Mama i karim mi long Acul, em wanpela taun i stap longwe long hap wes long ol ples maunten bilong Guatemala. Papamama bilong mi i bilong lain Ixil, em hap bilong ol asples lain Maya. Taim mi go bikpela, mi mekim tok Spen na tokples bilong mipela ol asples lain. Long taim mi liklik pikinini yet, bikpela pait i stap long Guatemala inap olsem 36 yia. Insait long dispela haptaim, planti lain Ixil i dai.

Taim mi gat 4-pela krismas, brata bilong mi husat i gat 7-pela krismas i pilai wantaim wanpela bom na dispela bom i pairap. Dispela eksiden i kilim em i dai na mi kisim bagarap long ai bilong mi na mi kamap aipas. Long ol yia bihain, mi stap long skul bilong ol aipas pikinini long Guatemala Siti. Long dispela skul mi lain long rit na rait long Brel, em rait bilong ol aipas. Ol wokman long dispela skul i tambuim mi long toktok wantaim ol narapela pikinini, na ol narapela sumatin i les long toktok long mi, tasol mi no save long as na ol i mekim olsem. Mi pilim olsem mi stap wanpis, tasol mi amamas olsem long 2-pela mun long olgeta yia mi inap long go long haus na stap wantaim mama, em i save sori na mekim gut long mi. Tasol sori tru, taim mi gat 10-pela krismas mama i dai. Mama i laikim mi winim olgeta arapela, olsem na mi bel hevi tru.

Taim mi gat 11-pela krismas, mi go bek long asples bilong mi na stap wantaim hap brata bilong mi na famili bilong en. Ol i lukautim mi long kaikai na haus samting, tasol i no gat wanpela i helpim mi long daunim pasin bilong bel hevi. Sampela taim, mi save krai long God na tok: “Wai mama bilong mi i dai? Wai na mi aipas?” Ol man i tok em laik bilong God na ol dispela hevi i kamap long mi. Olsem na mi ting God i gat wansait pasin na em i no save sori long ol man. Mi tingting long suasaid, tasol mi no save hau bai mi mekim olsem.

Mi no inap long lukluk, olsem na mi bel hevi na pret olsem ol man bai mekim nogut long mi. Taim mi liklik mangi, planti taim ol man i mekim pasin sem long mi. Mi no tokim ol narapela long ol dispela hevi, long wanem, mi ting ol man i no tingim mi. Wan wan man i save toktok wantaim mi, tasol mi no save toktok wantaim ol arapela. Mi bel hevi na mi no trastim ol man, olsem na mi no save bung wantaim ol arapela.

Taim mi tineja, tupela marit  em ol i Witnes Bilong Jehova i kam long skul na toktok wantaim mi long taim mipela i malolo. Wanpela tisa meri long skul i pilim tru hevi bilong mi, olsem na em i stretim rot long ol i ken visitim mi. Ol i stori long tok promis bilong Baibel olsem bihain bai ol daiman i kirap bek na ol aipas bai lukluk gen. (Aisaia 35:5; Jon 5:28, 29) Mi amamas long harim ol tok ol i kamapim, tasol i hatwok long mi toktok wantaim ol, long wanem, planti taim mi no save toktok wantaim ol arapela. Maski i olsem, ol i no les kwik long mi, nogat. Oltaim ol i visitim mi na long gutpela pasin ol i skulim mi long tok bilong Baibel. Bilong kam long ples mi stap long en, tupela i save wokabaut winim 10-pela kilomita, na tu, ol i mas kalapim wanpela maunten.

Brata bilong mi i tokim mi olsem tupela i bilas gut, tasol ol i no gat planti samting. Maski i olsem, ol i tingim mi tru na ol i save givim ol liklik presen long mi. Mi luksave olsem ol Kristen tru i save redi long helpim ol arapela.

Mi stadi long Baibel long rot bilong ol buk na nius long rait Brel. Mi kliagut long ol tok mi kisim save long en, tasol mi bel hevi long sampela tok bilong Baibel. I hatwok long mi bilip olsem God i tingim mi tru, na ol narapela inap kamapim pasin bilong God long tingim mi. Mi save long risen na God i larim pen na hevi i stap inap sotpela haptaim, tasol i hatwok long mi tingim Jehova olsem gutpela Papa i gat pasin laikim. a

Isi isi save mi kisim long Baibel i helpim mi long senisim tingting bilong mi. Olsem, mi kisim save olsem God i sori tru long ol man i karim ol pen na hevi. Long bipo, ol man i mekim nogut long lain bilong God, olsem na Em i tok: “Mi lukim pinis ol i wok long mekim nogut long ol manmeri bilong mi . . . Mi harim pinis dispela singaut na mi save tru long pen na hevi ol i karim.” (Kisim Bek 3:7) Mi laikim tru ol gutpela pasin bilong Jehova, na dispela i kirapim mi long dediketim laip bilong mi long em. Long 1998, mi kisim baptais olsem wanpela Witnes Bilong Jehova.

Wanpela yia bihain long mi baptais, mi go long wanpela skul bilong ol aipas klostu long siti bilong Escuintla. Mi save go long ol miting long kongrigesen i stap long narapela taun. Na wanpela elda long kongrigesen i luksave long ol hevi mi karim bilong go long ol miting. Bilong go long kongrigesen i stap klostu long dispela hap, mi mas abrusim ples maunten em dispela tupela Witnes marit i save wokabaut long en bilong stadi wantaim mi, olsem na i hatwok long mi go long ol miting. Bilong helpim mi, dispela elda i stretim tok wantaim wanpela Witnes famili long Escuintla na ol i amamas long mi ken stap wantaim ol na bai mi ken go long ol kongrigesen miting. I kam inap long nau, ol i lukautim mi olsem pikinini bilong ol.

Mi inap stori long planti eksampel long pasin bilong ol brata sista long kongrigesen long soim pasin laikim long mi. Ol gutpela pasin bilong ol i helpim mi long luksave olsem ol Witnes Bilong Jehova em ol Kristen tru.—Jon 13:34, 35.

Nau mi save long as na mi stap laip, na mi bilip na wet long ol gutpela samting bai kamap long bihain. Na tu, mi mekim wok autim tok fultaim olsem wanpela Witnes Bilong Jehova long skulim ol man long ol tok i tru bilong Baibel, na mi no tingim tumas hevi bilong mi. Na mi mekim wok elda long kongrigesen na kamapim ol tok bilong Baibel long ol kongrigesen na bai ol man i ken bihainim long i stap bilong ol. Na tu, mi amamas olsem mi inap mekim ol tok bilong Baibel long ol rijinel kibung we planti tausen man i kam bilong harim tok.

Long 2010, mi grediuet long Ministerial Trening Skul (nau ol i kolim Skul Bilong Ol Kingdom Evanselis) long El Salvado. Dispela skul i helpim mi long mekim gut ol wok bilong kongrigesen. Skul mi kisim i helpim mi long save olsem God Jehova i tingim na laikim mi tru. Na tu, em inap long helpim olgeta kain man long mekim wok bilong em.

Jisas i tok: “Amamas bilong givim samting i winim amamas bilong kisim samting.” (Aposel 20:35) Nau mi stap amamas tru na mi inap long helpim ol narapela, maski bipo mi bel hevi.