Tenpela Askim Long Maritpasin Ol Bekim

1 Yu ting maritpasin em namba wan sin Adam na Iv i bin mekim long gaden Iden?

▪ Bekim: Planti man i ting olsem dispela prut tambu long gaden Iden i makim maritpasin. Tasol Baibel i no tok olsem.

Tingim: Taim God i no wokim yet Iv, em i tambuim Adam long kaikai prut bilong “diwai bilong givim gutpela save long wanem samting i gutpela na wanem samting i nogut.” (Stat 2:​15-18) Adam wanpela i stap, olsem na dispela tambu i no makim maritpasin. Na God i tokim Adam na Iv long “kamap planti na i go sindaun long olgeta hap bilong graun.” (Stat 1:28) Yu ting God i gat pasin laikim bai tokim namba wan man na meri long “kamap planti”​—⁠dispela i makim olsem ol i mas mekim maritpasin​—⁠na bihain em i tok long ol i mas i dai, long wanem, ol i bihainim dispela tok bilong em?​—⁠1 Jon 4:⁠8.

Na tu, man bilong Iv i no bin stap wantaim em taim Iv i “kisim pikinini [prut tambu] bilong dispela diwai na i kaikai. Na em i givim sampela long man bilong em, na man tu i kaikai.”​—⁠Stat 3:⁠6.

God i no bin krosim Adam na Iv taim tupela i slip wantaim na kamapim ol pikinini. (Stat 4:​1, 2) Dispela i kamapim klia olsem dispela prut em Adam na Iv i kaikai i no makim maritpasin, nogat, em i prut stret bilong wanpela diwai.

2 Yu ting Baibel i tambuim amamas bilong maritpasin?

▪ Bekim: Namba wan buk bilong Baibel i tokaut olsem God i bin wokim ol i kamap “man na meri.” Na God i tok olsem olgeta samting em i wokim “i gutpela.” (Stat 1:​27, 31) Bihain God i kirapim wanpela man bilong raitim tok bilong Baibel long tokim ol maritman olsem: “Meri i olsem hul wara bilong yu na yu ken amamas long em. . . . Na yu mas amamas oltaim long susu bilong en.” (Sindaun 5:​18, 19) Yu ting ol dispela tok i makim olsem Baibel i tambuim amamas bilong maritpasin?

 God i wokim bodi bilong man na meri bambai ol inap kamapim pikinini, na tu, ol inap slip wantaim na kamapim laikim bilong ol long narapela narapela na kisim amamas long en. Dispela pasin inap mekim gut bel na tingting bilong ol taim ol i pas gut wantaim olsem gutpela pren.

3 Yu ting Baibel i orait long man na meri i sindaun wantaim sapos ol i no marit stret?

▪ Bekim: Baibel i tokaut stret olsem “God bai kotim ol man i mekim pasin pamuk.” (Hibru 13:⁠4) Tok Grik por·neiʹa, ol i tanim olsem pasin pamuk i makim olgeta kain samting i no stret em ol manmeri i mekim long sem bilong man o meri em ol i no marit long em. a Olsem na em i bikpela rong long man na meri i sindaun wantaim, maski ol i gat tingting long marit bihain.

Maski sapos man na meri i laikim tru narapela narapela, God i laik ol i mas marit stret paslain long ol i mekim maritpasin. God yet i wokim yumi na em i inapim yumi long kamapim pasin laikim. Namba wan pasin bilong God em pasin laikim. Olsem na i gat gutpela as na em i tok maritpasin em samting bilong ol marit tasol i ken amamas long en, na atikol i kamap bihain bai stori long dispela.

4 Yu ting i stret long man i maritim planti meri?

▪ Bekim: Inap sampela haptaim, God i bin orait long man i maritim planti meri. (Stat 4:19; 16:​1-4; 29:18–30:24) Tasol God i no as bilong dispela pasin bilong maritim planti meri. Em i bin givim wanpela meri tasol long Adam.

God i makim Jisas Krais long strongim gen lo bilong em long man i mas maritim wanpela meri tasol. (Jon 8:28) Taim ol man i askim Jisas long lo i tok wanem long marit, Jisas i tok: ‘Man husat i bin wokim ol long pastaim tru, em i bin wokim ol i kamap man na meri. Na ating yupela i no bin ritim tok bilong em olsem: “Long dispela as man bai lusim papa na mama bilong en na pas wantaim meri bilong en, na tupela bai kamap wanpela bodi”?’​—⁠Matyu 19:​4, 5.

Bihain God i kirapim wanpela disaipel bilong Jisas long raitim tok olsem: “Olgeta man i mas i gat meri bilong ol yet na olgeta  meri i mas i gat man bilong ol yet.” (1 Korin 7:⁠2) Baibel i tok tu olsem man marit i mekim wok insait long kongrigesen Kristen em i mas i stap “man bilong wanpela meri tasol.”​—⁠1 Timoti 3:​2, 12.

5 Yu ting i stret long ol marit i kisim ol marasin samting bilong pasim bel?

▪ Bekim: Jisas i no tokim ol disaipel bilong em long ol i mas i gat pikinini. Ol disaipel bilong em tu i no tokim ol manmeri olsem. Na i no gat wanpela hap bilong Baibel i tambuim pasin bilong pasim bel.

Olsem na ol marit i ken wokim disisen bilong ol yet long ol bai gat pikinini o nogat. Ol i ken skelim tu olsem ol bai gat hamas pikinini na long wanem taim ol bai gat pikinini. Em wok bilong ol yet long wokim disisen long wanem ol marasin samting ol bai yusim bilong pasim bel, tasol ol i no ken yusim marasin bilong bagarapim pikinini i kamap pinis long bel. b I no gat wanpela man i gat rait long sutim tok long disisen ol i mekim.​—⁠Rom 14:​4, 10-13.

6 Yu ting i gat rong long rausim bel?

▪ Bekim: Laip em samting i holi long ai bilong God, na taim pikinini i stap olsem blut yet long bel bilong mama, God i tingim dispela olsem samting i gat laip pinis. (Song 139:16) God i tok em bai givim strafe long man i bagarapim bebi i stap long bel bilong mama. Olsem na long ai bilong God, taim man i bagarapim bebi i stap yet long bel, i olsem em i kilim man i dai.​—⁠Kisim Bek 20:13; 21:​22, 23.

Tasol olsem wanem sapos hevi i kamap taim mama i laik karim bebi na i luk olsem wanpela tasol bai stap laip, olsem mama o bebi? Long kain taim olsem, tupela marit yet i mas wokim disisen long seivim laip bilong mama o bilong bebi. c

7 Yu ting Baibel i orait long pasin bilong katim marit?

▪ Bekim: Baibel i no orait long pasin bilong katim marit. Tasol Jisas i kolim wanpela samting tasol we ol marit i ken divos long en, na i tok: “Sapos meri i no mekim pasin pamuk [slip wantaim narapela husat i no poroman marit] na man i katim marit na maritim narapela meri, orait dispela man i mekim pasin adaltri.”​—⁠Matyu 19:⁠9.

God i heitim tru pasin bilong giaman nating na katim marit. Em bai givim strafe long ol man husat i giaman nating na lusim poroman marit bilong ol bambai ol inap painim nupela poroman.​—⁠Malakai 2:​13-16; Mak 10:⁠9.

8 Yu ting God i orait long man i maritim man na meri i maritim meri?

 ▪ Bekim: Baibel i tambuim tru pasin pamuk, na pasin bilong man i slip wantaim man na meri i slip wantaim meri. (Rom 1:​26, 27; Galesia 5:​19-21) Baibel i tokaut klia olsem God i no orait liklik long ol man i bihainim dispela kain pasin, tasol yumi save tu olsem “God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.”​—⁠Jon 3:⁠16.

Ol Kristen tru i no orait liklik long dispela kain pasin, tasol ol i save mekim gutpela pasin long olgeta kain man. (Matyu 7:12) God i laik bai yumi mas “givim ona long olgeta kain man.” Olsem na ol Kristen tru i no surik long mekim gutpela pasin long ol manmeri i bihainim kain pasin doti olsem.​—⁠1 Pita 2:⁠17.

9 Yu ting i gat rong long fon seks o stori long maritpasin long rot bilong fon o Intenet?

▪ Bekim: Fon seks i makim pasin bilong ringim narapela na mekim stori nogut long maritpasin o ritim o harim mesis long fon i kamapim tok bilong kirapim laik bilong mekim maritpasin. Ol man i yusim mobail fon bilong salim ol piksa na ol tok doti i stori long pasin sem na ol i mekim olsem tu long rot bilong Intenet.

Baibel i no kolim stret ol dispela kain pasin i stap long nau. Tasol em i tok: “Olsem i stret long ol manmeri i holi, yupela i no ken larim toktok bilong pasin pamuk na olgeta kain pasin i no klin na gridi pasin i kamap namel long yupela. Na tu, i no stret long mekim ol pasin ol man i sem long en o longlong toktok o tok pilai nogut.” (Efesus 5:​3, 4) Pasin bilong yusim mobail fon na Intenet samting long salim ol piksa na ol tok i stori long pasin sem, dispela i kirapim ol man long kisim tingting kranki long maritpasin na long mekim maritpasin wantaim ol narapela i no poroman marit bilong ol. Ol dispela pasin i kirapim ol man long inapim laik bilong ol yet, na i no helpim ol long bosim laik bilong mekim maritpasin.

10 Baibel i tok wanem long pasin bilong pilai long sem?

▪ Bekim: Baibel i no kolim stret pasin bilong man long pilai long sem bilong em​—⁠em samting man i save mekim bilong kirapim laik bilong em long mekim maritpasin. Tasol Baibel i tokim ol Kristen olsem: “Yupela i mas kilim i dai ol laik i stap long ol hap bilong bodi bilong yupela, olsem pasin pamuk, pasin i no klin, [na kranki pasin bilong] bel i kirap.”​—⁠Kolosi 3:⁠5.

Pasin bilong pilai long sem bai kirapim man long kisim tingting kranki na tingting tasol long inapim laik bilong em yet long mekim maritpasin. Baibel i tok God inap givim “strong i winim strong bilong yumi ol man,” na em inap givim dispela strong bilong helpim ol man husat i wok strong long lusim dispela pasin nogut.​—⁠2 Korin 4:7; Filipai 4:13.

[Ol Futnot]