Yu inap tingim de pikinini bilong yu i bon? Yu gat laik tru long holim dispela bebi, a? Ol papamama olsem Carlo na Mia, ol i amamas, tasol ol i wari taim ol i kisim save olsem pikinini bilong ol i gat sik o bagarap long bodi.

Yu gat wanpela pikinini i gat bagarap long bodi? Ating bai yu tingting planti long olsem wanem yu inap lukautim em gut. Sapos olsem, no ken wari tumas. Ol papamama olsem yu i bin winim wankain hevi. Skelim 3-pela samting inap givim hevi long yu na olsem wanem savetingting i kam long Baibel inap helpim yu.

Planti papamama i bel hevi taim ol i kisim save olsem pikinini bilong ol i gat sik. Juliana, wanpela mama long Meksiko, i tok: “Mi no bilip taim ol dokta i tok pikinini  man bilong mipela Santiago i gat sik bilong kru (cerebral palsy). Mi pilim nogut tru.” Ol narapela inap pilim wankain olsem Villana, em wanpela mama long Itali, i tok: “Mi laik i gat bebi maski mi save olsem mi winim bikpela krismas na bai i gat sampela hevi. Nau taim pikinini man bilong mi i karim hevi long sik Down syndrome, mi save pilim olsem em asua bilong mi.”

Sapos yu bel hevi o pilim olsem yu gat asua, luksave olsem samting yu pilim em nomol. Em i no laik bilong God olsem ol man i mas sik. (Stat 1:27, 28) Na God i no wokim ol papamama long karim kain hevi olsem. Olsem na em i nomol long papamama i wari long fes taim ol i kisim save long sik bilong pikinini. Sampela haptaim i mas lus na bai yu ken daunim dispela bel hevi na lain long nupela sindaun.

Olsem wanem sapos yu ting em asua bilong yu na pikinini i gat bagarap long bodi? Tingim i no gat man i kliagut long olsem wanem ol jin long bodi bilong pikinini, ples em pikinini i stap long en, na ol narapela samting i nogutim helt bilong pikinini. Ating bai yu laik sutim tok long poroman marit bilong yu. Sakim dispela tingting. I gutpela yu wok bung wantaim poroman bilong yu na oltaim tingting long lukautim pikinini.—Saveman 4:9, 10.

SAMPELA TINGTING: Kisim save long sik bilong pikinini bilong yu. Baibel i tok: “Man i gat gutpela tingting na save, em bai i gat gutpela haus, na famili bilong en bai i kamap strong.”—Sindaun 24:3.

Yu inap kisim sampela save moa long rot bilong ol dokta na ol buk samting. Pasin bilong kisim save long sik bilong pikinini bilong yu i wankain olsem pasin bilong lainim nupela tokples. Pastaim bai hatwok, tasol bihain bai yu save gut.

Carlo na Mia em tok bilong ol i stap long kirap bilong atikol, ol i kisim ol infomesen long dokta bilong ol na long wanpela oganaisesen i save gut long helpim ol man i gat sik Down syndrome. Ol i tok: “Dispela i helpim mipela long kliagut long ol hevi inap kamap, na tu, ol wok samting em man i gat sik Down syndrome inap mekim. Mipela i lukim olsem pikinini bilong mipela inap mekim planti samting olsem ol nomol pikinini i save mekim. Dispela i mekim gut bel bilong mipela.”

Ating bai yu pilim olsem olgeta strong bilong yu i pinis long lukautim sik pikinini. Jenney, wanpela mama long Nu Silan, i tok: “Sampela yia bihain long pikinini man bilong mi i gat sik long baksait bun bilong em (spina bifida), mi save pilim taiet na krai taim mi laik mekim sampela wok moa bilong haus.”

Narapela hatwok em ating yu pilim olsem yu stap wanpis. Pikinini man bilong Ben i gat wanpela kain sik we ol masol bilong em i go slek na sik Asperger’s syndrome. Ben i tok: “Planti man bai i no inap kliagut long sindaun bilong mipela.” Yu bai i gat laik tru long toktok long wanpela. Tasol planti pren bilong yu i gat ol helti pikinini. Olsem na ating yu pilim hatwok long kamapim hevi bilong yu long ol.

SAMPELA TINGTING: Askim ol narapela long helpim yu. Na redi long kisim helpim taim ol i givim. Juliana, em mipela i kamapim tok bilong em antap, em i tok: “Sampela taim mi na man bilong mi i save sem long askim ol narapela long helpim mipela.” Tasol em i tok moa olsem: “Mipela i lain olsem mipela i mas kisim helpim long ol narapela. Taim ol narapela i helpim mipela, mipela i pilim olsem mipela i no stap wanpis.” Sapos wanpela gutpela pren o wanpela long famili i laik sindaun wantaim pikinini bilong yu long bung o long miting Kristen, orait yu ken amamas long mekim olsem. Baibel i tok: “Ol gutpela pren i save laikim yumi long olgeta taim. Tasol ol brata i save sambai long helpim yumi long taim bilong hevi.”—Sindaun 17:17.

Lukautim gut helt bilong yu. Tingim, ambiulens i mas kisim fiul olgeta taim bambai em i ken wok yet long kisim ol sikman i go long haus sik, olsem tasol yu mas wok yet long kisim nupela strong long rot bilong kaikai gut, eksasais, na malolo gut bambai yu ken lukautim gut pikinini bilong yu. Javier, em pikinini man bilong em i gat bagarap long bodi i tok: “Pikinini man bilong mi i no inap long wokabaut, olsem na mi pilim olsem mi mas kaikai gut na bai mi ken kisim em raun!”

Olsem wanem yu ken painim haptaim bilong lukautim helt bilong yu? Sampela papamama i senis senis long lukautim pikinini bilong ol. Narapela poroman inap malolo o mekim sampela samting bilong em yet. Tru bai hatwok, tasol yu mas lusim ol wok i no bikpela samting tumas na bai yu gat haptaim bilong lukautim helt bilong yu. Tasol olsem Mayuri, wanpela mama long India, i tok: “Isi isi dispela bai kamap olsem samting yu save mekim long olgeta taim.”

 Toktok wantaim wanpela gutpela pren. Sampela pren i no gat ol sik pikinini, tasol ol inap putim gut yau long yu. Yu ken beten tu long God Jehova. Yu ting beten bai helpim yu? Yazmin i gat tupela pikinini i gat sik bilong waitlewa (cystic fibrosis), em i tok: “I gat ol taim we mi kisim bikpela presa na mi pilim olsem klostu mi laik dai.” Tasol em i tok moa: “Mi save beten long Jehova bilong kisim gen nupela strong. Na mi save pilim olsem mi gat strong.”—Song 145:18.

Sik bilong pikinini inap mekim na famili bai makim wanem kaikai ol inap kisim, wanem ples ol bai go long en, na haptaim papamama bai lusim wantaim olgeta wan wan pikinini. Dispela inap mekim na ol narapela pikinini i pilim olsem papamama i no tingim ol tumas. Na tu, papamama inap bisi tru long lukautim sik pikinini na dispela i putim hevi long marit bilong ol. Lionel, wanpela papa long Laibiria, i tok: “Sampela taim meri bilong mi i save tok em i mekim olgeta wok, na mi no tingim tumas pikinini man bilong mipela. Mi pilim olsem em i no rispektim mi na sampela taim mi save kros.”

SAMPELA TINGTING: Bilong ol pikinini i ken save olsem yu tingim ol, mekim ol samting we ol i save amamas long en. Jenney i tok: “Sampela taim mipela mekim spesel samting long bikpela pikinini man bilong mipela na kisim em i go kaikai long feiveret haus kaikai bilong em.”

Bilong lukautim marit bilong yupela, toktok na beten wantaim poroman bilong yu. Aseem, wanpela papa long India em pikinini man bilong em i gat epilepsi, i tok: “Sampela taim mi na meri bilong mi i save pilim taiet tru na i laik kros, tasol mipela i makim taim bilong sindaun, toktok, na beten wantaim. Long olgeta moning, paslain long ol pikinini i kirap, mipela i save toktok wantaim long wanpela ves bilong Baibel.” Ol narapela marit i save stap ol yet na toktok wantaim paslain long ol i slip. Pasin bilong yupela long toktok gut wantaim na beten wantaim bai strongim marit bilong yutupela long taim i gat bikpela hevi. (Sindaun 15:22) Tupela marit i tok: “Sampela gutpela taim tru insait long marit bilong mipela we mipela i save pas gut wantaim em taim mipela i gat ol bikpela hatwok.”

Baibel i tok promis olsem klostu nau God bai pinisim olkain sik na bagarap long bodi we i save givim hevi long ol yangpela na lapun wantaim. (Revelesen 21:3, 4) Long dispela taim, ‘i no gat man bai i tok olsem, “Mi gat sik.’” b—Aisaia 33:24.

Nau yet yu ken mekim gut wok bilong yu olsem papamama bilong pikinini i gat bagarap long bodi. Carlo na Mia em mipela i bin kamapim tok bilong ol, i tok: “No ken bel hevi taim i luk olsem ol samting i no kamap gut. Tingim ol gutpela samting pikinini bilong yu inap mekim, na oltaim tingim ol dispela samting.”