Taim yia 2023 i kirap, yumi laik bai gutpela samting i kamap long yumi na ol famili bilong yumi. Wai na yumi ken bilip long gutpela samting bai kamap?

 Baibel i gat gutnius olsem ol hevi yumi karim long nau, ol i bilong sotpela taim tasol, na klostu nau ol bai pinis. Ol tok bilong Baibel em “ol i bin raitim bilong skulim yumi. Dispela tok . . . i mekim isi bel bilong yumi long rot bilong Rait Holi. Na dispela i strongim yumi long wetim gutpela samting.”​—Rom 15:4.

 Ol promis bilong Baibel em yumi bilip na wet long en i ken “i stap olsem anka bilong laip bilong yumi.” (Hibru 6:19) Dispela bilip i ken strongim yumi. Em i ken helpim yumi long karim ol hevi i painim yumi long nau, holim stretpela tingting, na stap amamas tru. Olsem:

•   Painimaut hau ol gutpela promis bilong Baibel i bin helpim wanpela man i kalabus long pasin bilong dring alkohol. Watsim vidio Mi Les Pinis Long Pasin Mi Bihainim.

•   Lukim hau ol tok promis bilong Baibel i ken helpim yumi taim wanpela yumi laikim tru i dai. Watsim vidio Mekim Gut Bel Bilong Ol Man i Krai Sori.

 Planti manmeri i laik bai gutpela samting i kamap, tasol ol i no save ol dispela samting ol i gat laik long en bai kamap tru o nogat. Tasol yumi ken bilip tru long ol samting Baibel i tok promis long en. Bilong wanem? Bikos ol tok promis bilong Baibel i kam long God Jehova a na em “i no inap giaman.” (Taitus 1:2) Jehova wanpela tasol i gat strong bilong truim olgeta tok promis bilong em; “wanem wanem samting Jehova i laik mekim, em i save mekim tasol.”​—Buk Song 135:5, 6.

 Mipela i laik singautim yu long kisim helpim long ol gutpela tok promis bilong Baibel em yu ken bilip long en. Yu ken strongim pasin bilong yu long trastim ol tok promis bilong Baibel long rot bilong “skelim gut ol Rait Holi long olgeta de.” (Aposel 17:11) Yu yet i ken painimaut long rot bilong traim mekim fri onlain Baibel stadi kos. Kirapim yia 2023 bilong yu wantaim gutpela samting!