Stretpela Save Long Armagedon

“Ol spirit nogut . . . i go long ol king bilong olgeta hap graun bilong . . . bringim ol king i kam bung long dispela ples, long tok Hibru ol i kolim Armagedon.”—REVELESEN 16:14, 16.

ARMAGEDON em nem bilong wanpela ples. Tasol dispela ples i no stap tru tru long wanpela hap bilong graun, nogat.

Olsem na wanem mining tru bilong dispela tok “Armagedon”? Bilong wanem planti taim ol man i kolim dispela tok bilong makim wanpela samting i kamap, olsem wanpela pait?

Bung Long Ples Ol i Kolim Armagedon

Mining tru bilong dispela tok Hibru, Armagedon, em “Maunten Bilong Megido.” Tru, i no gat wanpela maunten i gat dispela nem, tasol i gat wanpela ples tru em ol man i kolim Megido. Dispela ples i stap long rot bung bilong tupela bikpela haiwe long not-wes bilong hap em lain Israel bilong bipo i bin sindaun long en. Klostu long dispela hap, i bin i gat ol bikpela pait we wanpela lain i winim na daunim tru narapela lain. Olsem na taim ol man i harim dispela tok Megido, ol i tingim woa. a

Tasol wanem kain ol pait i kamap long Megido em i no bikpela samting, nogat, bikpela samting moa em wanem as na ol i kamap. Megido i stap long Graun Bilong Promis em God Jehova i bin givim long lain Israel. (Kisim Bek 33:1; Josua 12:7, 8, 21) Em i tok promis long dispela lain olsem taim ol birua i laik pait long  ol, em bai sambai long ol, na em i bin mekim olsem. (Lo 6:18, 19) Olsem: Long Megido, Jehova i bin wokim mirakel na lukautim lain Israel na bai ol i no kisim bagarap long han bilong ami bilong King Jabin bilong Kenan na komanda bilong em, Sisera.—Hetman 4:14-16.

Olsem na dispela tok “Armagedon,” em wanpela tok piksa na i gat bikpela mining bilong en. Em i makim wanpela pait namel long tupela strongpela lain.

Tok profet long Revelesen i stori long wanpela taim klostu nau bai kamap we Satan na ol spirit nogut bai kirapim ol gavman bilong graun long bungim ami bilong ol, na dispela i makim olsem ol i birua long lain bilong God na wok bilong ol. Long dispela pait, God bai daunim ol birua na planti milion manmeri bai kisim bagarap.—Revelesen 19:11-18.

Baibel i tok long God olsem em i save ‘mekim gut long ol man, no save belhat kwik, na marimari moa yet,’ olsem na i gat wanem as na God bai kilim i dai planti manmeri? (Nehemia 9:17) Bilong kliagut long ol samting God bai mekim, yumi mas kisim bekim bilong dispela 3-pela askim: (1) Husat bai kirapim dispela pait? (2) Bilong wanem God bai insait long en? (3) Dispela pait bai mekim wanem long graun na ol manmeri?

1. HUSAT BAI KIRAPIM DISPELA PAIT?

Pait bilong Armagedon i no makim olsem God bai mekim hatpela pasin, nogat. God bai sambai long ol gutpela man bambai ol birua i no ken bagarapim ol. Ol man husat bai mekim hatpela pasin long dispela pait em “ol king bilong olgeta hap graun,” em ol lida bilong graun. Bilong wanem ol bai kirapim dispela pait? Long wanem, olsem wanpela bikbos, Satan bai stiaim ol gavman na ol ami long bagarapim na pinisim tru ol manmeri i lotuim God Jehova.—Revelesen 16:13, 14; 19:17, 18.

Long sampela kantri long nau ol gavman i strong long ol man i mas i stap fri long kamapim tingting bilong ol na bihainim lotu ol i laikim, olsem na ol man i no inap tru long ting olsem ol gavman bai pasim o pinisim wok bilong ol lotu. Tasol kain samting olsem i bin kamap long taim bilong yumi na i wok long kamap yet. b Maski i olsem, i gat tupela bikpela samting long dispela pait bilong Armagedon i narapela kain long ol narapela pait i bin kamap bipo. Namba 1, pait bai kamap long olgeta  hap. Namba 2, samting em God Jehova bai mekim i bikpela moa long ol samting em i bin mekim bipo. (Jeremaia 25:32, 33) Baibel i kolim dispela pait olsem “pait long dispela bikpela de bilong God i Gat Olgeta Strong.”

2. BILONG WANEM GOD BAI INSAIT LONG EN?

Jehova i skulim ol man i lotuim em long ol i mas i stap bel isi na laikim tru ol birua bilong ol. (Maika 4:1-3; Matyu 5:43, 44; 26:52) Olsem na ol bai i no kisim ol samting bilong pait bilong lukautim ol yet taim ol birua i laik bagarapim ol. Sapos God i no mekim wanpela samting bilong seivim lain bilong em, orait ol bai pinis olgeta. Dispela bai bagarapim gutnem bilong God Jehova. Sapos ol birua i pinisim tru lain bilong Jehova, dispela bai mekim na i luk olsem Jehova i no gat pasin laikim, i no gat stretpela pasin, na i no gat strong. Tasol dispela samting bai i no inap tru long kamap!—Song 37:28, 29.

God i no laik bagarapim man, olsem na em i givim tok lukaut long ol samting em i laik mekim. (2 Pita 3:9) Long rot bilong ol stori i stap long Baibel, God i kirapim olgeta man long tingim olsem long bipo em i bin bekim pait taim ol man i kam pait long lain bilong em. (2 King 19:35) Na tu, Baibel i tok lukaut olsem taim Satan na lain bilong em i laik pait long lain bilong God, Jehova yet bai sambai long lain bilong em na pait long ol birua. Bipo yet Baibel i bin tok profet olsem Jehova bai bagarapim ol man nogut. (Sindaun 2:21, 22; 2 Tesalonaika 1:6-9) Long dispela taim ol man bai i save olsem ol i bin kirapim pait wantaim God i Gat Olgeta Strong.—Esekiel 38:21-23.

3. DISPELA PAIT BAI MEKIM WANEM LONG GRAUN NA OL MANMERI?

Dispela pait bilong Armagedon bai lukautim planti milion manmeri na ol i no ken bagarap. Em i kirap bilong wanpela haptaim we gutpela sindaun na bel isi bai pulap long olgeta hap bilong graun.—Revelesen 21:3, 4.

Buk Revelesen i tok olsem wanpela “bikpela lain manmeri” em ol man i no inap kaunim namba bilong ol, ol bai abrusim bagarap long dispela pait. (Revelesen 7:9, 14) God bai stiaim dispela lain na ol bai mekim graun i kamap Paradais olsem Jehova i bin tingting pinis long mekim.

Olsem wanem? Yumi save long wanem taim ol birua bai kirapim dispela pait long lain bilong God?

[Ol Futnot]

[Piksa long pes 6]

God Jehova i bin daunim ol birua na sambai long lain bilong em long bipo

[Piksa long pes 7]

Jehova bai sambai gen long lain bilong em long pait bilong Armagedon