Wanpela atikol long nius Biblical Archaeology Review i tok, ol samting ol saveman i painim i soim olsem “klostu 50” man em Ol Skripsa Hibru i stori long ol, ol i bin stap tru long bipo. Sampela bilong ol dispela man em 14 king bilong lain Juda na Israel, olsem Devit na Hesekia em planti man i save long stori bilong ol. Na ol wok painimaut i stori tu long Menahem na Peka em planti i no save long stori bilong ol. Na tu, i gat stori bilong 5-pela Fero na 19 king bilong Asiria, Babilon, Moap, Persia, na Siria. Tasol ol i no stori tasol long ol king bilong bipo, nogat. Baibel na ol wok painimaut bilong ol saveman i stori tu long ol hetpris, ol man bilong raitim tok olsem ol sekreteri, na ol narapela bikman.

Dispela nius i tok, “planti saveman i mekim wok painimaut long ol dispela man na ol i wanbel” olsem ol dispela man i bin stap tru long bipo. Olsem na wok painimaut bilong ol saveman i stret wantaim tok bilong Baibel. Na tu, Ol Skripsa Grik i stori long planti arapela man bilong bipo i gat namba olsem Herot, Pontius Pailat, Taiberias, Kaiafas, na Sergius Paulus.

Long nau i no gat ol laion long kantri Israel na ol ples i stap klostu long en, tasol klostu 150 skripsa long Baibel i stori long dispela animal. Na dispela i soim olsem ol man bilong raitim Baibel i gat save long ol laion. Planti bilong ol dispela skripsa em ol tok piksa, tasol sampela i kamapim ol stori tru we ol man i lukim ol laion o ol i kilim i dai ol laion. Olsem, Baibel i stori long Samson, Devit, na Benaia em ol man husat i bin kilim i dai ol laion. (Hetman 14:5, 6; 1 Samuel 17:34, 35; 2 Samuel 23:20) Na tu, Baibel i stori long sampela man em ol laion i bin kilim ol i dai.—1 King 13:24; 2 King 17:25.

Bipo ol laion bilong Esia (Asiatic lion) i stap long Esia Maina, Grik, Palestain, Siria, Mesopotemia, na long hap not-wes bilong India. Ol man i save pret long ol laion na rispektim ol, olsem na planti taim ol man bilong Midel Is i save wokim ol piksa bilong en. Olsem, ol i bin wokim ol piksa bilong ol laion na bilasim bikrot (Babylon’s Processional Way) bilong Babilon bilong bipo.

Long Palestain, klostu long yia 1200 C.E., ol man i bin ranim ol laion na kilim ol i dai. Olsem na ol man i ting bihain long yia 1300 samting, ol laion i dai na pinis olgeta. Tasol long yia 1850 samting, ol man long Mesopotemia na Siria i bin lukim ol laion. Na tu, long yia 1900 samting ol man i stap long Iran na Irak i tok ol i bin lukim ol laion.