Ol Bilip Kristen i Mekim Wanem Long Ol Komiuniti?

OL STORI i kamap paslain long dispela i tokaut long as na ol Kristen tru i no insait long wok politik. Tasol olsem wanem ol Kristen i ken soim olsem ol i laik helpim ol komiuniti we ol i sindaun long en? Wanpela rot em long bihainim tok bilong Jisas olsem: “Yupela i mas i go na kamapim ol disaipel long olgeta lain man, na baptaisim ol long nem bilong Papa na bilong Pikinini na bilong holi spirit. Skulim ol long bihainim olgeta samting mi tokim yupela long mekim.”—Matyu 28:19, 20.

Pasin bilong bihainim tok bilong Jisas long “kamapim ol disaipel” na long stap olsem sol na lait bilong dispela graun, dispela tupela samting i poroman wantaim. (Matyu 5:13, 14) Olsem wanem tupela i poroman wantaim? Na dispela inap mekim wanem long ol manmeri?

Tok Bilong Krais—Lukautim na Givim Lait Long Ol Man

Sol inap lukautim kaikai samting na em i no ken bagarap. Olsem tasol, ol tok em Jisas i givim long ol disaipel long autim long olgeta lain, dispela tok bai lukautim ol man na ol i no ken bagarap. Ol man husat i harim na bihainim ol tok bilong Jisas, ol inap banisim ol yet na ol pasin nogut i no ken pulim na bagarapim ol. Long wanem rot dispela tok i lukautim ol? Ol i kisim save long olsem wanem ol inap abrusim ol pasin em inap bagarapim helt bilong ol, olsem smok samting, na ol i kisim pasin laikim, bel isi, i no les kwik, na gutpela pasin. (Galesia 5:22, 23) Ol dispela gutpela pasin i mekim na ol inap helpim gut komiuniti. Ol Kristen husat i autim dispela gutpela tok long ol neiba, ol i mekim gutpela wok bilong helpim komiuniti bilong ol.

Olsem wanem long tok piksa bilong lait? Mun i save kamapim lait i kam long san, na olsem  tasol ol disaipel bilong Krais i save kamapim “lait” i kam long God Jehova. Ol i givim dispela lait bilong Jehova long ol man long rot bilong autim tok na long ol gutpela wok ol i mekim.—1 Pita 2:12.

Na Jisas i kamapim narapela samting i wankain long pasin bilong i stap olsem lait na stap olsem disaipel, em i tok: “Taim ol man i laitim lam, ol i no save haitim aninit long basket, nogat, ol i save putim antap long tebol na i givim lait long olgeta man i stap long haus. Olsem tasol, lait bilong yupela i mas stap ples klia long ai bilong ol man.” Sapos wanpela lait i stap antap long tebol, planti man inap lukim gut dispela lait. Na wankain long wok autim tok na ol gutpela wok ol Kristen tru i mekim, ol dispela wok i mas i stap ples klia bambai ol man i stap klostu i ken lukim. Bilong wanem? Long wanem, Jisas i bin tok olsem ol man husat i lukim ol dispela gutpela wok ol bai givim glori long God, na i no long ol Kristen.—Matyu 5:14-16.

Olgeta i Gat Wok

Taim Jisas i tok, “Yupela i olsem lait bilong graun” na “lait bilong yupela i mas stap ples klia,” em i bin toktok long olgeta disaipel bilong em. Dispela wok bilong Jisas i no inap kamap long rot bilong sampela man i stap insait long ol narapela narapela lotu, nogat. Olgeta bilipman i mas i stap “olsem lait.” Seven milion Witnes Bilong Jehova, em ol i stap long 235 kantri, ol i bilip olsem ol i gat wok long visitim ol neiba na toktok wantaim ol long gutnius em Krais i laik bai ol disaipel bilong em i mas autim.

Ol Witnes Bilong Jehova i autim wanem tok? Taim Jisas i tokim ol disaipel long autim tok, em i no tokim ol long autim wanpela tok bilong helpim o senisim gavman, o long Misin na Gavman i mas pas gut wantaim, o sampela narapela tingting bilong dispela graun, nogat. Em i tok olsem: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim.” (Matyu 24:14) Olsem na ol Kristen tru long nau i bihainim tok bilong Jisas na wok yet long autim tok long ol man long Kingdom Bilong God—em dispela gavman tasol inap pinisim ol pasin nogut bilong dispela graun em Satan i bosim, na kamapim nupela taim we stretpela pasin i stap long en.

Taim yumi ritim ol Gutnius, i gat 2-pela bikpela samting i stap ples klia long wok bilong Jisas na dispela i mekim sampela samting long ol wok bilong ol Kristen tru long nau. Bai yumi skelim dispela tupela samting long stori i kamap bihain long dispela.

[Rait long pes 8]

Olsem wanem tok ol Kristen i autim i olsem sol?

[Rait long pes 9]

Olsem wanem tok bilong Krais i olsem lam long ples tudak?