Mi bon long Riga, em biktaun bilong Latvia. Mama i bin mekim bikpela long mi na susa bilong mi. Maski mama bilong mi em i wanpela Katolik, mipela i save go lotu tasol long ol bikpela de bilong lotu. Oltaim mi save bilip olsem wanpela samting i gat bikpela strong i stap, tasol mi yangpela na i gat planti samting mi laik mekim na dispela i pulim nabaut tingting bilong mi.

Taim mi wok long kamap bikpela, Mama i luksave olsem mi gat gutpela save long rausim ol samting na joinim gen. Em i save wari long lusim mi stap wanpis long haus bikos i gat planti samting long haus we mi ken rausim na joinim. Olsem na em i givim mi wanpela metal toi we mi mas kamautim ol pats bilong en na joinim gen. Dispela samting mi amamas long mekim i poroman gut wantaim narapela laik bilong mi, em long resis long motobaik. Mama bilong mi i putim mi long wanpela motobaik resis em ol i kolim Zelta Mopēds (The Golden Moped). Pastaim mi kirap long raidim ol baisikol i gat moto long en na bihain mi raidim ol motobaik stret.

Mi save lain hariap long ol samting, olsem na i no longtaim mi kamap hapman bilong dispela spot we inap bagarapim man. Tripela taim mi winim bikpela motobaik resis bilong Latvia, na tupela taim mi winim Baltic States Superbike Championship.

Long dispela haptaim we mi wok long kisim biknem long winim ol motobaik resis, gelpren bilong mi Evija (bihain em i kamap meri bilong mi) i bungim ol Witnes Bilong Jehova. Em i painim sampela buk na nius bilong ol we i gat ol fom bilong askim wanpela Witnes long i kam stadi Baibel wantaim em. Em i raitim nem na atres bilong em long dispela fom na em i salim i go long ol. I no longtaim, tupela Witnes i visitim em na em i kirap stadi Baibel wantaim  ol. Mi orait long dispela, tasol long dispela taim mi no gat bikpela laik long ol samting bilong lotu.

Bihain ol Witnes i invaitim mi long sindaun wantaim ol long Baibel stadi bilong Evija. Mi orait long dispela, na mi amamas long ol tok mi harim. Wanpela samting mi harim na mi pilim tru long bel em tok promis bilong Baibel long Paradais bai kamap long graun. Olsem, ol i soim mi tok bilong Song 37:10, 11, em i tok: “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” Dispela promis i mekim gut tru bel bilong mi.

Laik bilong mi long kisim save long Baibel i wok long go bikpela. Mi luksave olsem i gat planti tok giaman em ol lotu i skulim ol man long en. Tasol mi kirap nogut olsem ol tok bilong Baibel i stret na i klia tru.

Taim mi wok long stadi long Baibel, mi kisim save olsem Jehova i save tingim tru laip, na laip em i bikpela samting tru long ai bilong em. (Song 36:9) Dispela i mekim bikpela senis long pasin bilong mi long resis, mi no gat laik moa long mekim samting bilong bagarapim laip bilong mi. Mi laik yusim laip bilong mi long onarim Jehova. Olsem na biknem, ona, na amamas bilong insait long resis bilong motobaik i no stap moa olsem bikpela samting long mi.

Long 1996, mi go long wanpela kibung intenesenel bilong ol Witnes Bilong Jehova long Talin, Estonia, em klostu long stediam we bipo mi bin resis planti taim long en. Long dispela kibung, mi lukim ol manmeri bilong planti narapela narapela kantri ol i stap wanbel wantaim na bel isi. Olsem, paus bilong wanpela Witnes i lus, na mi ting olsem em bai i no inap kisim bek gen. Tasol i no longtaim, narapela Witnes i painim dispela paus na i givim bek long em na i no gat wanpela samting insait long paus i lus. Mi kirap nogut tru long dispela! Nau mi kliagut olsem ol Witnes i bihainim ol stretpela lo bilong Baibel long i stap bilong ol. Mitupela Evija i wok yet long stadi na long 1997 mipela i kisim baptais olsem ol Witnes Bilong Jehova.

Sampela pren bilong mi i dai bikos ol i save insait long dispela wail resis bilong spit long motobaik. Long rot bilong stadi long Baibel, mi kisim save olsem mi mas mekim samting bilong amamasim Man Bilong Givim laip, Jehova. Dispela save mi kisim i lukautim laip bilong mi.

Inap 4-pela yia, mi na Evija i amamas long insait long fultaim sevis long brens ofis bilong ol Witnes Bilong Jehova long Riga. Nau mipela i amamas long mekim bikpela long pikinini meri bilong mipela, Alise, na helpim em long laikim Jehova. Gutpela samting long nau em mi inap lusim wanpela de long olgeta wik long wok long trenslesen ofis, na stretim ol kar na ol narapela samting i bruk. Mi amamas olsem mi inap mekim gutpela wok yet long save mi bin kisim taim mi liklik! Long nau, mi wok yet long rausim ol samting na joinim ol gen.

Mi amamas tru olsem mi na famili bilong mi inap autim tok long ol narapela long dispela wanpela God tru, na mi tenkyu olsem save mi kisim long Baibel i helpim mi long mekim olsem. Tru tumas, tok promis long graun bai kamap Paradais i senisim laip bilong mi!