JOSEP i smelim ol naispela plaua na gras samting na em i lukim win i sakim ol. Em i bihainim lain bisnisman wantaim ol kamel bilong ol, na nau ol i wokabaut isi isi i go long ples daun bilong wara Nail. Piksaim long tingting olsem ol dispela man i stiaim ol kamel long bihainim arere bilong wara long i go long narapela taun bilong Isip, na long wankain taim ol i lukim ol pisin i flai antap long wara. Josep i tingim gen ples bilong em i stap longwe tru, em long ol ples maunten bilong Hebron. Tasol nau em i stap long narapela ples olgeta.

Piksaim tu olsem ol monki i sindaun antap long ol diwai det na ol diwai fik, na ol i lap na pilai. Josep i hatwok long kliagut long tok bilong ol man em ol i bungim long rot. Ating em i traim long lainim sampela tok long tokples bilong ol. Nau Josep i tingting olsem i gutpela em i lainim dispela tokples, long wanem, em bai i no inap go bek long ples bilong em.

Josep i gat 17 o 18 krismas samting, tasol em i bungim kain kain presa we i save painim ol man i bikpela pinis. Ol brata bilong em i bin jeles long em, long wanem, ol i lukim olsem papa bilong ol i laikim em tumas. Dispela pasin i mekim na ol i laik kilim em i dai. Tasol ol i no mekim olsem, ol i salim em long sampela bisnisman. (Stat 37:2, 5, 18-28) Nau Josep na ol dispela bisnisman i wokabaut inap sampela wik, na ol i kamap klostu long wanpela biktaun. Ol bisnisman i amamas tru, long wanem, ol i save olsem ol bai kisim bikpela winmani taim ol i salim Josep na ol kago bilong ol. Tasol wanem samting i helpim Josep long daunim bel hevi bilong em? Na olsem wanem yumi inap long daunim ol bel hevi bilong yumi na bilip bilong yumi i ken stap strong? Yumi inap kisim planti gutpela skul long pasin bilong Josep.

“Ol Ismael i bringim Josep i go long Isip na Potifar i baim em olsem wokboi nating. Potifar em i man bilong Isip na em i wanpela ofisa bilong king bilong Isip. Em i kepten bilong ol soldia i save was long bikpela haus bilong king bilong Isip.” (Stat 39:1) Dispela tok i helpim yumi long tingim olsem ating Josep i pilim sem, long wanem, dispela em namba 2 taim ol man i salim em. I kain olsem em i wanpela kago ol man i salim na ol narapela i baim! Yumi ken piksaim long tingting olsem Josep i bihainim nupela bosman bilong em, em wanpela ofisa bilong king bilong Isip. Tupela i wokabaut long rot namel long siti we i bisi tru na i pulap long ol man i baim na salim ol samting.

Taim Josep i kamap long haus bilong bosman bilong em, em i luksave olsem dispela ples i no wankain long ples em i go bikpela long en. Famili bilong em i save stap long ol haus sel, long wanem, ol i lain bilong lukautim ol sipsip, olsem na ol i save raun olsem ol tripman. Tasol long Isip i gat ol naispela haus em ol i penim long ol brait kala. Na wankain olsem Potifar, ol man Isip em ol i gat planti mani ol i stap long ol dispela kain haus. Ol saveman i tok ol Isip long bipo i save wokim ol plaua gaden na liklik raunwara samting we ol i ken planim ol gras pitpit na ol plaua. Na tu, ol i save planim ol diwai samting bilong mekim ples i kol. Sampela haus bilong Isip i gat ol plaua gaden em ol man inap sindaun na malolo long en. Na tu, ol haus bilong ol i gat ol bikpela windo na bai ol i ken kisim win. Na insait long ol haus i gat planti rum, olsem bikpela rum bilong kaikai, na ples slip bilong ol wokman.

 Yu ting Josep i amamas long lukim olgeta dispela samting long Isip? Ating nogat, long wanem, em i pilim olsem em i stap wanpis. Lain Isip i no wankain olsem lain bilong em. Ol i gat lotu bilong ol yet, na tu, tokples na pasin bilong ol long bilas i narapela kain. Ol i save lotuim planti god, mekim wok mejik, na insait long wok bilong ol spirit nogut. Na bilip bilong ol i mekim na ol i pret tru long ol man i dai pinis. Tasol i gat wanpela samting i mekim na Josep i no pilim wanpis. Baibel i tok: “Bikpela i stap wantaim Josep.” (Stat 39:2) Josep i beten long God bilong em na kamapim tingting i stap long bel bilong em. Olsem na Baibel i tok: “Ol manmeri i . . . singaut long em [God], em i save stap klostu long ol.” (Song 145:18) Wanem narapela samting i helpim Josep long i go klostu long God bilong em?

Josep i no larim ol pasin na bilip bilong lain Isip i mekim em i bel hevi, nogat. Em i givim bel long mekim wok bilong em. Olsem na Jehova i blesim em, na tu, bos bilong em i amamas long wok bilong em. Potifar i luksave olsem Jehova, em God bilong lain bilong Josep, Em i blesim dispela yangpela wokman bilong em. Na ol dispela blesing i mekim na nau Potifar i gat planti mani kago samting long haus bilong em. Olsem na Potifar i amamas long Josep na em i givim wok long em long lukautim olgeta samting i stap long haus bilong em.—Stat 39:3-6.

Josep i stap gutpela piksa long ol yangpela i ken bihainim long nau. Olsem, ating ol yangpela i stap long skul long nau i lukim olsem ol wanskul bilong ol i bihainim ol pasin kranki bilong dispela graun. Dispela i mekim na ol inap pilim olsem ol i stap wanpis. Sapos wankain samting olsem i painim yu, no ken lusim tingting olsem Jehova i tingim yu. (Jems 1:17) God i kamapim klia olsem em bai stap gut long ol man husat i wok strong long bihainim stretpela pasin. Sapos yumi bihainim wankain pasin olsem Josep, God bai mekim gut long yumi tu.

Baibel i stori long taim Josep i wok long kamap bikpela man, em “i gat strongpela bodi na em i luk nais tru.” Dispela tok i stap long Baibel i kamapim klia olsem Josep i smatpela man na dispela inap givim hevi long em, olsem ol meri long Isip bai laikim em.

Josep i laik stap gut long bosman bilong em, tasol meri bilong Potifar i nogat dispela tingting. Baibel i tok: “Meri bilong Potifar i aigris long Josep na i tokim em olsem, ‘Yu kam slip wantaim mi.’” (Stat 39:7) Yu ting Josep i gat tupela tingting taim dispela meri haiden i laik pulim em long slip wantaim em? Baibel i no tok, tasol yumi ken ting olsem Josep i gat wankain laik na filings olsem bilong ol yangpela man, na tu, ating meri bilong Potifar i mas luk nais tru. Olsem wanem? Josep i ting olsem bosman bilong em bai i no painimaut sapos em i haitim dispela  samting long em? O em i tingting olsem em inap long kisim mani samting long meri bilong Potifar sapos em i slip wantaim em?

Yumi no save long tingting tru bilong Josep, tasol ol samting em i mekim i kamapim tingting i stap long bel bilong em. Dispela i kamap ples klia taim em i bekim tok long meri bilong Potifar olsem: “Bos bilong mi i makim mi long bosim olgeta samting long dispela haus, olsem na em i no save wari long wanpela samting. Mi gat wankain namba long dispela haus olsem em yet. Em i no tambuim wanpela samting long mi. Nogat. Tasol em i no tokim mi long slip wantaim yu, long wanem, yu meri bilong en. Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.” (Stat 39:8, 9) Piksaim long tingting olsem dispela yangpela man i kamapim tingting tru i stap long bel bilong em. Em i bel hevi tru long samting dispela meri i laik em i mas mekim. Bilong wanem em i pilim olsem?

Olsem tok bilong Josep i kamapim, Potifar i trastim em. Em i givim namba long Josep long bosim olgeta samting long haus bilong em, tasol meri bilong Potifar, nogat. Hau bai Josep i bagarapim dispela gutpela pasin pren namel long em na Potifar? Em i no laik mekim olsem. Na bikpela samting moa, em i no laik mekim sin long ai bilong Jehova, em God bilong em. Papamama bilong Josep i bin skulim em gut long tingting bilong God long marit na pasin bilong i stap gut long poroman marit. Jehova i kamapim namba wan marit, na em i laik bai man na meri i mas pas gut wantaim na kamap “wanpela bodi tasol.” (Stat 2:24) God i no orait long ol man husat i sakim dispela tok. Olsem, taim ol man i laik kisim meri bilong Abraham bilong maritim, God i tokaut olsem bikpela hevi bai painim ol. Dispela meri em tumbuna mama bilong meri bilong Aisak, em tumbuna mama bilong Josep. (Stat 20:1-3; 26:7-11) So yumi ken ting olsem ol dispela stori i helpim Josep long bihainim tok bilong God long i stap bilong em.

Meri bilong Potifar i no amamas taim Josep i sakim em. Ating em i ting, olsem wanem na dispela wokboi nating i sakim em na tok dispela laik bilong em i “pasin nogut tru”! Na yumi ken ting olsem meri bilong Potifar i gat pasin antap na em i save kisim olgeta samting em i laikim. Olsem na taim Josep i sakim em, em i belhat na em i laik fosim Josep long slip wantaim em. Samting em i mekim i wankain long pasin bilong Satan taim em i traim Jisas. Jisas i sakim Satan, tasol em i no givap, nogat, em i “wetim narapela taim” long traim Jisas gen. (Luk 4:13) Bilong stap gut long God, ol man i mas bilip na sanap strong. Dispela em pasin Josep i bihainim. Baibel i tok dispela hevi i kamap “long olgeta de,” tasol “Josep i no harim tok gris bilong em.” (Stat 39:10) Maski i olsem, meri bilong Potifar em wanpela meri bilong tok gris stret.

Meri bilong Potifar i makim wanpela taim we olgeta wokman long haus i no stap. Em i save olsem Josep bai kam long haus bilong mekim wok. Nau em i mekim wanpela pasin trik bilong pulim Josep long slip wantaim em. Dispela meri i holimpas saket bilong Josep na tok: “Yu kam slip wantaim mi.” Kwiktaim Josep i sakim han bilong meri na em i laik ranawe, tasol meri i pulim saket bilong em. Josep i ranawe na meri i holim saket bilong em tasol i stap!—Stat 39:11, 12.

Dispela inap helpim yumi long tingim tok kaunsil bilong Pol, em i tok: “Yupela i mas ranawe long pasin pamuk.” (1 Korin 6:18) Josep i stap gutpela eksampel long olgeta Kristen i ken bihainim! Ating sampela taim wanpela samting i kamap na yumi mas bung wantaim ol man husat i no save long ol lo bilong God, tasol dispela i no makim olsem yumi mas bihainim pasin bilong ol, nogat. Maski wanem samting i kamap, yumi mas sakim ol pasin bilong dispela graun.

Pasin bilong Josep long sakim meri bilong Potifar i putim bikpela hevi long em. Meri bilong Potifar i belhat na nau em i laik givim hevi long Josep. Kwiktaim tru em i bikmaus na singautim ol wokman bilong em. Em i sutim tok long Josep olsem Josep i laik reipim em, tasol em i singaut na Josep i pret na ranawe. Em i holim saket bilong Josep na wetim man bilong em i kam long haus. Taim Potifar i kam long haus, em i mekim wankain stori, na em i sutim tok long Potifar olsem em i bringim Josep i kam stap wantaim ol na nau dispela hevi i kamap. Potifar i mekim wanem? Baibel i tok: “Em i kros nogut tru”! Na em i tokim ol soldia bilong em long putim Josep long kalabus.—Stat 39:13-20.

Yumi no save ol haus kalabus bilong Isip i luk olsem wanem long bipo. Ol saveman i painim ol ples  we i gat ol banis na ol rum i stap aninit long graun. Josep i stori long kain ples olsem taim em i kolim wanpela tok i makim olsem dispela ples i tudak na em i ples nogut tru. (Stat 40:15) Long Buk Song, yumi kisim save olsem i gat sampela hevi moa i bin painim Josep, em i tok: “Ol i pasim strong ol sen long lek bilong en na lek i pen. Na ol i pasim bikpela ring ain long nek bilong en.” (Song 105:17, 18) Sampela taim lain Isip i pasim sen long han bilong ol kalabus man i go long baksait, na sampela i save pasim ol sen long nek bilong ol. Maski Josep i no bin mekim wanpela rong, em i kisim bikpela hevi tru!

Josep i kisim wanem hevi moa? Baibel i tok em i stap long “haus kalabus.” Em i stap inap sampela yia long dispela ples nogut! a Na Josep i no save sapos em bai lusim kalabus o nogat! Inap longpela haptaim i lus, olsem na yu ting Josep i pilim olsem i no gat wanpela gutpela samting bai painim em?

Dispela stori bilong Baibel inap helpim yumi long save olsem “Bikpela i stap wantaim Josep na i mekim gut long em.” (Stat 39:21) Maski wanpela man i stap long banis kalabus, o ol i pasim em long sen, o em i stap long wanpela ples nogut we i tudak, dispela i no inap pasim Jehova long soim pasin laikim bilong em long ol man i stap gut long em. (Rom 8:38, 39) Tingim olsem Josep i mas kamapim olgeta bel hevi bilong em long Papa bilong em long heven. Long rot bilong beten em inap kisim bel isi, na tu, em i save olsem “God bilong mekim isi bel bilong ol man” bai lukautim em. (2 Korin 1:3, 4; Filipai 4:6, 7) Jehova i mekim wanem bilong helpim Josep? Baibel i tok: “Bikpela i mekim man i bosim haus kalabus i laikim Josep.”

Ol i givim wok long ol kalabusman, olsem na dispela i opim rot long Jehova i ken blesim ol wok bilong Josep. Em i givim bel long mekim gut wok na em i larim Jehova i helpim em. Wankain olsem Potifar, ol man inap trastim na rispektim Josep. Baibel i tok: “Olsem na dispela man i makim Josep long lukautim olgeta kalabusman. Na Josep i bosim olgeta wok bilong haus kalabus. Bikpela i stap wantaim Josep na i helpim em, na olgeta samting em i mekim i kamap gutpela tasol. Olsem na man i bosim haus kalabus i no save wari long ol wok em i bin tokim Josep long mekim.” (Stat 39:22, 23) Josep i bel isi tru, long wanem, em i save olsem Jehova i lukautim em!

Planti hevi inap painim yumi, na tu, ol man inap mekim wansait pasin long kot bilong nogutim nem bilong yumi. Tasol pasin bilong Josep long bilip inap givim sampela skul long yumi. Long rot bilong beten yumi inap i go klostu long Jehova, bihainim gut ol lo bilong em, na wok strong long bihainim stretpela pasin. Taim yumi mekim olsem, Jehova bai blesim yumi. Long narapela atikol bilong dispela nius, bai yumi stori long ol gutpela blesing em Jehova i kamapim long Josep.