Yu Save Long Dispela?

Wanem taim ol saveman i go lukim Jisas?

Gutnius Matyu i Raitim i tok “sampela saveman bilong hap sankamap” ol i go lukim Jisas na givim ol presen long em. (Matyu 2:​1-​12) Baibel i no stori long hamas saveman i go lukim Jisas taim em i bebi. Na i no gat wanpela samting i soim olsem dispela tingting bilong ol man olsem 3-pela saveman i go lukim Jisas em i tru. Na tu, Baibel i no kolim nem bilong ol.

Baibel New International Version Study Bible i mekim dispela tok long Matyu 2:11: “Ol saveman i no bin i go lukim Jisas long dispela nait mama i karim em na em i slip i stap long bokis kaikai bilong ol bulmakau, nogat, tasol ol wasman bilong sipsip tasol i bin i go lukim Jisas. Ol dispela saveman i go lukim Jisas sampela mun bihain, taim em i bikpela liklik na em i stap long haus.” Dispela i stret, long wanem, taim Herot i wok long painim liklik pikinini Jisas bilong kilim em i dai, em i tokim ol man long kilim i dai ol mangi i gat 2-pela krismas na aninit long en, em ol i stap long Betlehem na long ol ples i stap klostu. Em i makim dispela krismas taim em i skelim taim stret ol saveman i bin stori long “dispela sta i bin kamap.”​—⁠Matyu 2:⁠16.

Sapos ol dispela saveman i bin go lukim Jisas long dispela nait mama i karim em na ol i givim gol na ol narapela gutpela presen long em, ating taim Maria i kisim Jisas i go long tempel 40 de bihain, em i no inap givim 2-pela pisin tasol olsem ofa. (Luk 2:​22-​24) Dispela pasin Maria i bihainim em samting Lo i makim bilong ol man i stap rabis i mas bihainim sapos mani bilong ol i sot na ol i no inap baim pikinini sipsip. (Wok Pris 12:​6-8) Tasol yumi ken ting olsem ol dispela presen i gat bikpela pe i bin helpim famili bilong Jisas long taim ol i stap long Isip.​—⁠Matyu 2:​13-​15.

Bilong wanem Jisas i go kamap long matmat bilong Lasarus 4-pela de bihain?

I luk olsem Jisas yet i gat laik long mekim olsem. Bilong wanem yumi tok olsem? Orait skelim stori i stap long Jon sapta 11.

Lasarus em wanpela man i stap long Betani na em i pren bilong Jisas. Taim em i kisim bikpela sik, ol susa bilong em i salim toksave i go long Jisas long dispela samting. (Jon sapta 11 Ves 1-3) Long dispela taim, Jisas i stap long narapela ples na bilong i go long Betani em i mas wokabaut inap 2-pela de. (Jon 10:40) Long taim toksave i kamap long Jisas, Lasarus i dai. Jisas i mekim wanem? Em i “stap tupela de moa long dispela ples em i stap long en” na bihain em i go long Betani. (Jon sapta 11 Ves 6, 7) Bihain long dispela 2-pela de, em i wokabaut narapela 2-pela de, olsem na em i kamap long matmat 4-pela de bihain long indai bilong Lasarus.​—⁠Jon sapta 11 Ves 17.

Paslain long dispela, i gat tupela i bin i dai na Jisas i kirapim bek ol​—⁠wanpela em i kirapim em bihain stret long taim em i dai na narapela em i kirapim em bihain long sampela aua. (Luk 7:​11-​17; 8:​49-​55) Tasol olsem wanem? Em inap long kirapim bek man i bin i stap long matmat inap 4-pela de, em bodi bilong em i wok long bagarap? (Jon sapta 11 Ves 39) Wanpela dikseneri bilong Baibel i tok olsem ol Juda i gat bilip olsem “man i dai pinis na i bin stap long matmat inap 4-pela de, em i no inap kirap bek, long wanem, bodi bilong em i wok long bagarap, na spirit bilong em, em ol man i ting em i stap klostu long bodi inap 3-pela de, em i go pinis.”

Sapos sampela bilong ol man i bung i stap long matmat i gat tupela tingting, orait nau ol bai lukim strong bilong Jisas long daunim indai. Jisas i sanap i stap long ai bilong matmat na em i singaut olsem: “Lasarus, yu kam ausait. Orait Lasarus i kirap bek na i kam ausait.” (Jon sapta 11 Ves 43, 44) Ol man i dai pinis inap stap laip gen​—⁠tasol i no long rot bilong dispela bilip giaman em planti man i holim olsem spirit bilong man i stap laip yet, nogat​—⁠long rot bilong kirap bek tasol em inap stap laip gen.​—⁠Esekiel 18:4; Jon 11:⁠25.