OL MEMORI inap mekim gut bel bilong yumi. Taim yumi tingim ol amamas yumi bin kisim wantaim ol famili na pren, dispela inap mekim gut bel bilong yumi. Tasol taim yumi tingim bek ol samting nogut, dispela inap givim bikpela bel hevi long yumi. Olsem wanem? Yu save bel hevi long tingim bek sampela samting nogut i bin painim yu bipo? Sapos olsem, ating yu laik save, ‘Bihain mi inap lusim tingting long ol dispela samting?’ Bekim bilong dispela askim i stap long wanpela tok profet bilong Aisaia, na dispela inap mekim gut bel bilong yumi.—Ritim Aisaia 65:17.

Em laik bilong Jehova long pinisim as bilong olkain tingting i save mekim yumi bel hevi. Em bai mekim olsem wanem? Em bai pinisim pasin nogut bilong dispela graun wantaim olgeta pen na hevi, na kamapim senis i gutpela tru. Jehova i tok promis long rot bilong Aisaia olsem: “Lukim, mi wokim nupela skai na nupela graun.” Sapos yumi kliagut long dispela tok promis, yumi inap wetim gutpela samting bai kamap bihain.

Nupela skai em wanem samting? Baibel i kamapim tupela samting bilong givim tingting long yumi. Namba 1, tupela narapela man bilong raitim Baibel ol tu i bin kamapim kain tok olsem, na tupela tok wantaim i makim ol bikpela senis bai kamap long graun. (2 Pita 3:13; Revelesen 21:1-4) Namba 2, dispela tok “skai” long Baibel inap makim wok king, o gavman. (Aisaia 14:4, 12; Daniel 4:25, 26) Olsem na nupela skai em nupela gavman, em inap tru long kamapim stretpela pasin long graun. I gat wanpela gavman tasol inap mekim olsem—em Kingdom Bilong God, em dispela gavman bilong heven em Jisas i bin skulim yumi long beten long en. Dispela Kingdom bai kamapim stretpela laik bilong God long olgeta hap.—Matyu 6:9, 10.

Nupela graun em wanem samting? I gat tupela tok bilong Baibel i helpim yumi long kisim stret mining bilong en. Namba 1, sampela taim dispela tok “graun” long Baibel i makim ol manmeri, na i no makim graun tru. (Song 96:1) Namba 2, Baibel i tok profet olsem aninit long wok king bilong God, ol manmeri i stap gut long em ol bai lain long stretpela pasin, na dispela pasin bai go kamap long olgeta hap bilong graun. (Aisaia 26:9) Olsem na nupela graun i makim wanpela lain manmeri ol bai aninit long wok king bilong God na bihainim ol stretpela lo bilong em.

Ating nau yu luksave long olsem wanem Jehova bai pinisim as bilong ol tingting i givim bel hevi long yumi, a? Klostu nau Jehova bai truim promis bilong em long kamapim nupela skai na nupela graun, olsem nupela taim i gat stretpela pasin long en. a Long nupela taim, as bilong olgeta tingting i givim hevi long yumi—long skin, tingting, na bel—bai pinis olgeta. Ol manmeri i stap gut long God ol bai i gat gutpela sindaun tru, na ol bai amamas long tingim bek ol gutpela samting i painim ol long olgeta de.

Tasol olsem wanem long ol bikpela bel hevi yumi kisim long nau? Tok promis em Jehova i bin mekim long rot bilong Aisaia i tok moa: “Ol man bai i no inap tingim moa ol samting i bin kamap bipo.” Olgeta bel hevi na pen yumi kisim long nau, isi isi bai yumi lusim tingting long en. Yu amamas long dispela samting? Sapos olsem, i gutpela yu kisim save long olsem wanem yu ken i go klostu moa long dispela God husat i tok promis long kamapim dispela gutpela taim.

Baibel ritim bilong Mas:

◼ Aisaia 63-66–Jeremaia 1-16

[Futnot]

[Rait long pes 19]

Em laik bilong Jehova long pinisim as bilong olkain tingting i save mekim yumi bel hevi