Kisim Skul Long Tok Bilong God
Yu Ting God Bai Kamapim Wanpela Gavman i Bosim Graun Olgeta?
Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.
1. Bilong wanem ol man i mas i gat wanpela gavman i bosim graun olgeta?
Long nau, ol wankain hevi i save painim ol manmeri long graun olgeta. Long sampela kantri, planti man i stap rabis na ol man i daunim ol. Long ol narapela kantri, planti man i gat planti mani kago, winim ol samting ol i nidim. Wanpela gavman tasol inap bosim graun olgeta na tilim gut ol samting bilong graun long ol man.—Ritim Saveman 4:1; 8:9.
2. Husat tru inap bosim graun olgeta long rot bilong wanpela gavman?
Planti man i no laikim dispela tingting olsem wanpela man tasol inap bosim graun olgeta, long wanem, i no gat wanpela man o meri inap mekim gut dispela wok. I no gat wanpela man bilong graun em olgeta man bai amamas long em. Na tu, ol man i save mekim pasin korapsen taim ol i holim namba. Olsem na ol man i pret long dispela tingting olsem wanpela man nogut bai bosim olgeta manmeri.—Ritim Sindaun 29:2; Jeremaia 10:23.
God Jehova i makim Pikinini bilong em, Jisas, long bosim ol man inap oltaim. (Luk 1:32, 33) Jisas i bin stap long graun na em i bin karim ol hevi. Taim em i stap long graun em i oraitim ol sikman, skulim ol man i gat pasin daun, na stap wantaim ol pikinini. (Mak 1:40-42; 6:34; 10:13-16) Olsem na Jisas em gutpela King bilong bosim ol man.—Ritim Jon 1:14.
3. Wanpela gavman tasol inap bosim graun olgeta?
God i makim Pikinini bilong em long mekim wok king long heven na bosim graun. (Daniel 7:13, 14) Wanpela king bilong graun i no inap stap long olgeta kantri em i bosim, olsem tasol, i no gat wok long Jisas i mas stap long graun bilong bosim ol manmeri.—Ritim Matyu 8:5-9, 13.
Yu ting olgeta man bai amamas long Jisas olsem King? Nogat. Ol man i laikim gutpela pasin, ol tasol bai amamas long em. Jehova bai pinisim ol man husat i sakim dispela King i gat pasin laikim na stretpela pasin, em man Jehova i makim.—Ritim Matyu 25:31-33, 46.
4. Man i bosim graun olgeta bai mekim wanem?
Olsem wasman i save bungim ol sipsip bilong em, Jisas i bungim ol man i gat pasin daun na skulim ol long pasin bilong God long laikim ol man. (Jon 10:16; 13:34) Ol dispela manmeri i gat bikpela laik tru long sapotim Jisas na wok king bilong em. (Song 72:8; Matyu 4:19, 20) Long olgeta hap, ol man i stap gut long Jisas ol i wok bung wantaim bilong tokaut olsem Jisas i kamap King.—Ritim Matyu 24:14.
Klostu nau Jisas bai yusim strong bilong em long pinisim ol gavman i save putim hevi long ol man. Em i makim sampela disaipel bilong em long mekim wok king wantaim em long heven na bosim graun. (Daniel 2:44; 7:27) Kingdom bilong Jisas bai helpim ol man long olgeta hap long save long Jehova, na em bai kamapim gen Paradais i bin lus long taim bilong namba 1 man na meri.—Ritim Aisaia 11:3, 9; Matyu 19:28.
