SAMPELA taim yumi olgeta i bin bel hevi na tingting planti na yumi pilim olsem yumi mas singaut long wanpela i helpim yumi, a? Ating bai yumi tingim samting i mekim yumi bel hevi na yumi askim wanpela pren i gat pasin sori na em i gat save long kain hevi i painim yumi. Man i gat pasin sori na em i gat save long ol hevi, em i gutpela pren tru.

Ating sampela i pilim olsem long taim ol i laik beten. Ol i pret liklik long beten long God, bikos ol i ting em i antap tru long yumi ol man na em i gat bikpela strong, olsem na ol i laik beten long wanpela santuman. Ol i ting ol dispela santuman i bin karim ol wankain hevi olsem i save painim yumi, olsem na ol bai pilim gut ol hevi bilong yumi. Olsem: Ol manmeri i bin lusim wanpela samting i bikpela samting tru long ol, ating ol i laik singaut long “Santu” Antoni bilong Padua—em i save helpim ol man em sampela samting bilong ol i lus. Sapos ol i laik beten bilong helpim animal i gat sik, ating ol bai singaut long “Santu” Fransis bilong Assisi, o long “Santu” Jut Tadius sapos bel bilong ol i bagarap stret long wanpela samting.

Tasol olsem wanem yumi ken save pasin bilong beten long ol santuman i stret wantaim ol tok bilong Baibel o nogat? Beten i olsem yumi toktok na kamapim bel bilong yumi long God, olsem na yumi laik save: God i save harim beten bilong yumi? Na i gutpela yumi askim olsem: God i ting olsem wanem long pasin bilong beten long ol santuman?

As bilong pasin bilong beten long ol santuman em wanpela bilip bilong Misin Katolik olsem ol santuman i rot bilong bringim tok bilong yumi i go long God. Buk New Catholic Encyclopedia i tok, ‘yumi ken beten askim God long marimari long yumi long rot bilong wanpela man em God i orait long em i mekim dispela wok.’ Olsem na taim man i beten long ol santuman, em i laik bai God i ken mekim gut long em long rot bilong ol santuman em God i orait long ol.

Yu ting dispela bilip i stap long Baibel? Sampela i tok, ol tok aposel Pol i bin raitim i stap olsem as bilong pasin bilong beten long ol santuman. Olsem: Em i raitim tok i go long ol Kristen long Rom olsem: “Ol brata, long nem bilong Bikpela Jisas Krais na long rot bilong pasin laikim em holi spirit i kamapim, mi laik kirapim yupela long wok strong wantaim mi long beten long God long helpim mi.” (Rom 15:30) Yu ting Pol i askim ol Kristen long i stap olsem namelman bilong bringim beten bilong em i go long God? Nogat. Sapos i mas i gat namelman, ating ol bai askim Pol yet, em wanpela aposel bilong Krais, long i stap olsem namelman bilong ol long taim ol i beten. Pol i laik soim olsem i stret long askim wanpela Kristen long beten long God bilong helpim yumi. Tasol dispela em i narapela kain long pasin bilong beten long wanpela em ol man i ting em i stap long heven na em i tokim  God long ol samting yumi askim long en. Olsem wanem dispela i narapela kain?

Long Gutnius bilong aposel Jon, Jisas i tok: “Mi yet mi rot na tok i tru na laip. I no gat man inap kam long Papa long narapela rot, nogat, long rot bilong mi tasol.” (Jon 14:6) Na em i tok: “Wanem wanem samting yupela i askim Papa long en long nem bilong mi, em bai givim long yupela.” (Jon 15:16) Jisas i no tok yumi mas beten long em na nau em bai kamapim dispela beten long God bilong helpim yumi, nogat. Bilong God i ken harim beten bilong yumi, yumi mas beten long God long rot bilong Jisas tasol na i no long rot bilong narapela.

Taim ol disaipel i askim Jisas long skulim ol long beten, Jisas i tok: “Taim yupela i beten, yupela i mas tok: ‘Papa, mekim holi nem bilong yu.’” (Luk 11:2) Em nau, long “taim” yumi beten, yumi mas beten long God yet na i no long Jisas o long narapela. Yumi tingim ol dispela tok Jisas i skulim yumi long en na yumi save olsem yumi mas beten long God long rot bilong Jisas Krais, na i no long rot bilong ol “santuman” o long ol narapela.

Beten em i bikpela samting tru long lotu bilong yumi, na sapos yumi lotuim narapela na yumi no lotuim God, dispela i no stret liklik wantaim ol tok bilong Baibel. (Jon 4:23, 24; Revelesen 19:9, 10) Em as na yumi mas beten long God wanpela tasol.

Long Bikpela Tok Long Maunten, Jisas i tok piksa long wanpela pikinini i askim papa long sampela kaikai. Yu ting papa bai givim ston long em sapos em i singaut long bret? O sapos pikinini i singaut long wanpela pis, yu ting papa bai givim snek nogut long em? (Matyu 7:9, 10) Nogat tru! Gutpela papa i no inap tru long mekim olsem!

Orait tingim wanpela tok piksa i wankain liklik na i kamapim tingting papa i gat. Pikinini bilong yu i laik askim yu long wanpela samting. Long olgeta taim yu bin mekim gut long pikinini na yutupela i stap gutpela pren na em i no save pret long kamapim tingting bilong em long yu. Tasol em i pret nating long samting yu bai mekim na nau em i askim narapela long i go tokim yu long samting em i laikim. Bai yu pilim olsem wanem? Sapos oltaim pikinini i wok long toktok long yu long rot bilong dispela narapela man na em i no laik toktok stret wantaim yu, na i luk olsem em bai wok yet long mekim olsem? Bai yu amamas long dispela pasin? Nogat tru! Ol gutpela papa i laik bai pikinini i go stret na toktok wantaim ol na i no pret long askim long samting ol i laikim.

Jisas i kamapim mining bilong tok piksa long pikinini i askim papa long kaikai, na em i tokim bikpela lain manmeri olsem: “Sapos yupela ol man nogut inap givim ol presen long ol pikinini bilong yupela, orait yupela i ken save tru olsem Papa bilong yupela long heven bai givim ol gutpela samting long ol man i askim em!” (Matyu 7:11) Yumi save, ol papa i gat bikpela laik long givim ol gutpela samting long pikinini bilong ol. Na Papa bilong yumi long heven em i gat bikpela laik moa yet long harim ol beten bilong yumi na helpim yumi.

God i laik bai yumi go stret long em long rot bilong beten, maski yumi bel hevi long ol popaia na pasin kranki bilong yumi. Em i no save makim ol narapela long harim ol beten bilong yumi, nogat. Baibel i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu.” (Song 55:22) Yumi no ken wetim wanpela santuman o narapela i bringim beten bilong yumi i go long God, nogat, i gutpela yumi holim stretpela tingting long God Jehova.

Papa bilong yumi long heven em i save tingim yumi olgeta wan wan. Em i laik helpim yumi long karim ol hevi bilong yumi na em i singautim yumi long i go klostu long em. (Jems 4:8) Yumi amamas tru long yumi gat rot long singaut na beten long God na Papa bilong yumi, em ‘Man bilong harim beten’!—Song 65:2.