel wantaim ol bratasista. Long 2011, Gavening Bodi i senisim taim bilong Wastaua Stadi bilong Betel famili long Amerika bambai ol i bung long 6:15 long apinun na i no 6:45 long apinun. Ol i toksave olsem dispela senis bai helpim ol Betelait long bung wantaim narapela narapela bihain long miting i pinis. Ol narapela brens ofis i mekim wankain senis. Dispela i helpim ol Betel famili long pas gut wantaim.

7, 8. Olsem wanem yumi inap mekim gut long ol brata i kam visitim yumi?

⁷ Taim ol brata bilong narapela kongrigesen, na tu, ol wasman sekit, na ol brata em brens ofis i makim bilong mekim tok i visitim yumi, dispela i opim rot long yumi mekim gut long ol arapela. (Ritim 3 Jon 5-8.) Taim yumi kaikai wantaim ol, dispela em wanpela rot bilong mekim gut long ol arapela. Yu inap mekim olsem?

⁸ Wanpela sista long Amerika i tok: “Inap planti yia, mi na man bilong mi i invaitim ol brata na meri bilong ol husat i kam mekim pablik tok. Olgeta bung mipela i mekim i givim amamas long mipela, na bikpela samting moa em mipela i strongim bilip bilong narapela narapela. Mipela i no rigret.”

9, 10. (a) Yumi inap givim ples slip long husat? (b) Yu ting ol lain i no gat planti samting inap givim ples slip long ol narapela? Stori long dispela.

 ⁹ Ples slip: Long bipo, pasin bilong givim ples slip long ol visita em wanpela gutpela rot bilong mekim gut long ol arapela. (Jop 31:32; File. 22) Long nau tu, yumi mas givim ples slip long ol arapela. Planti taim ol wasman sekit i nidim ples slip taim ol i visitim ol kongrigesen. Ol sumatin i go long skul tiokratik na ol lain i volantia long wok konstraksen, ol tu bai nidim ples slip. Ating disasta i kamap na sampela famili i lusim haus, na ol i mas wetim lain disasta rilif i kam na stretim haus bilong ol. Yumi no ken ting olsem ol lain i gat gutpela haus tasol bai helpim ol; ating ol i mekim olsem inap planti taim pinis. Olsem wanem? Yu inap givim ples slip long ol narapela maski yu no gat planti samting?

¹⁰ Wanpela brata long Saut Korea i givim ples slip long ol lain i go kisim trening long skul tiokratik. Em i tok: “Pastaim, mi pret long invaitim ol bikos mipela i marit nupela na stap long liklik haus. Tasol taim mipela i invaitim ol sumatin long stap wantaim mipela, dispela i givim amamas long mipela. Olsem ol nupela marit, mipela i luksave olsem taim ol marit i tingting long mekim wok bilong Jehova na winim ol mak ol i putim, ol bai amamas tru.”

11. Wai na yumi mas mekim gut long ol lain i kam nupela long kongrigesen?

¹¹ Nupela long kongrigesen: Wanpela brata o sista o wanpela famili Kristen inap i kam stap long hap bilong yu. Ating sampela i kam bilong helpim wok autim tok long hap i sot long ol pablisa. Na tu, ating sampela painia i kam long kongrigesen bilong yu long helpim wok autim tok. Olgeta dispela lain i kam i stap long nupela hap, nupela kongrigesen, na ol i mas lainim nupela tokples na kalsa. Taim yumi invaitim ol long i kam kaikai wantaim yumi o yumi go long ol pak samting bilong kisim amamas, dispela bai helpim ol long painim ol nupela pren na ol bai lain long nupela sindaun.

12. Stori long ekspiriens i soim olsem yumi no gat wok long tromoi bikpela mani long mekim gut long ol arapela.

¹² I no olsem yumi mas tromoi bikpela mani bilong mekim gut long ol narapela. (Ritim Luk 10:41, 42.) Wanpela brata husat i mekim wok misineri long pastaim, em i tok: “Mipela i yangpela na mipela i no gat ekspiriens, na tu, mipela i save salim tingting long ples. Wanpela apinun, meri bilong mi i salim tingting long ples na maski mi traim long mekim gut bel bilong em, em i bel hevi yet. Bihain long 7:30 long nait, mipela i harim wanpela i nok long dua. Wanpela Baibel sumatin i bringim 3-pela orens i kam. Em i kam bilong welkamim ol nupela misineri. Mipela i tokim em long kam insait long haus na mipela i givim em kolwara, na bihain mipela i dring ti wantaim soklet dring. Mipela i no save yet long tokples Swahili na em i no save long tok Inglis. Tasol kirap long dispela taim, mipela i kamap gutpela pren bilong ol asples bratasista.”

13. Wanem ol gutpela samting inap kamap taim yumi mekim gut long ol narapela?

¹³ Sampela taim yu surik long mekim gut long ol narapela? Sapos olsem, orait yu no inap bung na amamas wantaim ol narapela, na yu bai no gat ol gutpela pren husat bai pas gut wantaim yu inap longpela taim. Sapos yu mekim gut long ol narapela, yu no inap pilim olsem yu stap wanpis. Tasol ating yu laik save, ‘Bilong wanem na sampela i surik long mekim gut long ol narapela?’ Ating i gat sampela risen na ol i mekim olsem.

14. Yumi mas mekim wanem sapos yumi no gat taim na strong long mekim gut long ol narapela?

¹⁴ Taim na strong: Ol wokman bilong Jehova i bisi tru na ol i gat planti wok long mekim. Olsem na sampela bratasista i pilim olsem ol i no gat taim na strong long mekim gut long ol narapela. Sapos yu pilim olsem,  ating i gutpela long skelim gen sediul bilong yu long mekim ol wok, na mekim sampela senis bambai yu gat taim na strong long mekim gut long ol narapela. Baibel i kirapim ol Kristen long mekim gut long ol arapela. (Hib. 13:2) I stret yumi lusim sampela haptaim long mekim gut long ol arapela. Ating yu mas redi long lusim sampela wok we i no bikpela samting tumas long yu mekim.

15. Wai na sampela i surik long mekim gut long ol narapela?

¹⁵ Tingting yu gat long yu yet: Olsem wanem? Yu laik mekim gut long ol arapela, tasol yu pilim olsem yu no inap? Sampela i sem o pret bikos ol i no save ol bai stori long wanem samting, o ol i ting ol lain ol i invaitim i no inap amamas tumas. Sampela i gat mani inap long skel bilong ol yet, na ol i pilim olsem ol i no inap mekim ol samting em ol narapela long kongrigesen i mekim bilong mekim gut long narapela. Tasol tingim, bikpela samting em haus i stap klin, ol samting i stap stret na yumi amamas long invaitim ol narapela, na i no olsem yumi mas i gat bikpela haus na planti nupela samting.

16, 17. Wanem samting inap helpim yumi long daunim pasin bilong tingting planti taim yumi invaitim ol narapela?

¹⁶ Planti bratasista i surik long invaitim ol narapela. Wanpela elda long Briten i tok: “Yu inap tingting planti long redim ol kaikai samting taim yu invaitim sampela pren long i kam long haus bilong yu. Tasol pasin yu mekim i insait long ol wok bilong lotuim Jehova, olsem na amamas yu kisim bai winim pasin bilong yu long tingting planti. Mi amamas long dring kofi na stori wantaim ol lain i kam long haus bilong mi.” Taim yumi mekim gut long ol lain i kam long haus bilong yumi, dispela inap helpim yumi. (Fili. 2:4) Ating planti bilong yumi i save amamas long kamapim ol ekspiriens bilong yumi long ol narapela. Taim yumi bung wantaim bilong kisim amamas, dispela i opim rot long ol narapela i save long ekspiriens bilong yumi. Narapela elda i tok: “Taim mi invaitim ol pren long kongrigesen long i kam long haus bilong mi, mi inap save gut moa long ol, na moa yet mi save long olsem wanem ol i kisim tok i tru.” Taim yumi bung wantaim na strongim narapela narapela, yumi bai amamas tru.

¹⁷ Wanpela painia sista i givim ples slip long ol sumatin i kam long skul tiokratik. Em i tok: “Pastaim, mi tingting planti bikos haus bilong mi i liklik na mi no gat planti samting, ol tebol na sia samting bilong haus em ol samting ol narapela i yusim pinis na ol i givim long mi. Meri bilong wanpela tisa bilong skul tiokratik i mekim gutpela tok long mi. Em i tok taim tupela i mekim wok wasman raun, ol i amamas long stap wantaim ol lain husat i holim wankain tingting olsem ol—ol i putim wok bilong Jehova i stap namba 1 samting, na ol i gat liklik samting tasol. Mi tingim tok Mama i tokim mipela taim mipela i liklik pikinini, em i tok: ‘Sapos yu stap wantaim ol pren bilong yu na yupela i kaikai kumu tasol, dispela i winim tru pasin bilong i stap wantaim ol man yu no laikim.’” (Snd. 15:17) Yumi mas larim pasin laikim i kirapim yumi long mekim gut long ol narapela, na yumi no ken tingting planti.

18, 19. Olsem wanem pasin bilong mekim gut long ol narapela inap helpim yumi long daunim ol tingting kranki yumi gat?

¹⁸ Tingting yu gat long ol narapela: Olsem wanem? Sampela long kongrigesen i mekim sampela tok o pasin i sikirapim bel bilong yu? Ating tingting kranki yu gat long dispela brata o sista inap stap longpela taim sapos yu no toktok wantaim em na stretim dispela hevi. Na tu, pasin na tingting bilong yupela i no wankain, na dispela inap pasim yu long mekim gut long narapela. O ating wanpela i bagarapim bel bilong yu na yu hatwok long lusim tingting long pasin em i mekim.

¹⁹ Taim yumi bihainim tok bilong Baibel na mekim gut long ol arapela, yumi bai stap wanbel wantaim ol na ol birua bilong yumi tu. (Ritim Sindaun 25:21, 22.) Taim yumi mekim gut long narapela, dispela inap daunim bel hevi yumi gat long em. Na tu, dispela inap kirapim yumi long tingim ol gutpela pasin bilong em, em ol pasin Jehova i lukim taim em i kirapim dispela man long kam insait long tok i tru. (Jon 6:44) Sapos pasin laikim i kirapim yumi long invaitim em i kam long haus bilong yumi, dispela inap strongim pasin pren namel long yumi. Tasol olsem wanem yumi inap save olsem tru tru yumi gat pasin laikim? Yumi mas bihainim tok i stap long Filipai 2:3, em i tok: “Yupela i mas daunim yupela yet na tingim olsem ol arapela i winim yupela.” Yumi mas traim long luksave long olsem wanem ol bratasista i winim yumi—olsem pasin bilong ol long bilip, sanap strong na i no pret, na ol narapela gutpela pasin em ol i save kamapim—dispela bai kirapim yumi long laikim ol moa yet na mekim gut long ol.

20. (a) Sapos yumi tok orait long i go long wanpela bung, bilong wanem yumi no ken senisim tingting? (b) Olsem wanem yumi inap soim olsem yumi tingim ol lain i invaitim yumi?

²⁰ Devit em man bilong raitim song, na em i tok: “Bikpela, husat inap i stap long haus bilong yu?” (Sng. 15:1) Devit i mekim dispela askim na em i stori long gutpela pasin bilong ol man i kam i stap long haus bilong God. Wanpela gutpela pasin Devit i stori long en em pasin bilong truim ol tok promis bilong yumi. Em i tok: “Em i save inapim ol promis em i bin mekim, maski dispela pasin i givim bikpela hevi long em.” (Sng. 15:4) Taim wanpela i invaitim yumi na yumi tok orait long en, i no stret long senisim tingting na tok nogat sapos yumi no gat gutpela risen. Ating man i invaitim yumi i tromoi bikpela taim na strong long redim kaikai, na sapos yumi senisim tok bilong yumi, hatwok bilong em bai lus nating. (Mat. 5:37) Sampela taim ol narapela i senisim tingting bilong ol bambai ol i ken go long narapela bung we ol i ting em i gutpela moa. Yu ting dispela i soim olsem ol i gat pasin laikim na pasin rispek? Yumi mas amamas long gutpela pasin ol narapela i mekim bilong redim ples na kaikai samting bilong yumi. (Luk 10:7) Sapos i gat gutpela risen na yumi no inap i go long wanpela bung, orait long pasin laikim yumi mas toksave hariap long ol lain i singautim yumi. Long dispela rot, yumi soim olsem yumi tingim ol.

21. Taim yumi rispektim kastam bilong ol lain i invaitim yumi, olsem wanem dispela i soim olsem yumi bihainim gutpela pasin?

²¹ Yumi mas soim rispek long kastam bilong ples yumi stap long en. Long sampela hap, ol man i kam long haus bilong ol narapela long laik bilong ol yet. Tasol long ol narapela hap, yumi mas toksave long papa bilong haus paslain long yumi go long haus bilong em. Long sampela hap, ol lain bilong haus bai givim ol gutpela kaikai pastaim long ol lain i kam long haus, na ol yet bai kaikai bihain. Tasol long ol narapela hap, olgeta bai kaikai wantaim. Long sampela hap, ol lain i go long haus bilong ol narapela i save bringim sampela kaikai i go wantaim ol. Tasol long ol narapela hap, man i invaitim ol lain i kam long haus bai amamas moa taim ol i no bringim kaikai samting. Long sampela kalsa, sapos man i invaitim yu long go long wanpela bung, i no gat rong long tok nogat long namba 1 o namba 2 taim. Tasol long sampela kalsa, sapos ol i invaitim yu na yu tok nogat, ol bai ting olsem yu no amamas long ol. Olsem na yumi laik wok strong long mekim gutpela pasin na amamasim ol lain i invaitim yumi.

22. Bilong wanem yumi mas “mekim gut long ol arapela”?

²² Tingim olsem “pinis bilong olgeta samting i kam klostu.” (1 Pita 4:7) Yumi lukim bikpela hevi tru i kamap long graun winim olgeta taim bipo. Planti samting i putim presa long yumi, olsem na yumi mas strongim pasin laikim i stap namel long yumi na ol bratasista bilong yumi. Pita i tokim ol Kristen: “Yupela i mas amamas long mekim gut long ol arapela,” na em gutpela pasin yumi mas bihainim oltaim.—1 Pita 4:9.