Magasin nau yu ritim em ol i kirap wokim long Julai 1879. Kirap long dispela taim bipo na i kam ol samting i wok long senis, na dispela magasin tu i wok long senis. (Lukim ol piksa long antap.) Kirap nau long dispela magasin, bai yu lukim sampela senis moa long stail bilong Wastaua. Wanem ol dispela senis?

Long planti kantri, planti manmeri moa i amamas long kisim ol infomesen long rot bilong Intenet. Em i isi tru long ol i ken painim ol infomesen i stap long Intenet tasol. Long nau, yu inap ritim planti buk, ol magasin, na ol niuspepa long Intenet.

Planti man i gat laik long ritim ol samting long Intenet, olsem na mipela i mekim sampela senis long Web-sait www.dan124.com, na bai i isi moa long ol man i ken yusim. Ol man i opim dispela Web-sait ol inap ritim ol buk na nius long winim 430 narapela narapela tokples. Kirap long dispela mun, ol man i save visitim Web-sait bilong mipela inap ritim tu sampela stori i save kamap long ol magasin bilong mipela, em nau ol bai stap tasol long Web-sait bilong mipela long Intenet. a

Mipela bai kamapim planti atikol moa long Intenet, olsem na kirap long dispela magasin, mipela bai wokim pablik Wastaua i gat 16 pes, na i no 32 pes. Nau Wastaua i stap long 204 tokples. Nius Wastaua i no gat planti pes olsem na rot inap op long ol i ken tanim tok bilong dispela magasin i go long planti narapela tokples.

Mipela i bilip olsem ol dispela senis bai mekim na mipela bai helpim planti man moa long kisim save long ol tok bilong Baibel em ol tok bilong seivim laip. Mipela i tingting long wok yet long givim gutpela save bilong Baibel long ol man long rot bilong ol magasin na Intenet, em bilong helpim planti man husat i rispektim Baibel na i laik kisim save long tru tru Baibel i tok wanem.

Lain Bilong Wokim Dispela Nius