JISAS i tok: “Amamas bilong givim samting i winim amamas bilong kisim samting.” (Apo. 20:35) Dispela tok i stret long pasin pren bilong yumi wantaim Jehova. Bilong wanem yumi tok olsem? Yumi kisim planti presen i kam long Jehova na dispela i mekim yumi amamas. Tasol yumi inap kisim bikpela amamas tru taim yumi givim presen long Jehova. Yumi inap givim wanem presen long Jehova? Provep 3:9 i tok: “Onarim Jehova na givim em ol gutpela samting tru bilong yu.” Ol “gutpela samting tru” em taim, save, strong, na mani kago. Taim yumi yusim ol dispela samting long sapotim lotu i tru, i olsem yumi givim presen long Jehova, na dispela bai givim bikpela amamas moa long yumi.

Yumi mas mekim wanem na bai yumi redi long givim mani kago olsem presen long Jehova? Aposel Pol i tokim ol Kristen long Korin long “putim sampela mani i stap” olsem kontribiusen. (1 Kor. 16:2) Yu ken mekim wanem sapos yu laik kisim sampela moa infomesen long ol rot bilong givim donesen long hap yu stap long en? Plis lukim blok i stap daunbilo.

Long sampela kantri, yu no inap givim donesen long rot bilong Intenet. Tasol yu inap kisim save long ol narapela rot bilong givim donesen long hap bilong donesen long jw.org. Long sampela kantri, wanpela infomesen i stap long dispela pes na i kamapim bekim bilong ol askim em planti man i gat long sait bilong givim donesen.