Yu Ting Olgeta Kristen Ol i Kristen Tru?

LONG nau i gat hamas Kristen i stap? Buk Atlas of Global Christianity i tok, long 2010 i gat olsem 2.3 bilion Kristen long olgeta hap bilong graun. Tasol dispela buk i tok tu olsem i gat 41,000 narapela narapela lotu insait long Kristendom—olgeta i gat ol bilip na lo bilong ol yet. Taim ol man i tingim dispela, ol i paul na bel hevi tu. Ating ol i laik save, ‘Olgeta lotu i tok ol i Kristen, tru tru ol i Kristen tru?’

Yumi ken tok piksa long dispela samting olsem: Taim wanpela man i laik raun i go long narapela kantri, em i mas toksave long ol boda sekiuriti long em yet i bilong wanem kantri. Na tu, em i mas soim wanpela ID kat, olsem paspot, bilong kamapim klia olsem tru tru em i dispela man. Olsem tasol, Kristen tru i no ken tok tasol olsem em i bilip long Krais, nogat, em i mas mekim sampela samting moa. Em i mas mekim wanem?

Ol man i stat long yusim dispela tok “Kristen” bihain long yia 44 C.E. Luk, em man bilong raitim Baibel, i tok: “Em long Antiok ol disaipel i kisim nem Kristen long namba 1 taim. God i bin stiaim dispela samting.” (Aposel 11:26) Tingim, ol dispela manmeri i kisim nem Kristen em ol disaipel bilong Krais. Wanem samting i mekim na man inap kamap disaipel bilong Jisas Krais? Buk The New International Dictionary of New Testament Theology i tok: “Bilong bihainim Jisas olsem wanpela disaipel, man i mas givim laip olgeta [bilong em] olsem wanpela sakrifais . . . na em i mas mekim olsem i go inap long taim em i dai.” Olsem na Kristen tru em man husat i givim bel olgeta long bihainim gut olgeta tok bilong Jisas, em Man Bilong Kamapim Lotu Kristen.

Yu ting long nau yumi inap painim ol kain manmeri olsem namel long ol lain em ol i tok ol i Kristen? Jisas yet i tok wanem samting bai stap olsem mak bilong kamapim klia husat ol i disaipel tru bilong em? Mipela i laik singautim yu long skelim bekim bilong Baibel long ol dispela askim. Long ol stori i kamap bihain long dispela, yumi bai skelim 5-pela tok bilong Jisas em ol i helpim yumi long luksave long ol mak bilong ol disaipel tru bilong em. Bai yumi skelim olsem wanem ol Kristen bilong pastaim i bin inapim ol dispela mak. Na bai yumi traim long luksave husat namel long ol lain i tok ol i Kristen long nau, ol i inapim ol dispela mak.