Baibel i Save Senisim i Stap Bilong Man

WANEM samting i bin helpim wanpela yangpela meri husat i bin lusim lotu em i kamap bikpela long en na nau em i kam bek long lotu? Ritim tok em i mekim.

“Nau i stap bilong mi i gat as tru bilong en.”​—LISA ANDRÉ

YIA MI BON: 1986

KANTRI: LAKSAMBEK

BIPO: PIKININI I LUSIM LOTU I TRU

LAIP BILONG MI LONG BIPO: Mi kamap bikpela long taun Bertrange, em wanpela naispela liklik taun i gat planti wok bisnis samting long en klostu long biktaun Laksambek. Mi laspela bilong 5-pela pikinini. Papamama bilong mi ol i Witnes Bilong Jehova, na ol i wok strong long skulim mi na ol brata na susa bilong mi long bihainim ol lo Kristen.

Taim mi gat 13 krismas samting, mi wok long kisim tupela tingting long ol tok ol Witnes Bilong Jehova i skulim ol man long en. Pastaim mi sakim dispela tingting bilong mi, tasol isi isi bilip bilong mi i go slek. Papamama bilong mi ol i mekim olgeta samting bilong stiaim mi long bihainim stretpela rot, tasol mi sakim helpim bilong ol. Papamama i no save olsem mi wok long bung wantaim ol narapela yangpela husat i no rispek liklik long ol man i gat wok long bosim ol. Mi lukim olsem ol dispela yangpela i stap fri long mekim ol samting na mi laikim dispela kain laip. Mipela i save pati planti taim, slip nabaut wantaim ol man, kisim drak, na dring alkohol. Mi amamas long bung wantaim ol manmeri husat i insait long ol kain kain amamas samting.

Tasol tru tru, mi no stap amamas. Taim mi wok long bung wantaim ol dispela pren, mi pilim olsem laip i no gat as bilong en; ol i no wari long wanpela samting. Tasol mi tingting planti olsem bilong wanem pasin nogut i pulap tru long dispela graun. Bihain mi pilim bikpela bel hevi tru.

BAIBEL I SENISIM I STAP BILONG MI: Taim mi gat 17 krismas, wanpela taim mi pilim olsem bel bilong mi i bagarap stret. Mama i luksave long dispela na em i askim mi long stadi gen long Baibel. Em i kirapim mi long skelim gut ol tok bilong en na mi yet i ken wokim disisen long bihainim tok bilong Baibel o nogat. Pasin bilong mama long toktok gut wantaim mi i kirapim mi long skelim gen i stap bilong mi. Mi orait long stadi long Baibel wantaim bikpela susa bilong mi Caroline na man bilong em Akif. Famili bilong Akif ol i no Witnes, tasol Akif yet i kamap Witnes Bilong Jehova taim em i kamap bikpela man. Olsem na mi pilim olsem mi inap toktok gut wantaim em na  kamapim olgeta tingting i stap long bel, na dispela i bikpela samting long mi.

Pasin mi wok long bihainim em ol pasin i no stret long ol Witnes i mekim, tasol mi pilim olsem em laik bilong mi yet. Taim mi kirap stadi long Baibel, mi luksave olsem pasin mi bihainim inap mekim Jehova i belgut o bel hevi. (Song 78:​40, 41; Sindaun 27:11) Na mi luksave olsem pasin bilong mi inap mekim ol narapela man tu i belgut o bel hevi.

Taim mi wok long stadi moa yet long Baibel, mi luksave olsem olgeta tok bilong en i stret na i kamapim klia olsem em i Tok Bilong God. Olsem, mi kisim save long sampela tok profet bilong Baibel em olgeta liklik hap bilong en tu i bin kamap tru. Dispela save i helpim mi na nau mi no gat tupela tingting moa long ol tok bilong Baibel.

Wanpela yia bihain long mi stadi long Baibel, mi na papamama i go visitim bikpela brata bilong mi husat i bin mekim wok volantia long brens ofis bilong ol Witnes Bilong Jehova long Jemani. Taim mi lukim olsem brata bilong mi i stap amamas tru, dispela i kirapim tru bel bilong mi. Dispela amamas em samting mi wok long painim! Mi amamas tu long lukim ol narapela Witnes i mekim wok volantia long dispela hap. Pasin bilong ol i narapela kain olgeta long pasin bilong ol pren mi bin bung wantaim ol, em ol i save giaman na mekim ol samting bilong kisim amamas tasol. Bihain liklik, mi beten long Jehova na tok promis olsem bai mi mekim wok bilong em long laip olgeta bilong mi. Taim mi gat 19 krismas, mi kisim baptais bilong makim olsem mi dediket pinis long Jehova.

GUTPELA SAMTING I PAINIM MI: Nau i stap bilong mi i gat as tru bilong en. Mi kisim amamas long skulim ol narapela long Baibel, na helpim ol long kisim save long Jehova na ol tok promis bilong em bai kamap bihain. Famili bilong mi tu i stap amamas, na i no gat wok moa long ol i wari long mi.

Mi save long ol pasin kranki bilong mi long bipo, tasol mi wok strong long lusim tingting long ol. Mi tingim tru pasin laikim bilong Jehova na pasin bilong em long lusim rong. Mi wanbel tru long tok bilong Sindaun 10:​22, em i tok: “Bikpela yet i givim yumi planti gutpela samting, em i no save larim ol dispela samting i givim hevi long yumi.”

[Rait long pes 12]

“Mipela i save pati planti taim, slip nabaut wantaim ol man, kisim drak, na dring alkohol”

[Rait long pes 13]

“Mi save long ol pasin kranki bilong mi long bipo, tasol mi wok strong long lusim tingting long ol”