Anthony: Moning Tim. Mi amamas long lukim yu.

Tim: Mi tu, mi amamas long lukim yu.

Anthony: Mi bringim ol nupela Wastaua na Kirap! bilong yu. Mi save olsem yu bai amamas tru long ritim ol stori i stap long ol dispela nius.

Tim: Tenkyu. Gutpela yu kam, long wanem, mi laik askim yu long wanpela samting.

Anthony: Em gutpela. Yu gat wanem askim?

Tim: Asde mi toktok wantaim wanpela wanwok. Mi tokim em long ol nius yu givim mi na ol gutpela tok i stap insait long en. Tasol em i tok mi no ken ritim ol dispela nius bikos ol Witnes Bilong Jehova i no bilip long Jisas. Olsem na mi tokim em olsem bai mi askim yu taim yu kam bek long lukim mi.

Anthony: Gutpela yu kamapim dispela askim long wanpela Witnes Bilong Jehova. Sapos yu laik save long bilip bilong wanpela man, i gutpela yu askim dispela man yet, a?

Tim: Yu tok stret, mi tu i gat dispela tingting.

Anthony: Ol Witnes Bilong Jehova i bilip long Jisas. Bilong God i ken kisim bek yumi, em i bikpela samting long yumi mas bilip long Jisas.

Tim: Mi save olsem yu bilip long Jisas, tasol taim wanwok i tok yupela i no bilip long Jisas, dispela i mekim na mi tingting planti. Ating yumi no bin stori liklik long dispela samting, a?

Anthony: I gutpela yumi ken lukim sampela skripsa bilong Baibel i kamapim klia olsem yumi mas bilip long Jisas. Planti taim ol Witnes Bilong Jehova i save kamapim ol dispela skripsa taim ol i autim tok long ol man.

Tim: Em orait.

Anthony: Pastaim yumi ken ritim tok Jisas i mekim long Jon 14:6. Em i bin kamapim dispela tok taim em i stori wantaim wanpela aposel bilong em. Dispela ves i tok: “Jisas i tokim em: ‘Mi yet mi rot na tok i tru na laip. I no gat man inap kam long Papa long narapela rot, nogat, long rot bilong mi tasol.’” Olsem dispela ves i tok, wanem wanpela rot tasol bilong i go long Papa?

Tim: Em long rot bilong Jisas.

Anthony: Yes. Ol Witnes Bilong Jehova i bilip long dispela. Mi laik askim yu: Long save yu bin kisim long ol lo bilong God, taim man i beten, em i mas beten long nem bilong husat?

Tim: Em i mas beten long nem bilong Jisas.

Anthony: Yes. Em as na mi save kolim nem bilong Jisas long olgeta beten bilong mi. Na i wankain tu long olgeta beten ol Witnes Bilong Jehova i save mekim.

Tim: Mi amamas long save long dispela.

Anthony: Narapela tok bilong Baibel yumi ken ritim, em Jon 3:16. Olsem: Sapos yu bungim olgeta tok ol i raitim long i stap na wok bilong Jisas long graun i go long wanpela ves tasol, dispela skripsa long Jon 3:16 bai kamapim ol bikpela tok i stap long ol Gutnius. Yu laik ritim dispela ves?

Tim: Em i tok: “God i laikim tumas olgeta manmeri bilong graun, olsem na em i givim dispela Pikinini  tru bilong en long ol bai olgeta man husat i bilip long em ol inap abrusim bagarap na kisim laip oltaim.”

Anthony: Tenkyu long ritim. Yu save long dispela ves?

Tim: Yes, mi harim planti man i kolim dispela tok, na tu, mi save lukim ol i raitim na putim long ol pablik ples samting.

Anthony: Em nau, planti man i save long dispela ves. Yumi ken skelim gen tok bilong Jisas. Em i tok: Pasin laikim bilong God i opim rot long ol man i ken kisim laip oltaim, tasol yumi mas mekim wanem?

Tim: Yumi mas bilip.

Anthony: Em i stret. Yumi mas bilip long dispela wanpela pikinini tru bilong God, em Jisas Krais. Na dispela tok olsem pasin bilong bilip long Jisas i opim rot long ol man i ken kisim laip oltaim, em i stap long pes 2 bilong dispela nius. Wanpela wok bilong nius Wastaua em bilong “kirapim yumi long bilip long Krais Jisas, husat i bin dai bambai yumi ken kisim laip i stap oltaim na nau em i mekim wok king long Kingdom Bilong God.”

Tim: Nau mi save. Ol nius bilong yupela i kamapim klia olsem ol Witnes Bilong Jehova i bilip long Jisas.

Anthony: Yu tok stret.

Tim: Tasol wai ol man i save tok yupela i no bilip long Jisas?

Anthony: I gat planti as na ol man i mekim kain tok olsem. Sampela i tok olsem bikos ol i harim ol narapela i mekim dispela tok. O ating pasto bilong ol i bin skulim ol long dispela tingting kranki.

Tim: Sampela man i tok yupela i no bilip long Jisas bikos yupela i kolim yupela yet olsem Ol Witnes Bilong Jehova, na i no Ol Witnes Bilong Jisas.

Anthony: Ating em wanpela as na ol i ting olsem.

Tim: Wai na planti taim yupela i save stori long Jehova?

Anthony: Olsem Jisas i bin mekim, mipela i bilip olsem em i bikpela samting long kamapim nem tru bilong God, em Jehova. Yumi ken lukim tok Jisas i mekim taim em i beten long Papa bilong em. Dispela tok i stap long Jon 17:26. Yu laik ritim dispela ves?

Tim: Orait. Em i tok: “Mi bin kamapim nem bilong yu long ol na mi bai kamapim moa yet. Bai ol i ken kamapim pasin bilong laikim ol arapela olsem yu bin laikim mi, na bai mi ken pas wantaim ol.”

Anthony: Lukim tok bilong Jisas, em i tok em i bin kamapim nem bilong God long ol man. Wai na Jisas i mekim olsem?

Tim: Mi no klia long dispela.

Anthony: Bilong helpim yumi kliagut long dispela tok, yumi ken ritim narapela ves. Yumi ken ritim Aposel 2:21. Em i tok: “Olgeta man husat i singaut long nem bilong Jehova, em bai kisim bek ol.” Em nau, sapos yumi singaut long nem bilong Jehova bilong em i ken kisim bek yumi, orait yumi ken ting Jisas i save long dispela samting em yumi mekim, a?

Tim: Mi wanbel long dispela tok.

Anthony: Jisas i save olsem em i bikpela samting long lain bilong em i mas save long nem bilong God na kolim dispela nem na bai Em i ken kisim bek ol. Na dispela em i as na planti taim mipela i save stori long Jehova. Mipela i bilip olsem em i bikpela samting long kamapim nem tru bilong God na helpim ol narapela man long kolim dispela nem.

Tim: Ol man i save olsem ol i toktok long God, maski ol i no save long nem bilong em o ol i no save kolim dispela nem.

Anthony: Tasol taim God i tokim yumi long nem bilong em, em i opim rot long yumi ken go klostu long em.

Tim: Mi no kisim gut tok bilong yu.

Anthony: Tingim dispela: Maski sapos yumi no save long nem bilong Moses, yumi ken tingim em  olsem man bilong brukim solwara Retsi o man bilong kisim Tenpela Lo. Na i wankain tu long Noa. Maski sapos yumi no save long nem bilong em, yumi ken kolim em olsem man husat i bin wokim sip na i helpim famili bilong em na ol animal long abrusim bagarap. Na tu, yumi ken tingim Jisas Krais olsem man husat i bin lusim heven na kam daun long graun, na em i dai bilong tekewe ol sin bilong yumi, em i stret, a?

Tim: Ating olsem.

Anthony: Tasol God i laik bai yumi ken save long nem tru bilong ol dispela man. Taim yumi save long nem tru bilong ol, yumi inap pilim tru ol stori bilong ol long Baibel. Tru, yumi no bin bungim Moses, Noa na Jisas, tasol taim yumi save long nem tru bilong ol, yumi tingim ol olsem ol man i bin stap tru.

Tim: Mi no bin tingim dispela, tasol tok bilong yu i stret!

Anthony: Na dispela em narapela as na planti taim ol Witnes Bilong Jehova i save kamapim nem tru bilong God. Mipela i laik helpim ol man long bilip olsem God Jehova em wanpela Man i stap tru na ol inap i go klostu long em. Na tu, mipela i laik helpim ol man long save olsem Jisas i mekim bikpela wok long kisim bek yumi. I gutpela sapos yumi ken ritim narapela skripsa bilong Baibel bilong helpim yumi long klia long dispela tok.

Tim: Em orait.

Anthony: Taim yumi ritim Jon 14:6, Jisas i tok em yet i “rot na tok i tru na laip.” Orait yumi ken lukim wanpela ves i stap paslain long dispela, long Jon 14:1. Inap yu ritim tok bilong Jisas long laspela hap bilong dispela ves?

Tim: Em i tok: “Yupela i mas bilip long God, na bilip long mi tu.”

Anthony: Tenkyu long ritim dispela ves. Yu ting yumi ken bilip long wanpela tasol, olsem bilip long Jisas o bilip long Jehova?

Tim: Nogat. Jisas i tok yumi mas bilip long tupela wantaim.

Anthony: Em i stret. Tasol i no olsem yumi mas bilip long God na Jisas na em tasol, nogat. Toktok na pasin bilong yumi i mas kamapim klia olsem yumi gat bilip.

Tim: Mi wanbel long tok yu mekim!

Anthony: Tasol olsem wanem man inap kamapim klia olsem em i bilip tru long God na Jisas? Yumi ken stori long dispela askim long narapela taim. a

Tim: Em bai gutpela.