SAMPELA man i tok i no stret long kwestenim God. Ating ol i pilim olsem ol i no rispek long God sapos ol i askim em long as na em i larim o i no larim sampela samting i kamap. Yu tu i save pilim olsem?

Sapos olsem, ating bai yu kirap nogut long save olsem planti gutpela man i bin kwestenim God. Tingim sampela askim ol i bin kamapim long God:

Gutpela man Jop i tok: “Bilong wanem God i save larim ol man bilong mekim pasin nogut na ol i stap gut na kamap lapun? Na bilong wanem em i save larim ol i kamap bikman na i gat planti samting?”—Jop 21:7.

Gutpela profet Habakuk i tok: “Ol man nogut i wok long bagarapim ol sampela man i gutpela liklik, na yu sindaun lukluk nating. Bilong wanem yu mekim olsem?”—Habakuk 1:13.

Jisas Krais i tok: “God bilong mi, God bilong mi, bilong wanem yu lusim mi?”—Matyu 27:46.

Sapos yu ritim ol ves i stap klostu long ol dispela ves i stap antap, bai yu luksave olsem God Jehova a i no kros taim ol man i mekim ol dispela askim. Yumi no kirap nogut olsem em i larim ol man i kamapim ol dispela askim. Olsem, God i no bel nogut taim yumi askim em long givim yumi kaikai samting em yumi mas kisim bilong lukautim yumi yet. Em i amamas long givim yumi ol samting yumi mas kisim. (Matyu 6:11, 33) Long wankain pasin, em i amamas long givim ol gutpela tok bilong helpim bel na tingting bilong yumi long i stap gut. (Filipai 4:6, 7) Jisas i tokim ol disaipel bilong em: “Wok yet long askim, na yupela bai kisim.” (Matyu 7:7) Ol ves i stap klostu long dispela tok bilong Jisas i soim olsem em i toktok long kisim ol samting bilong skin, na tu, long kisim bekim bilong ol bikpela askim.

Sapos rot i op, yu laik givim wanem bilong ol dispela askim long God?

• I stap bilong mi i gat as bilong en?

• Wanem samting bai kamap taim mi dai?

• Bilong wanem God i larim mi karim pen na hevi?

Baibel i tok, “God em i as bilong olgeta tok i stap long Rait Holi,” olsem na yu inap kisim ol bekim em God i givim long rot bilong Baibel. (2 Timoti 3:16) Skelim samting i kirapim sampela long mekim ol askim i stap antap na ol bekim em Baibel i kamapim.