Tok giaman: Ol Witnes Bilong Jehova i no selebretim Krismas bikos ol i no bilip long Jisas.

 Tok tru: Mipela i Kristen. Mipela i bilip olsem wanpela rot tasol bilong God long kisim bek ol man em long rot bilong Jisas Krais.—Aposel 4:12.

 Tok giaman: Yupela i save brukim ol famili taim yupela i skulim ol manmeri long no ken selebretim Krismas.

 Tok tru: Mipela i tingim tru ol famili, na mipela i yusim Baibel long strongim gut ol famili.

 Tok giaman: Yupela i stopim yupela yet na yupela i no kisim amamas bilong Krismas long givim ol samting long ol narapela, kamapim bel isi long graun, na mekim gutpela pasin long ol man.

 Tok tru: Long olgeta de, mipela i wok strong long givim ol samting na stap bel isi wantaim ol narapela. (Provep 11:25; Rom 12:18) Eksampel, wei bilong mipela long mekim ol bung bilong lotu na autim tok i stret wantaim dispela tok bilong Jisas: “Yupela i kisim fri, olsem na yupela i mas givim fri.” (Matyu 10:8) Na tu, mipela i tokim ol man olsem Kingdom Bilong God tasol em rot bilong kamapim bel isi long graun.—Matyu 10:7.

•   Jisas i tokim yumi long tingim dai bilong em, na i no de em i bon long en.—Luk 22:19, 20.

•   Ol aposel bilong Jisas na ol disaipel bilong em long bipo, ol i no bin selebretim Krismas. Dispela buk, New Catholic Encyclopedia, i tok “bung bilong tingim de Jisas i bon long en i kirap long 243 [C.E.],” winim 100 yia bihain long laspela aposel i dai.

•   I no gat evidens i soim olsem Jisas i bin bon long Disemba 25; Baibel i no kolim det em i bon long en.

•   Mipela i bilip olsem God i no orait long Krismas bikos dispela bung i kirap long ol pasin haiden na ol bilip haiden.—2 Korin 6:17.

 Planti lain i selebretim yet Krismas maski ol i save pinis olsem lotu haiden i bin kirapim dispela bung, na Baibel yet i no tokim yumi long mekim dispela bung. Em gutpela sapos ol inap askim olsem: Bilong wanem ol Kristen i no selebretim Krismas maski planti lain i bel nogut long ol? Bilong wanem ol i strong yet long no ken selebretim Krismas?

 Baibel i kirapim yumi yet long skelim ol samting, na bihainim “gutpela tingting.” (Rom 12:1, 2) Em i skulim yumi long laikim tok i tru. (Jon 4:23, 24) Mipela i laik bai ol narapela i amamas long mipela, tasol mipela i laik bihainim ol stiatok bilong Baibel maski sapos dispela i mekim na planti lain i no amamas long mipela.

 Maski mipela yet i makim olsem mipela i no inap selebretim Krismas, mipela i rispektim raits bilong olgeta man long mekim disisen bilong ol yet long dispela samting. Mipela i no stopim ol narapela long selebretim Krismas.