1. Olsem wanem ol manmeri i stap gut long Jehova inap pas gut wantaim em?

OL LAIN i insait long famili bilong Jehova, em Jisas, “em i fesbon bilong olgeta samting God i bin wokim,” na planti milion ensel. (Kol. 1:15; Sng. 103:20) Taim Jisas i stap long graun, em i soim olsem ol man i stap gut long God ol inap kolim Jehova olsem Papa bilong ol. Taim Jisas i toktok wantaim ol disaipel bilong em, em i kolim Jehova olsem “Papa bilong mi na Papa bilong yupela.” (Jon 20:17) Na taim yumi dediketim yumi yet long Jehova na kisim baptais, yumi insait long wanpela famili i gat pasin laikim, em ol bratasista bilong yumi.​—Mak 10:29, 30.

2. Bai yumi skelim wanem samting long dispela atikol?

² Sampela i hatwok long tingim Jehova olsem wanpela Papa i gat pasin laikim. Ol narapela i no save hau ol inap soim pasin laikim long ol bratasista bilong ol. Long dispela atikol, yumi bai skelim hau Jisas i helpim yumi long tingim Jehova olsem wanpela Papa i gat pasin laikim, em yumi inap go klostu long em. Na tu, yumi bai stori long ol rot we yumi inap bihainim pasin bilong Jehova na mekim pasin laikim long ol bratasista bilong yumi.

3. Olsem wanem beten Jisas i skulim yumi long en, inap helpim yumi long i go klostu moa long Jehova?

³ Jehova em Papa i gat pasin laikim. Jisas i laik yumi gat wankain tingting long Jehova olsem em i gat—olsem em Papa i gat pasin laikim na isi long yumi inap toktok long em, na i no olsem man i gat namba na i stap longwe long yumi. Dispela i stap ples klia long samting Jisas i skulim ol disaipel bilong em long beten long en. Em i kirapim beten bilong em wantaim dispela tok: “Papa bilong mipela.” (Mat. 6:9) Jisas inap kirapim yumi long kolim Jehova olsem “God i Gat Olgeta Strong,” “Krieta,” o “King bilong oltaim oltaim”—em ol tok i stret na em ol biknem bilong God em  Baibel i kolim. (Stt. 49:25; Ais. 40:28; 1 Tim. 1:17) Tasol Jisas i tokim yumi long kolim Jehova olsem “Papa.”

4. Hau yumi save olsem Jehova i laik yumi go klostu long em?

⁴ Olsem wanem? Yu hatwok long tingim Jehova olsem Papa i gat pasin laikim? Sampela bilong yumi i pilim olsem. Sapos papa bilong yumi i no gat pasin laikim, ating dispela inap mekim na i hatwok long yumi tingim wanpela papa husat i gat pasin laikim. Tasol yumi kisim bel isi long save olsem Jehova i kliagut long ol samting yumi pilim long bel! Em i laik kam klostu long yumi. Em risen na Baibel i kirapim yumi olsem: “Yupela i mas i go klostu long God, na em bai kam klostu long yupela.” (Jems 4:8) Jehova i laikim yumi na em i laik stap olsem gutpela Papa bilong yumi.

5. Olsem Luk 10:22 i kamapim, olsem wanem Jisas inap helpim yumi long i go klostu moa long Jehova?

⁵ Jisas inap helpim yumi long i go klostu moa long Jehova. Jisas i save gut long Jehova na em i bihainim gut ol pasin bilong em olsem na em i tok: “Man i lukim mi, em i lukim Papa tu.” (Jon 14:9) Tingim Jisas olsem wanpela bikpela brata, em i skulim yumi hau long rispektim na bihainim tok bilong Papa bilong yumi, hau long abrusim ol samting we inap mekim Em i bel hevi na hau long mekim ol samting na bai Em i ken orait long yumi. Na moa yet, ol samting Jisas i mekim taim em i stap long graun i kamapim klia olsem Jehova i gat gutpela pasin na pasin laikim. (Ritim Luk 10:22.) Yumi ken stori long sampela eksampel.

6. Stori long sampela eksampel long hau Jehova i putim yau long Jisas?

⁶ Jehova i save putim yau long ol pikinini bilong em. Tingim hau Jehova i putim yau long fesbon Pikinini bilong em. Tru tumas, Jehova i harim planti beten em Pikinini bilong em i mekim taim em i stap long graun. (Luk 5:16) Em i harim Jisas i beten taim em i laik mekim ol bikpela disisen, olsem long taim em i laik makim 12-pela aposel bilong em. (Luk 6:12, 13) Na tu, Jehova i harim beten bilong Jisas taim em i karim bikpela hevi tru. Paslain stret long Judas i putim Jisas long han bilong ol birua, Jisas i beten long Papa bilong em na tokim Em long ol samting bai  painim em. Jehova i harim beten bilong Jisas na em i salim wanpela ensel i go bilong strongim Pikinini bilong Em.​—Luk 22:41-44.

7. Yu pilim olsem wanem taim yu save olsem Jehova i save harim ol beten bilong yumi?

⁷ Long nau, Jehova i wok yet long harim ol beten bilong ol wokman bilong em, na em i save bekim beten bilong ol long taim stret na long wei bilong em yet. (Sng. 116:1, 2) Tingim hau dispela samting i bin painim wanpela sista long India. Em i bin karim bikpela hevi long pasin bilong tingting planti, na em i beten na kamapim dispela hevi long Jehova. Em i tok: “JW Broadcasting^® program bilong Mas 2019 we i stori long hau long karim hevi bilong wari na tingting planti i bin helpim mi tru. Dispela i olsem bekim bilong ol beten bilong mi.”

8. Long wanem ol rot Jehova i soim olsem em i laikim Jisas?

⁸ Jehova i save laikim yumi na tingim yumi, wankain olsem em i laikim Jisas na tingim em taim em i kam long graun bilong inapim wok bilong em. (Jon 5:20) Em i lukautim Jisas long ol samting bilong bilip, bel na tingting, na ol samting bilong skin em i nidim. Na Jehova i tokim Pikinini bilong em olsem Em i laikim em na amamas long em. (Mat. 3:16, 17) Jisas i save olsem oltaim Papa bilong em long heven i gat pasin laikim bai stap wantaim em na helpim em, olsem na em i no pilim olsem em i stap wanpis.​—Jon 8:16.

9. Wanem samting i kamapim klia olsem Jehova i laikim yumi?

⁹ Olsem Jisas, yumi olgeta i pilim pasin laikim bilong Jehova long kain kain rot. Olsem, Jehova i bringim yumi i go klostu long em na em i givim yumi planti bratasista i gat pasin laikim em ol i save mekim yumi amamas, na ol i save strongim yumi long taim bilong hevi. (Jon 6:44) Na tu, Jehova i save givim yumi ol samting yumi nidim bilong strongim bilip bilong yumi. Na em i save helpim yumi long klos na kaikai em yumi nidim long wan wan de. (Mat. 6:31, 32) Taim yumi tingim pasin bilong Jehova long laikim yumi, dispela bai mekim na pasin bilong yumi long laikim em bai go strong moa.

10. Yumi inap kisim wanem skul long pasin Jehova i mekim long ol bratasista bilong yumi?

¹⁰ Jehova i laikim ol bratasista bilong yumi. Tasol sampela taim yumi inap pilim hatwok long laikim ol bratasista bilong yumi na soim pasin laikim long ol. Sampela taim yumi pilim hatwok bikos yumi olgeta i gat narapela narapela kalsa na bekraun. Na yumi olgeta i save mekim ol popaia we inap bagarapim bel bilong ol narapela na mekim ol i bel hevi. Maski i olsem, yumi olgeta i ken wok strong long soim pasin laikim long ol bratasista bilong yumi. Hau yumi ken mekim olsem? Yumi ken mekim olsem long rot bilong bihainim pasin bilong Papa bilong yumi na soim pasin laikim long ol bratasista bilong yumi. (Efe. 5:1, 2; 1 Jon 4:19) Yumi ken stori long samting yumi inap lainim long eksampel bilong Jehova.

11. Long wanem rot Jisas i soim “pasin sori” bilong Jehova?

¹¹ Jehova i save mekim “pasin sori.” (Luk 1:78) Man i gat pasin sori i save tingim tru ol man i karim hevi; em i save painim rot bilong helpim ol na mekim isi bel bilong ol. Long pasin Jisas i mekim long ol manmeri, em i bihainim pasin bilong Jehova long tingim ol tru. (Jon 5:19) Wanpela taim Jisas i lukim bikpela lain manmeri, na em i “sori tru long ol, long wanem, ol man i bin mekim nogut long ol na ol i stap nogut tru olsem ol sipsip i no gat wasman.” (Mat. 9:36) Jisas i sori long ol na em i mekim samting bilong helpim ol. Em i oraitim ol sikman na em i helpim ol man i “hatwok nating na karim ol bikpela hevi.”​—Mat. 11:28-30; 14:14.

12. Stori long wanpela eksampel long hau yumi inap soim pasin sori.

¹² Yumi mas save long ol hevi ol bratasista bilong yumi i karim, na bai yumi ken mekim pasin sori long ol. Olsem, ating wanpela sista i gat  bikpela sik. Em i no save toktok planti long dispela samting, tasol em bai amamas sapos yumi helpim em long ol samting em i nidim. Olsem wanem? Em inap lukautim famili bilong em long ol samting ol i nidim? Yu ting em bai amamas long yumi helpim em long sampela wok, olsem redim kaikai o klinim haus samting? Ating ol i pinisim wanpela brata long wok. Olsem wanem? Yumi ken givim mani long em olsem presen bilong helpim em long baim ol samting em i nidim i go inap long em i painim narapela wok?

13-14. Olsem wanem yumi ken bihainim pasin bilong Jehova long givim samting?

¹³ Jehova i save givim samting. (Mat. 5:45) Yumi no ken wet i go inap long ol bratasista bilong yumi i askim yumi long helpim ol na nau yumi soim pasin sori long ol, nogat. Olsem Jehova, yumi yet i mas go pas long helpim ol. Em i save mekim san i lait long yumi long olgeta de na em i no wetim yumi long askim em! Na hat bilong san i save helpim olgeta manmeri, na i helpim tu ol man em ol i no save tenkyu long God long dispela samting. Yu bai wanbel olsem taim Jehova i givim yumi ol samting yumi nidim, em i soim olsem em i laikim yumi, a? Yumi laikim tru Jehova bikos em i gat gutpela pasin na em i gat pasin bilong givim ol samting long yumi!

¹⁴ Planti bratasista bilong yumi i bihainim pasin bilong Papa bilong yumi long heven, na ol i go pas long redi long helpim ol narapela. Olsem, long 2013, Bikpela Taifun Haiyan i kamapim bikpela bagarap long Filipins. Planti haus na ol samting bilong ol bratasista i bagarap. Tasol ol bratasista bilong ol long olgeta hap bilong graun i redi long helpim ol. Planti bratasista i givim mani na helpim wok bilong sanapim ol haus bilong ol bratasista i bagarap, na ol i sanapim klostu 750 haus insait long wanpela yia! Long taim bilong COVID-19 pendemik, ol Witnes i givim bel tru long sapotim ol bratasista bilong ol. Taim yumi hariap long sapotim ol bratasista bilong yumi, yumi soim ol olsem yumi laikim ol.

15-16. Olsem Luk 6:36 i kamapim, yumi mas mekim wanem long bihainim pasin bilong Papa bilong yumi long heven?

¹⁵ Jehova i gat pasin marimari na em i save fogivim ol man. (Ritim Luk 6:36.) Long olgeta wan wan de, Papa bilong yumi long heven i save mekim pasin marimari long yumi. (Sng. 103:10-14) Ol disaipel bilong Jisas i save  mekim ol popaia, tasol Jisas i mekim pasin marimari long ol na em i fogivim ol. Na tu, em i redi long givim laip bilong em olsem ofa na bai God i ken fogivim ol sin bilong yumi. (1 Jon 2:1, 2) Pasin bilong Jehova na Jisas long fogivim yumi i mekim na yumi laik i go klostu moa long ol.

¹⁶ Yumi strongim pasin laikim namel long famili bilong yumi—em ol bratasista bilong yumi—taim yumi “redi long fogivim narapela narapela.” (Efe. 4:32) Em tru olsem sampela taim em bai hatwok long yumi fogivim ol narapela, olsem na yumi mas wok strong long mekim olsem. Wanpela sista i pilim olsem atikol “Amamas Long Fogivim Narapela” long Wastaua i helpim em long mekim olsem. * Em i tok: “Taim mi stadi long dispela atikol, em i helpim mi long kliagut long hau pasin bilong fogivim narapela inap helpim mi. Atikol i stori olsem, taim yu redi long fogivim ol narapela, dispela i no makim olsem yu orait long rong ol i mekim o yu giaman olsem dispela rong i no bagarapim bel bilong yu, nogat. Dispela i makim olsem yu no bel nogut moa long man i rongim yu na yu stap bel isi.” Taim yumi redi long fogivim ol bratasista bilong yumi, yumi soim olsem yumi laikim ol na yumi bihainim pasin bilong Papa bilong yumi, em Jehova.

17. Olsem Matyu 5:16 i kamapim, olsem wanem yumi ken onarim Papa bilong yumi long heven?

¹⁷ Yumi amamas olsem yumi insait long wanpela bikpela famili, em ol bratasista bilong yumi i stap long olgeta hap bilong graun. Yumi laik bai planti manmeri moa i joinim yumi long lotuim God bilong yumi. Olsem na yumi no laik mekim wanpela samting we inap bagarapim gutnem bilong lain bilong Jehova o bagarapim gutnem bilong Papa bilong yumi long heven. Yumi laik bihainim ol gutpela pasin na bai dispela i kirapim ol man long kisim save long gutnius.—Ritim Matyu 5:16.

18. Wanem samting inap helpim yumi long strongim bel na autim tok?

¹⁸ Sampela taim ol man inap tok bilas long yumi o mekim nogut long yumi bikos yumi bihainim tok bilong Papa bilong yumi long heven. Yumi ken mekim wanem sapos yumi pret long autim bilip bilong yumi long ol narapela? Yumi  ken save tru olsem Jehova na Pikinini bilong em bai helpim yumi. Jisas i tokim ol disaipel bilong em olsem ol i no ken wari long hau ol bai toktok o wanem tok ol bai mekim. Bilong wanem? Long wanem, Jisas i tok: “Long dispela taim stret yupela bai kisim tok yupela bai autim. I no yupela tasol bai toktok, nogat, spirit bilong Papa bilong yupela bai i autim tok long maus bilong yupela.”​—Mat. 10:19, 20.

19. Stori long eksampel bilong wanpela husat i strongim bel na autim tok.

¹⁹ Tingim eksampel bilong Robert. Taim em i kirap stadi long Baibel na em i no gat bikpela save yet long Baibel, long dispela taim em i sanap long ai bilong militeri kot bilong Saut Afrika na eksplenim long jas long risen na em i no laik insait long ami. Em i strongim bel na eksplenim long kot olsem em i no laik insait long pait bikos em i laikim ol bratasista Kristen bilong em. Robert i amamas olsem em i insait long famili bilong God! Jas i askim em olsem: “Husat ol bratasista bilong yu?” Robert i no ting jas bai mekim dispela askim, tasol hariap tru em i tingim ol tok bilong de teks bilong dispela de. Em Matyu 12:50, em i tok: “Man o meri husat i bihainim laik bilong Papa bilong mi i stap long heven, em i brata na susa na mama bilong mi.” Maski Robert em wanpela nupela Baibel sumatin, holi spirit bilong Jehova i helpim em long bekim dispela askim na ol narapela askim we em i no bin ting long en. Jehova i amamas tru long Robert! Na tu, Jehova i amamas tru long yumi taim yumi trastim em, na strongim bel na autim tok long taim bilong hevi.

20. Yumi mas tingting strong long mekim wanem? (Jon 17:11, 15)

²⁰ Yumi mas wok yet long amamas long gutpela blesing yumi gat long insait long famili bilong God. Yumi gat gutpela Papa na planti gutpela bratasista em ol i laikim yumi. Oltaim yumi mas amamas long dispela. Satan na ol lain nogut i bihainim em i laik bai yumi holim tupela tingting long pasin laikim bilong Papa bilong yumi long heven, na ol i laik bagarapim pasin wanbel namel long yumi. Tasol Jisas i tingim yumi na em i beten askim Papa bilong yumi long lukautim yumi na bai yumi ken stap wanbel yet olsem wanpela famili. (Ritim Jon 17:11, 15.) Jehova i wok long bekim dispela beten. Olsem Jisas, yumi no ken holim tupela tingting long pasin laikim na helpim bilong Papa bilong yumi long heven. Yumi mas tingting strong long pas gut wantaim famili bilong yumi, em ol bratasista bilong yumi.