Yu laik save long tok i tru bilong God olsem em i husat, wanem samting em i save laikim, wanem samting em i heitim, na wanem laik bilong em? Long Baibel, God Jehova i kamapim klia ol tok i tru long em yet. Tasol i no olgeta man husat i ritim Baibel inap kliagut long dispela tok i tru. Bilong wanem? Long wanem, kain tok i tru em i olsem gutpela presen na i no olgeta man i kisim dispela presen. Yumi ken skelim tok Jisas i mekim long dispela.​—Ritim Matyu 11:25.

Ves i kirap wantaim dispela tok: “Long dispela taim Jisas i mekim dispela tok.” Dispela i makim olsem Jisas i laik mekim tok long samting i bin kamap. I no longtaim i go pinis em i krosim ol manmeri husat i no laik kamap disaipel bilong em long 3-pela taun bilong Galili, em hap em i bin wokim ol strongpela mirakel. (Matyu 11:​20-24) Ating bai yu tingting, ‘Olsem wanem ol man i lukim ol mirakel Jisas i wokim na ol i no bilip long tok i tru em i skulim ol man long en?’ Ol man i no bihainim tok, long wanem, bel bilong ol i pas pinis.​—Matyu 13:​10-15.

Jisas i save olsem bilong kamapim ol tok i tru bilong Baibel, yumi mas i gat tupela samting: Helpim i kam long God na stretpela tingting long bel. Jisas i tok: “Papa, Bikpela bilong heven na graun, mi litimapim nem bilong yu long ai bilong ol man, long wanem, yu bin haitim ol dispela samting long ol man i gat savetingting na ol klevaman, na yu bin kamapim long ol man i stap olsem ol liklik pikinini.” Nau yu inap luksave long as na pasin bilong kliagut long ol tok i tru bilong Baibel, dispela i olsem wanpela presen? Jehova em “Bikpela bilong heven na graun,” em inap haitim o kamapim klia tok i tru i stret wantaim laik bilong em. Tasol olgeta man i gat rot bilong kliagut long tok i tru, bikos God i no save mekim wansait pasin. Bilong wanem God i save kamapim klia tok i tru bilong Baibel long sampela man na sampela narapela, nogat?

Jehova i laikim ol man i gat pasin daun na i no ol man i gat pasin antap. (Jems 4:6) Em i haitim tok i tru long “ol man i gat savetingting na ol klevaman”​—em ol man i gat bikpela save bilong graun na i gat pasin antap na i ting save bilong ol em i samting tru na ol i no nidim helpim bilong God. (1 Korin 1:​19-21) Tasol em i kamapim tok i tru long “ol man i stap olsem ol liklik pikinini,” em ol man i gat gutpela bel na pasin daun. (Matyu 18:​1-4; 1 Korin 1:​26-28) Pikinini Bilong God, Jisas i bin lukim ol kain man olsem. Planti hetman bilong lotu em ol i kisim bikpela skul na i gat pasin antap, ol i no kliagut long tok bilong Jisas, tasol ol man bilong kisim pis em ol i gat pasin daun ol i bin kliagut. (Matyu 4:​18-22; 23:​1-5; Aposel 4:13) Tasol sampela man i gat planti mani kago na gutpela ediukesen na ol i gat pasin daun, ol i kamap disaipel bilong Jisas.​—Luk 19:​1, 2, 8; Aposel 22:​1-3.

Yumi ken tingim askim long kirap bilong dispela atikol olsem: Yu laik save long tok i tru bilong God? Sapos olsem, orait bai yu amamas tru long save olsem God i no save laikim ol man husat i ting ol i gat bikpela save bilong graun. Tasol em i save laikim ol man em ol saveman bilong graun i luk daun long ol. Sapos yu daunim yu yet na stadi long Tok Bilong God, orait Jehova inap givim yu tu gutpela presen, em pasin bilong kliagut long tok i tru bilong em. Taim yu kliagut long tok i tru, dispela inap mekim yu stap amamas long nau na yu inap kisim “laip tru”​—em laip oltaim long nupela taim em klostu nau God bai kamapim na stretpela pasin tasol bai stap long en. a​—1 Timoti 6:​12, 19; 2 Pita 3:13.