1. (a) Aisaia i mekim wanem tok profet long Jisas? (b) Bilong wanem dispela tok i strongim yumi?

AISAIA i mekim tok profet long Bikpela bilong yumi Jisas Krais, na dispela tok i mekim isi bel bilong yumi. Aisaia i tok profet olsem Jisas “i no inap skelim man long ol toktok em i harim na long ol samting em i lukim long ai tasol. Nogat. Long stretpela pasin bilong skelim kot, em bai i harim wari bilong ol rabisman.” (Ais. 11:3, 4) Bilong wanem dispela tok i strongim yumi? Long wanem, yumi stap long taim we ol manmeri i gat pasin bilong laikim wanpela lain na heitim narapela lain. Yumi amamas olsem long bihain, bai i gat wanpela stretpela Jas husat i no inap skelim yumi long lukluk bilong yumi!

2. (a) Jisas i tok yumi mas mekim wanem? (b) Yumi bai stori long wanem samting long dispela stadi?

² Long olgeta wan wan de, yumi save skelim ol manmeri. Tasol yumi gat sin, olsem na yumi no inap skelim ol man long stretpela pasin olsem Jisas i save mekim. Yumi save skelim ol man long ol samting yumi lukim long ai. Taim Jisas i stap long graun, em i tok: “Yupela i mas lusim pasin bilong skelim samting long ai. Yupela i mas skelim samting long pasin i stret.” (Jon 7:24) Jisas i laik bai yumi bihainim pasin bilong em na yumi no ken skelim lukluk bilong man. Long dispela stadi, yumi bai stori long 3-pela samting we i stiaim ol man long skelim lukluk bilong ol narapela—ples man i  kam long en, mani kago, na krismas. Yumi bai stori long olsem wanem yumi inap bihainim tok bilong Jisas long dispela 3-pela samting.

3, 4. (a) Wanem ol samting i kamap na i kirapim Pita long senisim tingting kranki em i gat long ol man bilong narapela lain? (Lukim piksa long kirap bilong stadi.) (b) Jehova i helpim Pita long kisim wanem stretpela save?

³ Aposel Pita i tingting planti taim ol man i kam tokim em long i go long Sisaria na lukim Kornilius, em man husat i no bilong lain Juda. (Apo. 10:17-29) Wankain olsem planti arapela Juda long dispela taim, Pita i kamap bikpela namel long ol man husat i ting olsem ol man bilong ol narapela lain i no klin. Tasol i gat sampela samting i kamap na dispela i senisim tingting bilong Pita. Wanpela samting i senisim tingting bilong Pita em visen em i bin lukim. (Apo. 10:9-16) Em i lukim wanpela laplap i kam daun, na insait long dispela laplap i gat ol animal i no klin. Wanpela nek i tokim em: “Pita, yu kirap na kilim ol i dai na kaikai!” Pita i no laik kaikai, na dispela nek i tokim em olsem “ol samting God i mekim i kamap klin pinis, yu no ken tok ol i doti.” Taim Pita i kirap, em i tingting planti long ol samting dispela nek i laik tokim em long en. Long dispela taim stret, ol man i bringim tok bilong Kornilius i kam long Pita. Bihain long holi spirit i kamapim klia ol samting long Pita, em i bihainim ol dispela man i go long haus bilong Kornilius.

⁴ Sapos Pita i skelim tasol ples em Kornilius i kam long en, em i no inap i go long haus bilong Kornilius. Ol Juda i no save go long haus bilong ol man bilong narapela lain. Tasol bilong wanem Pita i go long haus bilong Kornilius? Pita i lukim visen na ol tok em i kisim long holi spirit i kirapim em long senisim tingting kranki em i gat. Taim Kornilius i kamapim tingting bilong em, Pita i pilim tru tok bilong Kornilius, na em i tok: “Tru tumas, nau mi luksave olsem God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.” (Apo. 10:34, 35) God i helpim Pita long kisim stretpela save olsem Em i save mekim wankain pasin long olgeta man! Olsem wanem dispela stretpela save em i kisim inap helpim olgeta Kristen?

5. (a) Jehova i laik bai olgeta Kristen i mas save long wanem samting? (b) Maski yumi save long tok i tru, yumi inap holim yet wanem kain pasin?

⁵ Long rot bilong Pita, Jehova i helpim olgeta Kristen long luksave olsem Em i save mekim wankain pasin long olgeta man. God i no save laikim tasol ol man bilong wanpela lain, wanpela skin kala, ples, o tokples. Sapos wanpela man o meri i pret long God na bihainim stretpela pasin, God bai orait long em. (Gal. 3:26-28; Rev. 7:9, 10) Yumi inap tru long bilipim dispela tok. Tasol olsem wanem sapos yu kamap bikpela long kantri o famili em ol i gat pasin bilong luk daun long ol man bilong narapela ples? Yu inap ting olsem yu no gat dispela pasin, tasol tru tru yu gat dispela pasin. Maski Pita i kamapim klia tingting bilong Jehova long mekim wankain pasin long olgeta man, bihain em i no moa bung wantaim ol man bilong narapela lain. (Gal. 2:11-14) Olsem wanem yumi inap bihainim tok bilong Jisas na yumi no skelim lukluk bilong man?

6. (a) Olsem wanem yumi inap rausim pasin bilong luk daun long ol narapela? (b) Ripot bilong wanpela brata i kamapim klia wanem samting?

⁶ Yumi mas yusim Tok Bilong God long skelim yumi yet na bai yumi ken save olsem yumi gat pasin bilong luk daun long ol narapela, o nogat. (Sng. 119:105) Sapos yumi no luksave olsem yumi gat pasin bilong luk daun long ol narapela, orait yumi mas larim ol narapela i helpim yumi long rausim dispela pasin. (Gal. 2:11, 14) Ating dispela pasin i pas strong long yumi na yumi yet i no luksave. Olsem, wanpela elda i raitim ripot i go long brens ofis na  i stori long tupela marit husat i mekim wok fultaim sevis. Brata i bilong wanpela lain em planti man i save luk daun long ol. Elda i raitim ripot i no luksave olsem em tu i gat wankain tingting long dispela lain. Long pas em i raitim, em i stori long planti gutpela samting dispela brata i mekim. Tasol long pinis bilong pas, em i tok: “Maski dispela brata i bilong [dispela lain], pasin bilong em i helpim ol narapela long luksave olsem maski em i man bilong [dispela ples], dispela i no makim olsem em i no klin na em i stap rabis. Planti man bilong dispela ples i gat dispela kain sindaun.” Yu luksave long skul yumi kisim? Maski wanem wanem wok bilong God yumi mekim, yumi mas skelim yumi yet na redi long kisim helpim long ol narapela bambai yumi inap rausim pasin bilong luk daun long ol narapela. Yumi inap mekim wanem samting moa?

7. Olsem wanem yumi ken soim olsem yumi laikim tru ol narapela?

⁷ Sapos yumi gat pasin bilong laikim tru ol narapela, dispela bai helpim yumi long daunim pasin bilong luk daun long ol. (2 Kor. 6:11-13) Olsem wanem? Yu gat pasin bilong bung tasol wantaim ol lain i gat wankain skin kala, ples, na tokples olsem bilong yu? Sapos olsem, orait yu mas wok strong long laikim olgeta kain man. Yu ken invaitim ol man bilong narapela ples, o tokples long autim tok wantaim yu, o kam long haus bilong yu na kaikai wantaim. (Apo. 16:14, 15) Sapos yu mekim olsem, yu bai laikim tru ol narapela na yu no inap luk daun long ol. Tasol i gat ol narapela samting we inap mekim na yumi skelim lukluk bilong man. Em mani kago na pasin bilong i stap rabis.

8. Tok bilong Wok Pris 19:15 i helpim yumi olsem wanem?

⁸ Mani kago na pasin bilong i stap rabis inap stiaim tingting yumi gat long ol narapela. Wok Pris 19:15 i tok: “Sapos yupela i harim kot, orait yupela i mas mekim stretpela pasin long kot. . . . Yupela i no ken helpim ol rabisman bai ol i winim nating kot. Tasol yupela i no ken pret long ol man i gat namba na biknem na helpim ol long winim kot.”

9. (a) Solomon i tok yumi ol man i gat wanem pasin? (b) Yumi kisim wanem skul long dispela?

⁹ Olsem wanem mani kago o pasin bilong i stap rabis inap stiaim tingting yumi gat long ol narapela? Holi spirit i stiaim Solomon long stori long wanpela pasin bilong yumi ol sinman. Sindaun 14:20 i tok: “Ol man i no save laikim man i sot long ol samting, maski em i wantok bilong ol. Tasol ol maniman i gat planti pren.” Dispela savetok i skulim yumi long wanem samting? Sapos yumi no was gut, yumi bai amamas long bung wantaim ol wanbilip husat i gat mani kago, na yumi les long ol wanbilip husat i no gat planti samting. Wanem hevi inap kamap taim yumi skelim ol man long mani kago bilong ol o pasin bilong ol long i stap rabis?

10. Jems i stori long wanem hevi i kamap insait long ol kongrigesen?

¹⁰ Sapos yumi larim mani kago i stiaim tingting yumi gat long ol narapela, dispela inap mekim na kongrigesen i bruk. Disaipel Jems i tok lukaut olsem dispela pasin i mekim na sampela kongrigesen long taim bilong ol aposel i bruk na ol i no stap wanbel. (Ritim Jems 2:1-4.) Yumi mas was gut na bai yumi no larim dispela kain tingting i mekim na kongrigesen bilong yumi i no stap wanbel. Olsem wanem yumi inap sakim pasin bilong skelim man long mani kago bilong em o pasin bilong em long i stap rabis?

11. Yu ting mani kago o pasin bilong i stap rabis i mekim na man i pas gut wantaim Jehova? Stori long dispela.

¹¹ Yumi mas tingim ol bratasista bilong yumi wankain olsem Jehova i tingim ol. Maski man i gat mani kago o em i stap rabis, Jehova i no tingim dispela samting. Yumi inap pas gut wantaim Jehova maski yumi gat mani  kago o yumi stap rabis. Em tru olsem Jisas i tok: “Bai i hatwok tru long wanpela maniman long i go insait long Kingdom bilong heven.” Tasol dispela i no makim olsem maniman i no gat rot long go insait long Kingdom bilong heven. (Mat. 19:23) Na tu, em i tok: “Yupela ol man i stap rabis, yupela i ken amamas, long wanem, Kingdom bilong God em i bilong yupela.” (Luk 6:20) Tasol dispela i no makim olsem God i orait tasol long ol man i stap rabis na olgeta bai harim tok bilong Jisas, nogat. Planti man i stap rabis i no kamap disaipel bilong Jisas. Dispela i skulim yumi olsem maski man i gat mani kago o em i stap rabis, em inap long i stap pren bilong Jehova.

12. Baibel i kirapim ol maniman na ol man i stap rabis long mekim wanem?

¹² God i blesim yumi na i givim yumi planti bratasista husat i laikim tru Jehova na i mekim wok bilong em. Sampela bilong ol i gat mani kago na sampela i no gat planti samting. Baibel i kirapim ol lain i gat mani kago long “ol i no ken putim bilip bilong ol long mani samting i bilong stap sotpela taim tasol, nogat. Ol i mas bilip long God.” (Ritim 1 Timoti 6:17-19.) Na tu, Baibel i kirapim olgeta wokman bilong God, maski ol i maniman o ol i stap rabis long ol i no ken kisim pasin bilong laikim tumas mani. (1 Tim. 6:9, 10) Tru tumas, taim yumi holim wankain tingting olsem bilong Jehova long ol bratasista, yumi no inap skelim ol long mani kago bilong ol o long pasin bilong ol long i stap rabis. Tasol olsem wanem long krismas bilong man? I stret long yumi skelim ol narapela long krismas bilong ol? Yumi ken stori long dispela.

13. Baibel i skulim yumi long soim wanem pasin long ol man i gat bikpela krismas?

¹³ Planti taim Baibel i kirapim yumi long soim rispek long ol man i gat bikpela krismas. Wok Pris 19:32 i tok: “Yupela i mas aninit long ol lapun na mekim gut long ol. Na yupela i mas aninit long mi, God bilong yupela. Mi Bikpela, mi tok olsem.” Sindaun 16:31 (NW ) i mekim wankain tok olsem: “Waitpela gras bilong man i gutpela samting tru taim em i bihainim stretpela pasin.” Na tu, Pol i tokim Timoti long em i no ken mekim hatpela pasin long ol man i gat bikpela krismas, tasol em i mas tingim ol dispela man olsem papa bilong em. (1 Tim. 5:1, 2) Maski Timoti i gat namba long mekim sampela wok, em i mas soim pasin sori na pasin rispek long ol man i gat bikpela krismas.

14. Wanem samting inap kamap na yumi mas givim tok kaunsel long man i gat bikpela krismas?

¹⁴ Olsem wanem yumi inap holim stretpela tingting long tok Baibel i mekim long rispektim ol lapun? Olsem, yumi bai orait tasol sapos brata o sista husat i gat bikpela krismas i mekim sin long laik bilong em yet o em i kirapim ol narapela long mekim pasin em Jehova i no orait long en? Jehova i no inap skelim krismas bilong dispela brata o sista na orait long rong em i mekim, nogat. Tingim stiatok i stap long Aisaia 65:20 (NW ), em i tok: “Maski man bilong mekim sin em i gat 100 krismas, ol bai singaut long God i mas bagarapim em.” Wankain stiatok i stap long visen bilong Esekiel. (Ese. 9:5-7) Olsem na bikpela samting em yumi mas rispektim God Jehova, em Man bilong bipo bipo yet. (Dan. 7:9, 10, 13, 14) Sapos yumi mekim olsem, yumi no inap pret long stretim man i mekim rong, maski em i gat hamas krismas.—Gal. 6:1.

15. Yumi kisim wanem skul long aposel Pol long pasin bilong soim rispek long ol yangpela brata?

¹⁵ Olsem wanem long ol yangpela brata insait long kongrigesen? Yu gat wanem tingting long ol? Aposel Pol i tokim yangpela Timoti olsem: “No ken larim wanpela man i daunim yu bikos yu yangpela man, nogat. Tasol long ol bilipman, yu mas stap olsem gutpela piksa long pasin bilong yu long toktok, long wokabaut, long pasin laikim, long bilip, na long pasin i klin.” (1 Tim. 4:12) Taim Pol i raitim  ol dispela tok, ating Timoti i gat 32 o 33 krismas samting. Maski i olsem, Pol i givim ol bikpela wok long Timoti long mekim insait long kongrigesen. Dispela i helpim yumi long luksave olsem, yumi no ken skelim krismas bilong ol yangpela brata. Tingim, Bikpela bilong yumi, Jisas, i mekim wok autim tok long graun taim em i gat 30 krismas samting.

16, 17. (a) Ol elda i mas larim wanem samting i stiaim ol long luksave olsem brata i winim mak long kamap kongrigesen sevan o elda? (b) Olsem wanem pasin bilong ples o tingting bilong yumi yet long skelim man i no stret wantaim tok bilong Baibel?

¹⁶ Ating ol lain long ples bilong yumi i gat pasin bilong luk daun long ol yangpela man. Sapos olsem, ating ol elda long kongrigesen bai i gat 2-pela tingting long makim ol yangpela brata husat i winim mak long kamap kongrigesen sevan o elda. Olgeta elda i mas tingim olsem Baibel i no kolim stret krismas man i mas winim bilong kamap kongrigesen sevan o elda. (1 Tim. 3:1-10, 12, 13; Tai. 1:5-9) Sapos wanpela elda i bihainim pasin bilong ples long mekim ol wok insait long kongrigesen, orait em i no bihainim tok bilong Baibel. Ol elda i no ken larim tingting bilong ol yet o pasin bilong ples i stiaim ol long skelim ol yangpela brata, nogat. Ol i mas larim Tok Bilong God i stiaim ol.—2 Tim. 3:16, 17.

¹⁷ Pasin bilong bihainim tingting bilong ples inap pasim ol brata husat i winim mak long kamap elda o kongrigesen sevan. Long wanpela kantri, ol elda i givim ol bikpela wok long wanpela kongrigesen sevan. Ol elda i wanbel olsem em i winim mak em Baibel i kolim long kamap elda, tasol ol i no makim em long kamap elda. Sampela elda husat i gat bikpela krismas i holim tingting olsem dispela brata i yangpela tumas long kamap elda. Sori tru, yangpela brata i no kamap elda bikos ol i skelim krismas bilong em. Dispela ekspiriens na planti ripot i kamapim klia olsem planti brata long narapela narapela kantri i holim kain tingting olsem. Olsem na em i bikpela samting long yumi mas bihainim tok bilong Baibel, na yumi no ken bihainim pasin bilong ples o tingting bilong yumi yet long skelim krismas bilong man! Taim yumi mekim olsem, yumi bihainim tok bilong Jisas na yumi no skelim lukluk bilong man.

18, 19. Olsem wanem yumi inap bihainim pasin bilong Jehova long skelim ol man?

¹⁸ Yumi gat sin, tasol yumi inap bihainim pasin bilong Jehova na mekim wankain pasin long olgeta man. (Apo. 10:34, 35) Oltaim yumi mas wok strong long skelim man wankain olsem God i mekim, na yumi mas ritim Baibel long olgeta de. Taim yumi bihainim ol tok yumi ritim, dispela bai helpim yumi long bihainim tok bilong Jisas long lusim pasin bilong skelim lukluk bilong man.—Jon 7:24.

¹⁹ Klostu nau King bilong yumi, Jisas Krais, bai skelim olgeta manmeri. Tasol em bai no skelim ol long samting em i lukim long ai o long ol tok em i harim, nogat. Em bai skelim ol long stretpela pasin. (Ais. 11:3, 4) Dispela em gutpela samting tru!