FRAN PES STORI
Ol Witnes Bilong Jehova i Husat?
“Mi save long Mike inap planti yia. Em i wanpela Witnes Bilong Jehova. Tasol mi no kliagut long lotu bilong en. Jehova em i husat? Bilong wanem ol Witnes i no save selebretim ol bikpela de? Ating Mike i insait long wanpela kalt lotu?”—Becky, California, Amerika.
“Taim ol neiba bilong mi i kirap stadi long Baibel wantaim ol Witnes Bilong Jehova, mi tingting olsem: ‘Wanem mining bilong nem ol Witnes Bilong Jehova? Dispela lotu i gat narakain nem tru!’”—Zenon, Ontario, Kanada.
“Mi na meri bilong mi i ting olsem ol Witnes Bilong Jehova i save kam bilong tokaut olsem mipela i gat asua, long wanem, mipela i no go long lotu. Sapos ol bikpela lotu i no inap long bekim ol askim bilong mipela, orait liklik lain olsem ol Witnes Bilong Jehova i no inap long mekim olsem tu.”—Kent, Washington, Amerika.
“Mi no save gut long ol dispela lain na bilip bilong ol.”—Cecilie, Esbjerg, Denmak.
Ating yu bin lukim ol i autim tok long ol haus na long ol pablik ples, ol i tilim ol buk na nius bilong Baibel, na mekim ol fri Baibel stadi kos. Ating yu bin kisim dispela nius long wanpela Witnes. Tasol ating yu laik save ol Witnes Bilong Jehova i husat. Na ating yu gat wankain tingting olsem bilong ol dispela man em yumi stori pinis long ol.
Sapos yu gat ol wankain tingting na askim, hau bai yu kisim ol bekim bilong yu? Olsem wanem yu inap kisim save long bilip bilong ol Witnes Bilong Jehova? Bilong wanem ol i save go toktok wantaim ol man long ol haus bilong ol na long ol pablik ples? Na hau ol i kisim mani bilong sapotim wok bilong autim tok na wokim ol haus lotu bilong ol?
Cecilie, em yumi bin stori pinis long en i tok: “Mi ritim planti stori bilong ol Witnes Bilong Jehova long Intenet. Mi harim ol man i mekim kain kain stori, na planti taim ol i mekim ol tok bilong daunim ol Witnes. Olsem na mi gat tingting kranki long ol Witnes Bilong Jehova.” Bihain, Cecilie i bungim ol Witnes Bilong Jehova na ol i bekim ol askim bilong em.
Yu laik kisim stretpela save long ol askim bilong yu long ol Witnes Bilong Jehova? Mipela i laik kirapim yu long toktok wantaim ol Witnes Bilong Jehova, em ol lain i wokim dispela nius. (Sindaun 14:15) Mipela i bilip olsem ol atikol i kamap bihain bai helpim yu long kisim save long mipela i husat, ol bilip bilong mipela, na tu, bai yu inap kliagut long ol wok mipela i save mekim.
