STADI ATIKOL 32
Strongim Bilip Bilong Yu Long Krieta
“Pasin bilong bilip i olsem, . . . yu kliagut tru olsem samting yu bilip long en em i samting tru, maski yu no lukim long ai bilong yu.”—HIB. 11:1.
SINGSING 11 [15] Ol Samting i Preisim God
PRIVIU *
1. Ol i bin skulim yu long wanem samting long Krieta bilong yumi?
SAPOS yu kamap bikpela olsem wanpela Witnes Bilong Jehova, ating papamama i bin skulim yu long Jehova taim yu liklik yet. Ol i bin skulim yu olsem God em i Krieta, em i gat ol gutpela pasin na em i tingting pinis long mekim ol gutpela samting long ol manmeri.—Stt. 1:1; Apo. 17:24-27.
2. Sampela manmeri i gat wanem tingting long ol man i bilip long Krieta?
2 Planti manmeri i no bilip olsem God i stap, na ol i no bilip olsem em i Krieta. Ol i bilip olsem laip i kamap nating na isi isi em i kamapim ol liklik binatang samting na bihain em i kamapim ol bikpela samting i gat laip. Sampela bilong ol dispela manmeri em ol i gat bikpela save bilong graun. Na ol inap tok olsem saiens i pruvim olsem ol tok bilong Baibel i no stret, na tu, ol inap tok ol man husat i bilip long Krieta ol i no gat strong, na ol i no gat save.
3. Wai na em i bikpela samting long yumi yet i mas strongim bilip bilong yumi?
3 Olsem wanem? Yumi bai larim tingting em ol saveman i kamapim i mekim na nau yumi holim tupela tingting olsem Jehova em i Krieta? Bekim bilong dispela askim bai kamapim klia wai na yumi bilip long Jehova olsem em i Krieta. Olsem wanem? Wanpela i bin tokim yumi olsem God em i Krieta o yumi yet i bin stadi gut long Baibel bilong painimaut olsem tru tru em i Krieta? (1 Kor. 3:12-15) Maski yumi stap olsem wanpela Witnes Bilong Jehova inap longpela taim o nogat, yumi mas wok yet long strongim bilip bilong yumi. Taim yumi mekim olsem, yumi no inap larim “savetingting bilong ol man na tok giaman “ bilong ol man husat i paulim Tok Bilong God i giamanim yumi. (Kol. 2:8; Hib. 11:6) Bilong helpim yumi, dispela atikol bai stori long (1) wai na planti man i no bilip long Krieta, (2) hau yu ken kisim pasin bilong bilip long Jehova, em Krieta bilong yu, na (3) hau yu ken strongim dispela bilip bilong yu.
AS NA PLANTI I NO BILIP LONG KRIETA
4. Hibru 11:1 i tok wanem long bilip tru?
4 Sampela man i ting bilip i makim pasin bilong bilip long samting i no stap tru. Tasol Baibel i tok, kain bilip olsem em i no bilip tru. (Ritim Hibru 11:1.) Baibel i kamapim klia olsem yumi bilip long ol samting i stap tru, so maski yumi no inap lukim Jehova, Jisas, na Kingdom long heven, yumi gat evidens long pruvim olsem ol i stap tru. (Hib. 11:3) Wanpela Witnes em wanpela saientis em i tok: “Bilip bilong yumi i stret wantaim ol save bilong saiens.”
5. Wai na planti man i bilip olsem ol samting i gat laip i kamap nating na i no gat Krieta?
5 Yumi inap askim olsem, ‘Sapos i gat planti evidens i soim olsem i gat Krieta, wai na planti man i bilip olsem ol samting i gat laip i kamap nating na God i no wokim?’ Sampela i no laik skelim gut ol evidens na save long dispela samting. Robert, nau em i wanpela Witnes Bilong Jehova, em i tok: “Long skul ol i no lainim mipela long Krieta, olsem na mi ting olsem dispela em stori nating. I go inap long taim mi gat 20 krismas samting, mi toktok wantaim ol Witnes Bilong Jehova na long dispela rot mi kisim save long ol tok Baibel i mekim olsem i gat Krieta i wokim olgeta samting.” *—Lukim blok “ Toksave i Go Long Ol Papamama.”
6. Wai na sampela i sakim dispela bilip olsem i gat Krieta?
6 Sampela i no bilip long Krieta bikos ol i tok ol i ken bilip tasol long samting ol inap lukim long ai. Tasol ol i bilip long sampela samting em ol i no inap lukim, kain olsem graviti, em samting i stap tru. Kain bilip em Baibel i stori long en i makim pasin bilong bilip long “samting tru, maski yu no lukim long ai bilong yu.” (Hib. 11:1) Yumi mas lusim haptaim na strong long stadi long ol evidens bilong pruvim bilip bilong yumi, na planti manmeri i no gat laik long mekim olsem. Man husat i no lusim haptaim long skelim gut ol evidens, em inap kisim tingting olsem i no gat God.
7. Yu ting olgeta man i gat bikpela save i bilip olsem i no gat Krieta? Stori long dispela.
7 Sampela saientis i stadi gut long ol evidens na ol i bilip tru olsem God i wokim olgeta samting. * Olsem Robert, em yumi stori pinis long em, sampela i ting olsem i no gat Krieta bikos long yunivesiti ol i no bin lain long dispela samting. Tasol planti saientis i bin kisim save long Jehova na ol i laikim em. Olsem ol dispela saientis, yumi olgeta i mas strongim bilip bilong yumi long God, maski yumi bin go long bikpela skul o nogat. Em samting yumi wan wan yet i mas mekim na ol narapela i no inap mekim bilong yumi.
STRONGIM BILIP BILONG YU LONG KRIETA
8-9. (a) Nau bai yumi skelim wanem askim? (b) Olsem wanem pasin bilong skelim gut ol samting God i wokim inap helpim yu?
8 Olsem wanem yu ken strongim bilip bilong yu long Krieta? Yumi ken skelim 4-pela rot bilong mekim olsem.
9 Kisim save long ol samting God i wokim. Yu ken strongim bilip bilong yu long Krieta long rot bilong skelim gut ol animal, ol diwai na plaua samting, na ol sta. (Sng. 19:1; Ais. 40:26) Taim yu lusim bikpela haptaim long skelim gut ol dispela samting, dispela bai helpim yu long bilip tru olsem Jehova em i Krieta. Ol pablikesen bilong yumi i gat ol atikol i stori gut long ol samting God i wokim. No ken sem long ritim ol dispela atikol sapos sampela taim yu pilim olsem yu no kliagut tumas long ol tok bilong en. Ritim na bai yu ken kisim sampela save moa. Na go long websait bilong yumi long jw.org, na lukim gen ol vidio i stori long ol samting God i wokim em ol vidio i bin kamap long ol kibung long ol yia i go pinis.
10. Stori long wanpela eksampel i soim olsem i gat Krieta i stap. (Rom 1:20)
10 Taim yu skelim ol samting long graun na long ples antap, traim long putim tingting long ol evidens i soim olsem i gat Krieta i stap. (Ritim Rom 1:20.) Eksampel, ating yu save pinis olsem san i save kamapim lait, na tu, em i save kamapim hat we i sapotim ol samting i gat laip. Tasol em i save kamapim tu narakain hat ol i kolim ultraviolet rays we inap nogutim yumi. Yumi ol man i mas gat samting bilong lukautim yumi na bai dispela strong bilong san i no ken bagarapim yumi. Na yes, yumi gat! Hau? Graun bilong yumi i gat karamap bilong en—em wanpela kain ges ol i kolim oson na em inap pasim dispela strongpela hat bilong san long nogutim yumi. Taim ultraviolet rays bilong san i go strong moa dispela ges oson tu i save go planti moa. Na ating yu bai wanbel olsem i gat wanpela Man i kontrolim ol kain samting olsem, na em Man i gat pasin laikim na bikpela save, em Krieta bilong yumi.
11. Yu inap painim we ol tok bilong strongim bilip bilong yu long Krieta? (Lukim blok “ Sampela Tok Bilong Strongim Bilip.”)
11 Yu inap kisim planti tok bilong strongim bilip olsem i gat Krieta long rot bilong skelim ol tok i stap long Watch Tower Publications Index na long mekim risets long jw.org. Yu ken stat long rot bilong skelim ol atikol na ol vidio long hap “Yu Ting Wanpela i Bin Wokim?” Em ol sotpela atikol na vidio i stori gut long ol animal na ol narapela samting God i wokim. Na tu, ol i kamapim ol eksampel we ol saientis i traim long kopim wei bilong ol dispela animal long wokim ol masin samting.
12. Taim yumi stadi long Baibel, wanem sampela samting yumi mas tingim gut?
12 Stadi long Baibel. Dispela saientis em yumi stori pinis long em, pastaim em i bin gat tingting olsem i no gat Krieta. Tasol bihain, em i bilip long Krieta. Em i tok: “Ol stadi bilong saiens tasol i no mekim na mi bilip long God, nogat. Mi stadi gut tru long ol tok bilong Baibel na dispela tu i as bilong bilip bilong mi.” Ating yu bin kisim pinis ol tok Baibel i skulim ol man long en. Maski i olsem, bilong bilip tru long Krieta bilong yumi, yu mas wok yet long stadi long Tok Bilong God. (Jos. 1:8; Sng. 119:97) Eksampel, skelim gut ol tok Baibel i mekim long ol samting i bin kamap bipo tru. Putim tingting i go long hau ol tok profet i wok long kamap tru na hau ol tok bilong Baibel i no pait wantaim. Taim yu mekim olsem, dispela bai strongim bilip bilong yu olsem Krieta i gat pasin laikim i bin wokim yumi na em i bin kamapim tu ol tok bilong Baibel. *—2 Tim. 3:14; 2 Pita 1:21.
13. Wanem wanpela eksampel i soim savetingting i stap long Tok Bilong God?
13 Taim yu stadi long Tok Bilong God, tingim hau tok bilong en inap helpim yu. Olsem, inap planti yia i go pinis Baibel i bin givim tok lukaut olsem pasin bilong laikim tumas mani inap nogutim man na i save “givim pen” long ol man. (1 Tim. 6:9, 10; Prov. 28:20; Mat. 6:24) Yu ting dispela tok lukaut i stret long nau? Buk The Narcissism Epidemic i tok: “Ol man husat i laikim tumas mani kago ol i no save stap amamas na planti taim ol i bel hevi tasol. Ol man husat i gat laik tru long kisim planti mani ol i save kisim sik bilong tingting na ol sik bilong bodi.” Olsem na Baibel i tok lukaut olsem yumi no ken kisim pasin bilong laikim tumas mani! Yu inap tingim ol narapela stiatok bilong Baibel we inap helpim yumi long nau? Taim yumi laikim tru ol tok bilong Baibel, yumi bai amamas long kisim savetingting i kam long Krieta bilong yumi husat i gat pasin laikim. (Jems 1:5) Long dispela rot, yumi bai stap amamas.—Ais. 48:17, 18.
14. Taim yu stadi long Baibel bai yu kisim wanem save long Jehova?
14 Taim yu stadi long Baibel, tingim olsem yu laik save gut moa long Jehova. (Jon 17:3) Taim yu stadi long Baibel, ating yu luksave long wanpela pasin bilong God, em wanpela pasin bilong em we i stap ples klia long ol samting em i wokim. Taim yumi kisim save long ol pasin bilong Jehova, dispela i helpim yumi long bilip tru olsem Jehova em i wanpela man i stap tru. (Kis. 34:6, 7; Sng. 145:8, 9) Taim yu kisim planti save moa long Jehova, yu bai bilip tru long em, yu bai laikim em moa yet, na pasin bilong yu long pas gut wantaim em bai kamap strong moa.
15. Olsem wanem pasin bilong autim bilip bilong yu inap helpim yu?
15 Tokaut long ol narapela olsem yu bilip long God. Taim yu mekim olsem, bilip bilong yu bai kamap strong. Tasol yu bai mekim wanem sapos wanpela yu autim tok long em i tok i no gat God na yu no save long wanem bekim bai yu givim? Traim long painim bekim bilong Baibel long ol pablikesen bilong yumi na stori wantaim dispela man o meri long en. (1 Pita 3:15) Na tu, yu ken askim wanpela Witnes i gat bikpela ekspiriens long helpim yu. Maski dispela man o meri i bilipim ol tok bilong Baibel yu mekim o nogat, bikpela samting moa em olsem dispela bai helpim yu taim yu mekim risets. Bilip bilong yu bai kamap strong moa. Dispela bai mekim na yu no inap bilip long ol tok giaman em ol saveman i mekim olsem i no gat Krieta.
HOLIMPAS STRONGPELA BILIP!
16. Wanem samting inap kamap sapos yumi no mekim ol samting bilong strongim bilip bilong yumi?
16 Maski yumi mekim wok bilong Jehova inap planti yia pinis, yumi mas wok yet long mekim ol samting bilong strongim bilip bilong yumi long em. Wai na yumi mas mekim olsem? Bikos sapos yumi no was gut bilip bilong yumi inap kamap slek. Tingim, bilip i makim pasin bilong bilip long ol samting i stap tru em yumi no inap lukim long ai. Samting yumi no lukim long ai, em isi long yumi inap lusim tingting hariap long en. Olsem na Pol i tok long pasin bilong i no bilip olsem “dispela sin i save pasim yumi.” (Hib. 12:1) Yumi ken mekim wanem na bai yumi ken abrusim dispela trap?—2 Tes. 1:3.
17. Yumi mas kisim wanem helpim bilong holimpas bilip?
17 Namba 1 samting, beten askim Jehova long holi spirit bilong em, na mekim olsem planti taim. Bilong wanem? Bikos bilip em wanpela pasin bilong holi spirit. (Gal. 5:22, 23) Yumi no inap kisim na holimpas strongpela bilip long Krieta bilong yumi sapos yumi no kisim helpim long holi spirit. Sapos yumi wok long askim Jehova long holi spirit bilong em, orait em bai givim long yumi. (Luk 11:13) Yumi ken beten olsem: “Yu mas mekim bilip bilong mipela i kamap bikpela moa.”—Luk 17:5.
18. Olsem Buk Song 1:2, 3 i kamapim, yumi inap kisim wanem gutpela presen long nau?
18 Namba 2 samting, stadi oltaim long Tok Bilong God. (Ritim Buk Song 1:2, 3.) Taim ol i bin raitim dispela hap bilong Buk Song, sampela Israel tasol i gat kopi bilong olgeta hap bilong Lo Bilong God. Tasol ol king na ol pris i gat ol kopi bilong Lo, na long olgeta 7-pela yia ol i save stretim rot long “ol man, ol meri, ol pikinini,” na ol man bilong narapela ples i stap wantaim ol long kam bung na bai ol i ken harim ol i ritim Lo Bilong God. (Lo 31:10-12) Long taim bilong Jisas, liklik lain tasol i gat ol skrol bilong Ol Rait Holi na planti bilong ol dispela skrol i save stap long ol sinagog. Tasol long nau, planti manmeri inap ritim Tok Bilong God. Dispela em gutpela samting tru. So yumi ken mekim wanem bilong soim olsem dispela em gutpela presen tru?
19. Yumi mas mekim wanem bilong holimpas strongpela bilip?
19 Yumi ken soim olsem yumi amamas long gutpela presen yumi gat em Tok Bilong God long rot bilong ritim long olgeta de. Yumi mas makim taim bilong ritim Baibel na mekim pesenel stadi, na yumi no ken mekim tasol long taim yumi pilim olsem yumi gat taim bilong mekim. Taim yumi mekim pesenel stadi bilong yumi long olgeta taim, dispela inap helpim yumi long holimpas strongpela bilip.
20. Yumi mas tingting strong long mekim wanem?
20 Yumi no wankain olsem “ol man i gat savetingting na ol klevaman” bilong dispela graun, nogat, yumi gat bilip em Tok Bilong God i as bilong en. (Mat. 11:25, 26) Yumi stadi long Tok Bilong God olsem na yumi save long risen na ol pasin nogut bilong dispela graun i wok long i go nogut moa, na yumi save long ol samting Jehova bai mekim bilong stretim ol dispela hevi. So yumi mas tingting strong long strongim bilip bilong yumi na helpim planti manmeri moa long bilip long Krieta bilong yumi. (1 Tim. 2:3, 4) Na yumi luk fowed long taim we olgeta manmeri i stap long graun bai mekim wankain tok olsem tok i stap long Revelesen 4:11, em i tok: “Jehova, yu God bilong mipela, i stret tru long yu kisim glori . . . long wanem, yu bin wokim olgeta samting. Na long laik bilong yu yet yu bin wokim ol na ol i stap.”
SINGSING 2 [1] Jehova Em Nem Bilong Yu
^ par. 5 Baibel i tokaut klia olsem Jehova God em i Krieta. Tasol planti man i no bilip long dispela. Ol i bilip olsem laip i kamap nating. Ol tok bilong ol i no inap mekim yumi kisim tupela tingting sapos yumi strongim pasin bilong yumi long bilip long God na long Baibel. Dispela atikol bai stori long hau yumi ken mekim olsem.
^ par. 5 Long ol pablik skul bilong gavman, ol i no save skulim ol sumatin olsem God i wokim ol samting. Sampela tisa i tok olsem sapos ol i mekim olsem, dispela bai i no stret long olgeta sumatin bikos wan wan sumatin i stap fri long makim wanem lotu ol i laik go long en.
^ par. 7 Tok bilong winim 60 saveman, em ol saientis tu i insait long en, em ol i bilip olsem i gat Krieta i stap long Watch Tower Publications Index. Aninit long het tok “Science,” painim dispela tok “scientists expressing belief in creation.” Sampela bilong ol dispela tok i stap tu long Research Guide for Jehovah’s Witnesses. Aninit long het tok “Science and Technology,” painim dispela tok “Intaviu’ (Ol atikol siris long Kirap!).”
^ par. 12 Eksampel, lukim atikol “Are Science and the Bible Compatible?” long Awake! bilong Februeri 2011 na atikol “Ol Samting Jehova i Tok Bai Kamap Ol i Save Kamap Tru” long Wastaua bilong Janueri 1, 2008.
