Sapos yu papa o mama bilong wanpela tineja, pasin bilong tok pait em wanpela hatwok yu mas karim na yu no ken les kwik. Maria, em mama bilong wanpela tineja husat i gat 14 krismas long Brasil, i tok: “Taim pikinini meri bilong mi i sakim tok bilong mi na i laik bosim em yet, dispela i save mekim mi belhat nogut tru. Dispela i mekim na mipela i save kros na bikmaus long narapela narapela.” Carmela, em wanpela mama long Itali i bungim wankain hevi. Em i tok: “Taim mitupela pikinini man bilong mi i tok pait, oltaim dispela tok pait i save go bikpela na em i save lokim em yet long rum bilong em.”

I gat wanem as na sampela tineja i laik tok pait long olgeta taim? Yu ting ol i bihainim pasin bilong ol wanlain bilong ol? Ating i olsem. Baibel i tok, ol man yu poroman wantaim i gat bikpela strong long pulim yu long mekim gutpela pasin o pasin nogut. (Sindaun 13:20; 1 Korin 15:33) Na tu, ol musik na muvi samting bilong nau i strongim dispela tingting olsem em i nomol long ol yangpela i bikhet na i no soim rispek long ol narapela.

Tasol i gat sampela samting yu mas tingim, em ol samting i no hatwok long stretim taim yu kliagut long hau ol i mekim sampela samting long tineja bilong yu. Tingim sampela eksampel.

Aposel Pol i tok: “Taim mi stap pikinini, mi save toktok olsem pikinini, na tingting olsem pikinini, na skelim ol samting olsem pikinini. Tasol nau mi kamap  man pinis, na mi lusim pinis ol pasin bilong pikinini.” (1 Korin 13:11) Olsem tok bilong Pol i kamapim, ol pikinini na ol papamama i gat narapela narapela tingting long ol samting. Hau na i olsem?

Ol liklik pikinini i save bilipim olgeta samting. Tasol ol man i bikpela pinis, planti taim ol i save skelim gut ol samting i hatwok long save long en na tingting gut long ol samting taim ol i mekim ol disisen. Olsem, ol manmeri i bikpela pinis ol inap skelim ol samting na save sapos em i stret o i no stret na ol inap wokim tingting long olsem wanem pasin bilong ol inap mekim sampela samting long ol narapela. Tingting bilong ol i lain pinis long mekim olsem. Tasol dispela kain tingting em nupela samting long ol tineja.

Baibel i strongim ol yangpela long wok yet long kisim “gutpela tingting.” (Sindaun 1:4) Baibel i kirapim olgeta Kristen long yusim “gutpela tingting.” (Rom 12:1, 2; Hibru 5:14) Tasol sampela taim, pasin bilong tineja bilong yu long skelim na wokim tingting long wanpela samting inap kirapim em long tok pait wantaim yu, maski em liklik samting tasol. O ating em i kamapim wanpela tingting bilong em long yu, tasol dispela tingting bilong em i no stret. (Sindaun 14:12) Long kain taim olsem, yu inap mekim wanem bilong stretim tingting bilong em na yupela i no tok pait?

Tasol tingim dispela: Taim yu helpim tineja long stretim tingting bilong em, no ken tingting long soim olsem yu rait. Maski i luk olsem em i no harim tok bilong yu, ating em i lainim planti samting long dispela tok, tasol em i no laik tokaut long dispela. No ken kirap nogut sapos sampela de bihain tineja bilong yu i senisim tingting na bihainim tingting bilong yu na ating em bai strong olsem dispela em tingting bilong em yet.

“Sampela taim mi na pikinini man bilong mi i save kros long ol liklik samting—olsem, em i no ken westim ol kaikai samting o mekim ol tok bilong sutim bel bilong susa bilong em. Tasol planti taim i luk olsem em i laik mi askim em long tingting bilong em na kliagut long samting em i pilim na mekim kain tok olsem: ‘So samting i kamap em olsem’ o ‘So em tingting yu gat.’ Nau mi luksave olsem, sapos mi bin mekim ol kain tok olsem, ating mipela bai i no tok pait.”—Kenji, Japan.

Wanpela bikpela wok bilong mekim bikpela long tineja em bilong redim em long taim we em bai kamap bikpela man o meri na wokim ol disisen bilong em yet. (Stat 2:24) Wanpela hap bilong dispela wok em bilong helpim pikinini long luksave long em i laik kamap wanem kain man, olsem ol pasin, ol bilip, na ol stretpela tingting we bai makim em i husat tru. Taim ol narapela i putim presa long em long mekim samting i no stret, tineja husat i makim pinis wanem kain man em i laik kamap bai tingting gut long samting i laik painim em. Na tu, em bai askim em yet: ‘Mi wanem kain man? Mi gat wanem kain ol pasin? Man i gat ol dispela kain pasin bai mekim wanem long kain taim olsem?’—2 Pita 3:11.

Baibel i stori long Josep, em wanpela man i save gut tru long em i laik kamap wanem kain man. Olsem, taim meri bilong Potifar i laik pulim em long slip wantaim em, Josep i tok: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.” (Stat 39:9) Maski lain Israel i no kisim yet wanpela lo i tambuim pasin adaltri, Josep i kisim tingting bilong God long dispela samting. Bikpela samting moa, dispela tok, “olsem wanem bai mi mekim dispela pasin,” i kamapim klia olsem Josep i kisim tingting bilong God na dispela i kamap olsem pasin bilong em.—Efesus 5:1.

Tineja bilong yu tu i stap long taim we em bai makim wanem pasin em i laik bihainim. Dispela em i gutpela, bikos ol samting em i bilip long en bai helpim em long winim presa bilong ol wanlain i laik pulim em na kamapim klia bilip bilong em. (Sindaun 1:10-15) Tasol dispela inap mekim tu na em bai strongim sait bilong em taim yu toktok long em. Yu ken mekim wanem sapos dispela samting i kamap?

Taim tineja i kisim ol pasin na bilip bilong em yet, dispela em i nomol, na inap helpim em. Baibel i tok ol Kristen i no ken stap olsem ol liklik pikinini em “olgeta kain tok i pulim ol nabaut olsem biksi na win i sakim nabaut ol samting.” (Efesus 4:14) Olsem na givim rot long tineja, na tu, strongim em long kisim ol pasin na bilip bilong em yet.

“Taim mi soim ol pikinini meri bilong mi olsem mi redi long harim tingting bilong ol, ol i save redi long harim tingting bilong mi, maski ol i gat narapela tingting. Mi save was gut long mi no ken fosim ol long bihainim tingting bilong mi, ol yet i mas wokim tingting.”—Ivana, Sek Ripablik.

Olsem ol liklik pikinini i save mekim, sampela tineja bai wok yet long toktok long wanpela samting planti taim bilong mekim papamama i les pinis na tok orait tasol. Sapos kain samting olsem i save kamap planti taim long famili bilong yu, orait was gut. Maski yu tok orait long ol bambai yu ken stap bel isi, dispela i skulim tineja bilong yu olsem pasin bilong strongim sait em rot bilong kisim samting em i laikim. Wanem samting inap helpim yu? Bihainim tok bilong Jisas: “‘Yes’ bilong yupela i mas minim yes tasol, na ‘Nogat’ bilong yupela i mas minim nogat tasol.” (Matyu 5:37) Ol tineja i no inap tok pait wantaim yu taim ol i save olsem yu strong long holim wankain tingting long olgeta taim.

Long wankain taim, bihainim gutpela tingting. Olsem, larim tineja bilong yu i eksplenim sait bilong em long as na em i pilim olsem yu mas skruim taim yu makim bilong em i kam bek long haus. Long kain taim olsem, yu no bihainim nating laik bilong pikinini, tasol yu laik bihainim tok bilong Baibel olsem: “Olgeta man i mas save olsem yupela i save bihainim gutpela tingting.”—Filipai 4:5.

Em tru olsem i no gat wanpela papamama i gutpela olgeta. Baibel i tok: “Planti taim yumi olgeta i save popaia.” (Jems 3:2) Sapos yu luksave olsem yu gat hap asua long tok pait i kamap, orait yu mas tok sori long tineja bilong yu. Taim yu tokaut long popaia bilong yu, yu stap gutpela piksa long pasin daun na dispela bai opim rot long tineja long mekim wankain pasin.

“Wanpela taim mipela i kros na taim bel bilong mi i kol, mi tok sori long pikinini man bilong mi long mi bin kros long em. Dispela i helpim em long daunim belhat bilong em na isi long em i harim tok bilong mi.”—Kenji, Japan.