‘Ol i Bin Sanap Strong na i Stret Yumi Rispektim Ol’

TAIM Adolf Hitler i bin stap olsem bikman bilong Jemani na mekim wok nogut bilong em, ol man i bin salim planti tausen pas i go long em. Long 1945, taim ol Rasia i go kisim pinis ol ples klostu long Berlin, ol i bringim planti bilong ol dispela pas i go long Moscow. Saveman Henrik Eberle i bin skelim planti bilong ol dispela pas i stap long laibreri bilong Moscow bambai em i ken save husat i raitim pas i go long Hitler na i gat wanem as na ol i mekim olsem. Taim Eberle i painimaut pinis long ol dispela samting, em i raitim stori bilong en long buk Briefe an Hitler (Letters to Hitler).

Saveman Eberle i tok: “Ol tisa na ol sumatin, ol sister na ol pater, ol man i no gat wok mani na ol bikpela bisnisman, ol komanda bilong nevi na ol soldia​—⁠olgeta dispela lain i salim pas i go long Hitler. Sampela man i litimapim nem bilong em na i tok em i Mesaia; tasol sampela i tok em i as tru bilong olgeta pasin nogut.” Olsem wanem? Sampela bikman bilong lotu i salim pas i go long Hitler bilong tokaut olsem ol i no amamas long ol pasin nogut tru em gavman Natsi i bin mekim? Yes, em i bin kisim sampela kain pas olsem.

Long laibreri bilong Moscow, Eberle i lukim ol pas em ol Witnes Bilong Jehova long narapela narapela hap bilong Jemani i bin raitim bilong tokaut olsem ol i no amamas long pasin nogut bilong gavman Natsi. Ol Witnes Bilong Jehova long 50 kantri i bin salim 20,000 pas na telegram i go long Hitler long pasin nogut tru em i bin mekim long ol Witnes. Lain Natsi i bin arestim planti tausen Witnes, na kilim i dai sampela handret, na sampela i dai, long wanem, gavman Natsi i bin mekim nogut long ol. Saveman Eberle i tok: “Taim yumi skelim dispela namba [bilong ol Witnes Bilong Jehova em ol i dai], i olsem ol i liklik lain tasol taim yumi skelim wantaim planti milion manmeri i dai aninit long wok bos bilong gavman Natsi. Tasol ol dispela manmeri i dai, long wanem, ol i bin sanap strong na ol i no larim gavman Natsi i daunim ol, olsem na i stret yumi rispektim ol.”