Bilong Wanem Yumi Mas Bihainim Ol Lo Bilong Baibel?

YU TING tok bilong Baibel long maritpasin em samting bilong bipo tasol na i pasim man long kisim amamas? Nogat. Tok em Baibel i mekim long maritpasin inap helpim yumi long abrusim:

▪ Ol sik bilong pamuk

▪ Pasin bilong kisim nating bel

▪ Ol hevi bilong marit i bruk

▪ Pasin i mekim maus bilong bel i gat tok

▪ Pasin bilong pilim olsem yumi samting nating

Man Bilong Wokim yumi, God Jehova, a em i laik yumi mas amamas na kisim helpim long ol presen em i givim long yumi. God i ‘save skulim yu na soim yu long ol stretpela pasin yu mas bihainim na bai yu stap gut.’ (Aisaia 48:17) Man i bihainim tok bilong Baibel long maritpasin, em i ken save olsem:

▪ God bai orait long em

▪ Em bai stap bel isi

▪ Famili bilong em bai pas gut wantaim

▪ Em bai gat gutnem

▪ Em bai rispektim em yet

Tasol olsem wanem sapos yu no bihainim ol stretpela lo bilong Baibel? Yu ting yu inap senisim ol pasin bilong yu? Yu ting God bai tingim ol sin yu bin mekim bipo na em bai givim strafe long yu?

Tingim dispela: Sampela insait long kongrigesen Kristen long taim bilong ol aposel, bipo ol i bin insait long pasin pamuk, pasin adaltri, na pasin bilong man i slip wantaim man. Bihain ol i senisim pasin bilong ol, na ol i kisim ol gutpela blesing. (1 Korin 6:​9-11) Long nau tu, planti tausen manmeri long olgeta hap bilong graun, ol i lusim ol pasin doti na bihainim ol stretpela lo bilong  Baibel, na dispela i helpim tru sindaun bilong ol. Tingim gen stori bilong Sarah long kirap bilong dispela atikol.

“Mi Pilim Bel Isi Tru”

Sarah i bin mekim nabaut long laip bilong em na nau em i luksave olsem em i no stap fri, na tu, em i no stap bel isi. Em i tok: “Mi pilim olsem maus bilong bel bilong mi i pas pinis. Mi sem pipia na wari olsem nogut mi kisim bel nating na kisim sik nogut bilong pamuk. Mi bilip yet olsem God i stap tru, na mi save olsem pasin mi bihainim i mekim em i bel hevi. Mi pilim olsem mi doti tru na dispela i bagarapim tru bel bilong mi.”

Bihain, Sarah i strongim bel na senisim ol pasin bilong em. Em i go bek long kisim helpim long papamama bilong em, em ol i Witnes Bilong Jehova. Na tu, em i askim long kisim helpim long ol elda Kristen long kongrigesen. Em i tok: “Mi amamas tru long gutpela pasin na pasin laikim bilong papamama bilong mi na ol elda long kongrigesen. Na mi pilim bel isi tru.”

Nau Sarah i gat 2-pela pikinini. Em i tok: “Mi save stori gut long ol pikinini long ol disisen mi mekim. Mi laik bai ol i save olsem mi bin sakim ol lo bilong God na dispela i bin bagarapim laip bilong mi. Mi laik tru long helpim ol long luksave olsem pasin bilong bihainim ol lo bilong God long maritpasin, dispela inap lukautim ol long skin, na helpim bel na tingting bilong ol long stap isi. Mi bilip tru olsem God i givim yumi ol stretpela lo, long wanem, em i no laik lukim yumi i kisim bagarap.”

Yu tu inap kisim helpim taim yu bihainim ol skultok i kam long God. Baibel i tok promis olsem: “Bikpela i save skulim yumi long gutpela tok tumas. Dispela tok i save mekim bel bilong yumi i amamas. Lo bilong God i nambawan tru, na i givim gutpela save long yumi.” Taim yumi “bihainim lo bilong [em],” dispela i save “mekim sindaun bilong [yumi] i kamap gutpela tru.”​—⁠Song 19:​8, 11. b

[Ol Futnot]

[Rait long pes 8]

Ol man i sakim ol lo bilong Baibel, ol i save bagarapim tru bel na tingting bilong narapela

[Rait long pes 9]

Ol man i bihainim ol lo bilong Baibel, maus bilong bel i stap klin na famili i pas gut wantaim