Pasin laikim em pasin bilong givim bel tru long narapela na pas gut tru wantaim em. Man i gat pasin laikim, em i save soim olsem em i laikim ol narapela long rot bilong toktok na pasin bilong em, maski em i mas lusim sampela samting bilong em yet long mekim olsem.

Moses i soim olsem em i laikim God. Em i mekim olsem long wanem rot? Tingim tok i stap long 1 Jon 5:3, em i tok: “Pasin bilong laikim God i olsem, yumi bihainim ol lo bilong en.” Moses i bihainim tru dispela stiatok. Long olgeta wok God i askim em long mekim, kirap long ol bikpela wok olsem go toktok wantaim strongpela King Fero na i go inap long ol liklik wok olsem apim stik wokabaut na makim solwara Retsi—Moses i bihainim tok. Maski samting God i askim em long mekim em i isi o i hatwok, Moses i bihainim tok tasol. “Em i mekim olgeta samting.”—Kisim Bek 40:16.

Moses i mekim pasin laikim long ol wanlain Israel. Ol i luksave olsem Jehova i wok long yusim Moses bilong stiaim ol manmeri bilong Em, olsem na ol i kam lukim Moses long stretim ol hevi bilong ol. Baibel i tok: “Planti manmeri i kam long Moses long moningtaim i go inap long apinun tru.” (Kisim Bek 18:13-16) Piksaim long tingting olsem Moses i pilim taiet tru long sindaun de olgeta na putim yau long ol Israel i kamapim hevi bilong ol. Tasol Moses i laikim ol manmeri, olsem na em i amamas long mekim olsem.

Moses i harim gut tok bilong ol, na tu, em i beten bilong helpim ol dispela manmeri em i laikim tumas. Em i beten tu long helpim ol manmeri i rongim em! Olsem, taim susa bilong em Miriam i komplein long Moses, Jehova i mekim sik lepra i kamap long Miriam. Ating Moses inap amamas olsem God i givim strafe long susa bilong em, tasol nogat, em i beten bilong helpim susa bilong em olsem: “God, plis yu ken mekim Miriam i orait gen.” (Namba 12:13) Pasin laikim i bin kirapim Moses long mekim kain beten olsem.

Yumi inap bihainim pasin bilong Moses taim yumi kisim pasin bilong laikim tru God. Dispela kain pasin laikim bai kirapim yumi long bihainim ol lo bilong em “long bel.” (Rom 6:17) Taim yumi bihainim ol lo bilong Jehova long bel, yumi mekim em i amamas. (Sindaun 27:11) Na yumi helpim yumi yet tu. Olsem na taim pasin laikim i kirapim yumi long mekim wok bilong God, yumi bai mekim ol samting i stret, na moa yet yumi bai amamas long mekim olsem!—Song 100:2.

Narapela rot yumi inap bihainim pasin bilong Moses em long daunim laik bilong yumi yet na helpim ol arapela. Taim ol pren na famili i kamapim sampela hevi bilong ol long yumi, pasin laikim i kirapim yumi long (1) givim bel long putim yau long ol; (2) sori long ol o pilim samting ol i pilim; na (3) larim ol i save olsem yu tingim ol.

Olsem Moses, yumi inap beten bilong helpim ol wanfamili bilong yumi. Sampela taim, ating bai yumi pilim olsem yumi no gat rot bilong helpim ol taim ol i kamapim hevi bilong ol long yumi. Yumi inap tok, “Sori tru, mi ken beten bilong helpim yu.” Tingim: “Taim stretpela man i beten strong, dispela beten i gat bikpela pawa na i mekim gutpela wok.” (Jems 5:16) Ol beten bilong yumi inap kirapim Jehova long mekim samting long man em Jehova yet i no gat tingting long mekim. Gutpela samting tru yumi inap mekim long ol manmeri yumi laikim ol, em long beten askim Jehova long helpim ol. a

Ating yu bai wanbel long tok olsem yumi inap kisim planti gutpela skul long Moses. Maski em i man nating wankain olsem yumi, em i stap olsem gutpela piksa long pasin bilong bilip, pasin daun, na pasin laikim. Taim yumi bihainim gut olgeta gutpela pasin bilong em, dispela bai helpim gut yumi yet na ol arapela tu.—Rom 15:4.