1. Wanem traim i painim Josep, na em i mekim wanem?

 PIKININI man bilong Jekop, em Josep, i bungim wanpela bikpela traim. Wanpela meri i tokim em: “Kam slip wantaim mi!” Dispela meri em meri bilong bosman bilong em, Potifar. Josep i sakim em. Wanpela long nau inap tingting olsem, ‘Wai na Josep i sakim dispela traim?’ Potifar i no bin stap long haus long dispela taim. Na Josep em wanpela sleiv long haus bilong Potifar, so dispela meri inap mekim laip bilong Josep i hatwok moa sapos Josep i tok nogat long slip wantaim em. Tasol Josep i wok strong yet long sakim em maski meri i putim presa long slip wantaim em. Bilong wanem? Josep i tok: “Wai bai mi mekim dispela pasin nogut tru na mekim sin long ai bilong God?”​—Stt. 39:7-12.

2. Hau Josep i save olsem pasin adaltri em sin long ai bilong God?

² Olsem wanem Josep i save olsem God bilong em bai tingim pasin adaltri olsem “pasin nogut tru”? Inap 200 yia bihain long dispela traim i bin painim Josep, lain Israel i bin kisim Lo Bilong Moses. Na wanpela bilong ol dispela Lo i tok: “Yupela i no ken mekim pasin adaltri.” (Kis. 20:14) Tasol Josep i save gut long Jehova, olsem na em i save olsem Em i no inap tru long orait long pasin adaltri. Olsem, Josep i save olsem taim Jehova i kamapim marit, em laik bilong Em long wanpela man na wanpela meri i marit. Na ating Josep i bin harim stori olsem inap 2-pela taim Jehova i bin stiaim ol samting bilong lukautim bubu meri bilong em Sara na bai em i stap gut long man bilong em. Na tu, God i bin stiaim ol samting i kamap bilong lukautim meri bilong Aisak, em Rebeka. (Stt. 2:24; 12:14-20; 20:2-7; 26:6-11) Taim Josep i tingim tingim ol dispela samting, em i luksave long wanem samting i stret na wanem samting i no stret long ai bilong God. Josep i laikim God bilong em, olsem na em i laikim ol stretpela lo bilong Jehova na em i tingting strong long bihainim ol dispela lo.

3. Yumi bai stori long wanem ol samting?

³ Yu save laikim stretpela pasin? Tru tumas, yu laikim stretpela  pasin. Tasol yumi no gutpela olgeta, na sapos yumi no was gut, yumi inap bihainim tingting bilong ol man bilong dispela graun long stretpela pasin. (Ais. 5:20; Rom 12:2) So yumi bai stori long stretpela pasin i makim wanem samting na yumi kisim wanem helpim taim yumi laikim dispela pasin. Na tu, bai yumi stori long 3-pela rot yumi inap bihainim bilong helpim yumi long strongim pasin bilong laikim ol stretpela lo bilong Jehova.

4. Planti man i holim wanem tingting kranki long man i bihainim stretpela pasin?

⁴ Ol man i save tingim wanpela husat i save bihainim stretpela pasin olsem man i gat pasin antap, em i save skelim ol narapela, na em i ting pasin bilong em i stretpela olgeta. Tasol God i no save laikim ol dispela kain pasin. Taim Jisas i stap long graun, em i tok strong long ol hetman bilong lotu long taim bilong em bikos ol i putim ol lo bilong ol yet long wanem samting i stret na wanem samting i no stret. (Ekl. 7:16; Luk 16:15) Man i bihainim ol stretpela pasin long ai bilong Jehova, em i no save ting pasin bilong em i stret olgeta winim ol narapela, nogat.

5. Olsem Baibel i kamapim, stretpela pasin i makim wanem samting? Stori long sampela eksampel.

⁵ Stretpela pasin em wanpela naispela pasin. Taim yumi mekim stretpela pasin, dispela i makim olsem yumi mekim samting i stret long ai bilong God Jehova. Long Baibel, ol tok ol i yusim bilong makim “stretpela pasin” i soim olsem man i mas bihainim ol lo i nambawan tru long laip bilong em—em ol lo bilong Jehova. Olsem, Jehova i putim lo olsem ol bisnisman i mas “skelim stret hevi bilong ol samting.” (Lo 25:15) Long tok Hibru dispela tok “stret” inap makim tu “stretpela.” Olsem na wanpela Kristen husat i laik bihainim stretpela pasin long ai bilong God, em i mas mekim pasin i stret o onest pasin long olgeta wok bisnis bilong em. Na tu, man i bihainim stretpela pasin em i no save amamas taim em i lukim ol man i mekim pasin i no stret long ol narapela. Na sapos wanpela stretpela man i laik mekim “olgeta samting [bilong] amamasim” Jehova, orait em bai wok strong long kisim tingting bilong Jehova long ol disisen em i mekim.​—Kol. 1:10.

6. Wai na yumi ken trastim ol stretpela lo bilong Jehova long wanem samting i stret na wanem samting i no stret? (Aisaia 55:8, 9)

⁶ Baibel i tok Jehova em i As bilong stretpela pasin. Olsem na Baibel i kolim em olsem “man i gat stretpela pasin.” (Jer. 50:7) Olsem Man Bilong Wokim yumi, Jehova wanpela tasol inap putim ol lo long wanem samting i stret na wanem samting i no stret. Jehova em i gutpela olgeta na tingting bilong em long wanem samting i stret na wanem samting i no stret i antap moa winim tingting bilong yumi, long wanem, sin i stap long yumi na planti taim dispela i save stiaim ol tingting bilong yumi. (Prov. 14:12; ritim Aisaia 55:8, 9.) Maski i olsem, God i wokim yumi olsem em yet, olsem na yumi inap bihainim ol stretpela lo bilong em long laip bilong yumi. (Stt. 1:27) Na yumi laik tru long mekim olsem. Yumi laikim Papa bilong yumi, na dispela i kirapim yumi long wok strong long bihainim pasin bilong em.​—Efe. 5:1.

7. Wai na yumi mas bihainim ol lo i stap pinis em olgeta man i save long en? Stori long tok piksa.

⁷ Yumi kisim helpim taim yumi bihainim ol stretpela lo bilong Jehova long wanem samting i stret na wanem samting i no stret. Wai na em i bikpela samting long mekim olsem? Wanem samting inap kamap sapos olgeta wan wan benk i kamapim ol lo bilong ol yet long skelim strong bilong mani, o sapos wan wan konstraksen kampani i kamapim ol lo bilong ol yet long mesarim ol samting? Bikpela hevi tru bai kamap. Na sapos ol wokman bilong haus sik i no bihainim ol lo i stap pinis long hau long lukautim gut ol sikman, ating sampela sikman inap dai. Tru tumas, taim yumi bihainim ol lo i stap pinis em olgeta man i save long en, dispela bai lukautim yumi. Olsem tasol, ol lo bilong God long wanem samting i stret na wanem samting i no stret i save lukautim yumi.

8. Ol man i amamas long bihainim stretpela pasin, ol bai kisim wanem ol blesing?

 ⁸ Jehova i save blesim ol lain em ol i wok strong long bihainim ol lo bilong em. Em i tok promis olsem: “Ol stretpela man bai kisim graun olgeta, na ol bai stap oltaim long en.” (Sng. 37:29) Yu inap piksaim long tingting ol man i stap wanbel wantaim, stap bel isi, na stap amamas tru taim olgeta i bihainim ol lo bilong Jehova? Jehova i laik bai yu amamas long kain gutpela laip olsem. Tru tumas, yumi wan wan i gat ol gutpela risen long amamas long bihainim stretpela pasin! Olsem wanem yumi ken strongim pasin bilong yumi long laikim stretpela pasin? Yumi ken skelim 3-pela rot bilong mekim olsem.

9. Bilong laikim stretpela pasin, yumi mas mekim wanem?

⁹ Namba 1: Laikim Man i putim ol lo. Bilong laikim stretpela pasin, yumi mas strongim pasin bilong yumi long laikim Jehova, em Man i putim ol lo long wanem pasin i stret na wanem pasin i no stret. Taim yumi laikim Jehova moa yet, yumi bai laik tru long bihainim ol stretpela lo bilong em long laip bilong yumi. Tingim dispela: Sapos Adam na Iv i bin laikim tru Jehova, ol bai i no inap tru long sakim stretpela lo bilong em.​—Stt. 3:1-6, 16-19.

10. Abraham i mekim wanem samting bilong kliagut long tingting bilong Jehova?

¹⁰ Yumi no laik mekim wankain popaia em Adam na Iv i bin mekim. Yumi ken abrusim kain popapia taim yumi wok yet long kisim save long Jehova, amamas long ol pasin bilong em, na traim long kliagut long tingting bilong em. Taim yumi mekim olsem, yumi bai strongim moa yet pasin bilong yumi long laikim Jehova. Tingim Abraham. Em i laikim tru Jehova. Maski i hatwok long em i kliagut long ol disisen bilong Jehova, em i no sakim tok bilong Em, nogat. Em i laik kisim sampela save moa long Jehova. Olsem, taim em i save long disisen Jehova i mekim long bagarapim taun Sodom na Gomora, pastaim em i pret olsem nogut “Jas bilong graun olgeta” i bagarapim ol stretpela man wantaim ol man nogut. Abraham i no ting Jehova inap mekim dispela pasin, so long pasin daun em i givim sampela askim long Jehova. Jehova i no les kwik long em na Em i bekim ol askim bilong em. Bihain, Abraham i luksave olsem Jehova i save skelim bel bilong olgeta man na Em i no save panisim ol man i no gat asua wantaim ol man i gat asua.​—Stt. 18:20-32.

11. Abraham i bin mekim wanem samting bilong soim olsem em i laikim na trastim Jehova?

¹¹ Dispela toktok i kamap namel long Abraham na Jehova long samting bai painim taun Sodom na Gomora i mekim sampela samting long Abraham. Em i strongim tru pasin bilong Abraham long laikim na rispektim tru Papa bilong em winim long pastaim. Planti yia bihain, wanpela samting i kamap na dispela i traim tru pasin bilong Abraham long trastim Jehova. Jehova i askim Abraham long givim pikinini bilong em Aisak olsem ofa. Tasol nau Abraham i save gut long God bilong em, olsem na em i no givim ol askim long em. Abraham i mekim ol samting Jehova i tokim em long mekim. Maski i olsem, yumi ken tingim bel hevi em i pilim taim em i wok long redim ol samting bilong givim Aisak olsem ofa! Ating Abraham i tingim tingim ol samting em i kisim save long en long Jehova. Em i save olsem Jehova bai i no inap tru long mekim pasin i no stret o pasin nogut. Aposel Pol i tok, Abraham i bilip olsem Jehova inap kirapim bek pikinini man bilong em Aisak. (Hib. 11:17-19) Tingim, Jehova i bin mekim tok promis olsem Aisak bai kamap papa bilong bikpela lain manmeri, na long dispela taim Jehova i tokim Abraham long givim Aisak olsem ofa, Aisak i no bin gat ol pikinini yet. Abraham i laikim Jehova, olsem na em i bilip olsem Papa bilong em bai mekim stretpela pasin. Yes, bilip bilong Abraham i kirapim em long bihainim tok maski i hatwok long mekim olsem.​—Stt. 22:1-12.

12. Hau yumi ken bihainim eksampel bilong Abraham? (Buk Song 73:28)

 ¹² Hau yumi ken bihainim eksampel bilong Abraham? Wankain olsem Abraham, yumi mas wok yet long kisim save long Jehova. Long dispela rot, yumi bai go klostu moa long Em na strongim pasin bilong yumi long laikim Em. (Ritim Buk Song 73:28.) Yumi bai lainim gut maus bilong bel bilong yumi long bihainim tingting bilong God. (Hib. 5:14) Na maski sapos wanpela i traim long pulim yumi long mekim pasin i no stret, yumi bai sakim em. Yumi bai no laik tru long mekim wanpela samting bilong mekim Papa bilong yumi i bel hevi na bagarapim pasin pren bilong yumi wantaim Em. Tasol yumi ken mekim wanem narapela samting bilong soim olsem yumi laikim stretpela pasin?

13. Olsem wanem yumi ken wok strong long bihainim stretpela pasin? (Provep 15:9)

¹³ Namba 2: Wok yet long kisim pasin bilong laikim stretpela pasin long olgeta de. Bilong strongim ol masol bilong bodi, yumi mas givim bel long eksasais long olgeta de. Olsem tasol, bilong kisim pasin bilong laikim ol stretpela lo bilong Jehova, yumi mas wok strong long bihainim ol dispela lo long olgeta de. Dispela em samting yu inap mekim long olgeta de. Jehova i save long skel bilong yumi wan wan, na em i no ekspektim yumi long mekim ol samting em yumi no inap long mekim. (Sng. 103:14) Em i tokim yumi olsem “em i save laikim man i save wok strong long bihainim stretpela pasin.” (Ritim Provep 15:9.) Sapos yumi putim wanpela mak long mekim wok bilong Jehova, orait oltaim yumi mas wok strong long winim dispela mak. Olsem tasol, oltaim yumi mas mekim ol samting bilong wok strong long bihainim stretpela pasin. Na Jehova bai i no les kwik long helpim yumi, em bai wok yet long strongim yumi long kisim pasin bilong laikim stretpela pasin.​—Sng. 84:5, 7.

14. “Siot kapa” bilong “stretpela pasin” i makim wanem samting, na bilong wanem yumi mas pasim dispela siot kapa?

¹⁴ Jehova i kirapim yumi long tingim olsem taim yumi bihainim ol stretpela lo bilong em, dispela i no givim hevi long yumi. (1 Jon 5:3) Ol dispela lo i lukautim yumi long olgeta wan wan de. Tingim ol klos pait bilong bilip em aposel Pol i stori long en. (Efe. 6:14-18) Wanem hap bilong klos pait i lukautim bel bilong soldia? Em  “siot kapa” bilong “stretpela pasin,” we i makim ol stretpela lo bilong Jehova. Wankain olsem siot kapa i save lukautim bel bilong soldia, ol stretpela lo bilong Jehova i ken lukautim bel na tingting bilong yumi, em ol tingting tru i stap long bel bilong yumi. Olsem na em i bikpela samting tru long yumi mas pasim tu siot kapa bilong stretpela pasin wantaim olgeta narapela klos pait bilong bilip!​—Prov. 4:23.

15. Olsem wanem yu ken pasim siot kapa bilong stretpela pasin?

¹⁵ Olsem wanem yu ken pasim siot kapa bilong stretpela pasin? Yu ken mekim olsem taim yu larim ol lo bilong God i stiaim ol disisen yu mekim long olgeta de. Taim yu laik wokim disisen long ol samting yu bai stori long en, ol musik yu bai harim, ol muvi yu bai watsim, o wanem ol buk yu laik ritim, pastaim askim yu yet olsem: ‘Mi bai putim wanem ol samting i go daun long bel na tingting bilong mi? Jehova bai orait long ol dispela samting? O ol dispela samting i sapotim pasin pamuk, pasin bilong pait, pasin gridi, na pasin bilong tingim mi yet—em ol pasin i no stret long ai bilong Jehova?’ (Fili. 4:8) Sapos ol disisen yu mekim i stret wantaim laik bilong Jehova, orait yu wok long larim ol stretpela lo bilong em i lukautim bel na tingting bilong yu.

16-17. Olsem wanem tok bilong Aisaia 48:18 i helpim yumi long save olsem yumi inap bihainim ol lo bilong Jehova inap oltaim oltaim?

¹⁶ Olsem wanem? Yu save tingting planti olsem nogut yu no inap bihainim yet ol stretpela lo bilong Jehova long olgeta wan wan de insait long ol yia i kam? Tingim wanpela tok piksa Jehova i mekim, em i stap long Aisaia 48:18. (Ritim.) Jehova i tok promis olsem stretpela pasin bilong yumi bai kamap “olsem ol weiv bilong solwara.” Piksaim olsem yu sanap long nambis bilong biksolwara na yu lukim ol weiv i bruk long nambis, wanpela weiv i kam na bihain narapela weiv i kam gen. Yu bai kisim bel isi taim yu lukim dispela samting, a? Tasol yu ting yu bai wari olsem wanpela taim ol dispela weiv bai stop long kam? Nogat! Yu save olsem inap planti tausen yia ol weiv i wok long bruk long dispela nambis, na ol bai wok yet long mekim olsem i go i go.

¹⁷ Stretpela pasin bilong yu i ken kamap olsem ol weiv bilong solwara! Olsem wanem dispela samting i ken kamap? Taim yu gat wanpela disisen long mekim, pastaim yu mas tingim samting em Jehova i laik bai yu mas mekim. Na yu mas mekim dispela samting. Maski yu pilim hatwok tru long mekim dispela disisen, oltaim gutpela Papa bilong yu bai stap wantaim yu na strongim yu, na em bai helpim yu long bihainim ol stretpela lo bilong Em long olgeta wan wan de.​—Ais. 40:29-31.

18. Wai na yumi mas abrusim pasin bilong skelim ol narapela long ol lo em yumi yet i bin putim?

¹⁸ Namba 3: Larim Jehova i mekim wok jas. Yumi laik tru long bihainim ol stretpela pasin bilong Jehova, tasol long wankain taim yumi mas abrusim pasin bilong skelim ol arapela olsem jas na pilim olsem pasin bilong yumi i stret olgeta. Yumi mas sakim pasin bilong skelim ol narapela long ol lo em yumi yet i bin putim na holim tingting olsem yumi winim ol tru. Yumi laik tingim olsem Jehova em i “Jas bilong graun olgeta.” (Stt. 18:25) Jehova i no givim yumi wok bilong skelim ol narapela, nogat. Jisas i tokim yumi olsem: “Yupela i mas lusim pasin bilong skelim ol arapela olsem jas, nogut ol i skelim yupela tu.”​—Mat. 7:1. *

19. Hau Josep i soim olsem em i trastim wok jas bilong Jehova?

¹⁹ Yumi ken tingim gen eksampel bilong stretpela man Josep. Em i abrusim pasin bilong skelim ol narapela, em i no skelim tu ol man husat i mekim nogut long em. Ol brata tru bilong em i paitim em, salim em olsem wokboi nating, na mekim  ol tok i kirapim papa bilong ol long ting olsem Josep i dai. Planti yia bihain, Josep i bung gen wantaim famili bilong em. Nau Josep i gat bikpela strong na namba na em inap mekim hatpela pasin long ol brata bilong em na bekim rong ol i bin mekim long em. Ol brata bilong Josep i pret long dispela samting maski ol i bel hevi tru long pasin ol i bin mekim. Tasol Josep i tokim ol: “Yupela i no ken pret. Mi no God na mi bai skelim yupela.” (Stat 37:18-20, 27, 28, 31-35; 50:15-21) Josep i mekim pasin daun taim em i larim Jehova i skelim ol brata bilong em.

20-21. Olsem wanem yumi inap abrusim pasin bilong ting olsem yumi stretpela olgeta?

²⁰ Wankain olsem Josep, yumi larim Jehova i skelim ol narapela. Olsem, yumi no ken ting olsem yumi save long wanem samting i kirapim ol bratasista long mekim samting ol i mekim. Yumi no inap save long tingting i stap long bel bilong wanpela, “Jehova [wanpela tasol] i save skelim gut astingting bilong em.” (Prov. 16:2) Em i save laikim olgeta kain manmeri, em ol manmeri bilong kain kain bekgraun na kalsa. Na Jehova i kirapim yumi long “mekim pasin laikim long bel bilong [yumi] i go bikpela moa.” (2 Kor. 6:13) Yumi laik mekim pasin laikim long olgeta bratasista bilong yumi, na yumi no laik skelim ol.

²¹ Na tu, yumi no laik skelim ol lain em ol i no wanbilip bilong yumi. (1 Tim. 2:3, 4) Yu ting yu bai skelim wanpela wanblut husat i no Witnes na tok olsem, “Dispela man bai no inap tru long kam insait long tok i tru”? Nogat, kain tok i soim olsem yu gat pasin antap na yu ting yu stretpela olgeta. Jehova i larim rot i op yet long “olgeta man long olgeta hap” long tanim bel. (Apo. 17:30) Oltaim yu mas tingim dispela, sapos yu ting pasin bilong yu i stretpela olgeta winim ol narapela, orait yu wok long mekim pasin i no stret.

22. Wai na yu tingting strong long laikim stretpela pasin?

²² Tru tumas, pasin bilong yumi long laikim ol stretpela lo bilong Jehova i ken mekim yumi stap amamas na strongim ol narapela; dispela bai helpim ol long pas gut moa wantaim yumi na pas gut moa wantaim God bilong yumi. Yes, oltaim yumi mas “nek drai na hangre long stretpela pasin.” (Mat. 5:6) Yu ken save tru olsem Jehova i lukim ol hatwok bilong yu na oltaim em i amamas long yu wok strong long bihainim stretpela pasin. Ol man bilong dispela graun i wok long insait tru long mekim ol pasin i no stret, tasol yu ken stap bel isi! Oltaim yu mas tingim olsem “Jehova i save laikim ol stretpela manmeri.”​—Sng. 146:8.