“Bikpela, skulim mipela long mekim beten.” (Luk 11:1) Wanpela disaipel i givim dispela askim long Jisas. Bilong bekim askim bilong em, Jisas i kamapim tupela tok piksa i skulim yumi long pasin bilong beten na bai God i ken harim. Sapos sampela taim yu bin tingting olsem God i save harim beten bilong yu o nogat, bai yu amamas long harim bekim bilong Jisas.—Ritim Luk 11:5-13.

Namba 1 tok piksa i stori long wanpela man i beten. (Luk 11:5-8) Long dispela stori, wanpela man i slip long haus na long biknait wanpela wantok i kam lukim em, tasol em i no gat kaikai bilong givim long wantok. Man bilong haus i tingting planti. Maski biknait, em i go long haus bilong wanpela pren na i askim em long sampela bret na bihain em bai bekim. Pastaim pren i no laik kirap, long wanem, famili bilong em i slip wantaim em na ol i slip indai. Tasol dispela man i daunim sem na em i strong yet long askim askim, na bihain pren i les na i kirap na givim sampela kaikai long em. a

Dispela tok piksa i skulim yumi olsem wanem long beten? Jisas i laik tokim yumi olsem yumi mas strong long—askim askim, painim painim, na paitim paitim dua. (Luk 11:9, 10) Bilong wanem? Yu ting Jisas i tok, taim yumi beten, i olsem yumi paitim dua bilong wanpela God i no laik harim beten bilong yumi? Nogat. Poin bilong Jisas em olsem, God i save amamas long givim ol samting long ol man i bilip strong long em na ol i beten, em i no olsem dispela pren i no laik opim dua. Yumi soim olsem yumi gat dispela kain bilip taim yumi wok strong long beten. Taim yumi wok long askim askim, yumi kamapim klia olsem yumi nidim tru samting yumi askim long en na yumi bilip tru olsem God inap givim long yumi—sapos dispela em laik bilong em.—Mak 11:24; 1 Jon 5:14.

Namba 2 tok piksa bilong Jisas i stori long ‘Man bilong harim beten,’ em Jehova. (Song 65:2) Jisas i askim: “Wanem papa namel long yupela bai givim snek long pikinini man taim em i askim long wanpela pis? O givim wanpela skopion taim em i askim long wanpela kiau?” Bekim i klia tru—i no gat wanpela gutpela papa i save givim ol samting nogut long pikinini bilong em. Nau Jisas i kamapim mining bilong tok piksa: Sapos ol papa long graun i gat sin ol i save “givim ol gutpela presen” long ol pikinini bilong ol, ‘orait yumi ken save tru olsem Papa long heven bai givim holi spirit’—em nambawan presen tru—long ol pikinini bilong em long graun husat i askim em! b—Luk 11:11-13; Matyu 7:11.

Dispela tok piksa i skulim yumi olsem wanem long Jehova, em ‘Man bilong harim beten’? Jisas i laik bai yumi tingim Jehova olsem wanpela Papa i save tingim gut yumi na em i laik tru long helpim ol pikinini bilong em. Olsem na ol manmeri i lotuim Jehova ol i ken save, ol inap i go long em long rot bilong beten na askim em long ol samting ol i laikim. Taim ol i save olsem, em i laik bai ol i gat samting bilong helpim ol, ol i redi long kisim samting em i olsem bekim bilong beten bilong ol, maski ol i no kisim stret samting ol i bin tingim. c