Bilong Wanem Yumi Mas Save Long Ol Mirakel?

“Ol mirakel i no stret wantaim ol lo bilong saiens.”—RICHARD DAWKINS, BIPO EM I PROFESA BILONG SAIENS.

“I gat as tru na yumi inap bilip long ol mirakel. Ol mirakel i no pait wantaim bilip bilong lotu, nogat, ol i soim klia pasin bilong God long laikim tru ol samting em i bin wokim.”—ROBERT A. LARMER, PROFESA BILONG FILOSOFI.

“YU BILIP long ol mirakel?” Olsem ol tok i stap antap i kamapim, ol man i gat tingting bilong ol yet na planti taim tingting bilong ol i no wankain liklik. Tasol yu yet bai bekim dispela askim olsem wanem?

Ating bai yu surik long tok, “Yes, mi bilip.” Yu ting olsem nogut yu tok olsem na ol man bai ting yu holim yet bilip bilong ol tumbuna o yu no gat save. Planti man i pilim olsem.

Tasol ating yu bilip olsem tru tru ol mirakel i save kamap. Ating yu bilip long ol mirakel em Baibel i stori long en, olsem stori bilong Moses i mekim solwara Retsi i bruk tupela hap. Na ating yu bilip tu olsem ol mirakel i save kamap long taim bilong yumi. Wanpela ripot i kamap i no longtaim i go pinis i soim olsem “planti manmeri bilong Yurop na Amerika—olsem 75 pesen bilong ol manmeri long Amerika na 38 pesen bilong ol manmeri long Briten i bilip long ol mirakel.” (The Cambridge Companion to Miracles, edited by Graham H. Twelftree) I no ol Kristen tasol i save bilip long ol mirakel. Buk Britannica Encyclopedia of World Religions i tok pasin bilong bilip long ol mirakel “em samting olgeta lotu i mekim.”

O ating yu bai mekim wankain tok olsem sampela narapela husat i tok: “Mi no save, na mi no bisi! Mirakel i no save kamap long laip bilong mi!” Olsem na i gat wanem as na yu mas save long ol mirakel?

Yumi ken tok piksa olsem: Yu gat wanpela sik em ol dokta i no inap long stretim. Sapos yu ritim wanpela gutpela helt magasin i  stori olsem i gat wanpela marasin we inap pinisim sik bilong yu, ating yu bai amamas long lusim sampela haptaim na strong long painimaut gut long dispela marasin, a? Olsem tasol, Baibel i tok promis olsem klostu nau sampela gutpela mirakel bai kamap. Ol dispela mirakel bai helpim olgeta manmeri i stap long graun. I gutpela yu yet i lusim sampela haptaim na strong bilong yu long painimaut gut olsem yu inap bilip long ol dispela promis o nogat.

Tasol paslain long yumi stori long ol dispela mirakel em Baibel i tok promis long en, yumi ken skelim 3-pela tingting kranki ol man i gat long ol mirakel.

[Blok long pes 3]

MIRAKEL EM I WANEM SAMTING?

Em samting i save kamap na i winim tru strong bilong ol man na strong bilong ol samting bilong graun, na ol man i ting wanpela narakain strong i as bilong en.