Trenslesen Bilong Tokples Sain
Ol Witnes Bilong Jehova i bin trensletim ol pablikesen bilong Baibel long Inglis i go long winim 900 tokples. Trenslesen bilong raitim ol tok i go long narapela tokples i gat hatwok bilong en. Tasol tokples sain i gat bikpela wok moa. Planti yaupas manmeri i save kamapim tingting bilong ol long rot bilong wokim han na wokim pes wantaim, olsem na ol trensleta bilong tokples sain i trensletim ol tok i go long vidio. Long dispela rot, ol Witnes i bin trensletim winim 90 pablikesen i go long tokples sain.
Husat em ol trensleta?
Olsem olgeta Witnes trensleta, ol trensleta husat i trensletim ol pablikesen i go long tokples sain i save gut long dispela tokples. Planti bilong ol i yaupas na ol i kamap bikpela long famili we i mekim tokples sain o ol inap harim, tasol ol i kamap bikpela long famili we wanpela i yaupas. Na tu, ol trensleta i save stadi gut long Baibel.
Ol nupela trensleta i save kisim gutpela trening long save gut long lo bilong trenslesen. Olsem, Andrew i tok: “Maski mi go long skul bilong ol yaupas taim mi kamap bikpela na mekim tokples sain, tasol trening mi kisim olsem wanpela trensleta i helpim mi long kliagut long wei na pasin bilong tokples sain. Ol narapela trensleta i skulim mi long hau mi ken mekim gut sain, wokim pes, na muvim bodi bilong mi long kamapim stret ol tok.
Sekim gut trenslesen
Ol trensleta i wok wantaim olsem wanpela tim. Wan wan trensleta i gat wok, ol i trenslet, sekim, o stretim ol tok. Sapos inap, sampela yaupas i stap long ol narapela narapela lokesen na bekgraun i mekim riviu long ol dispela vidio. Ol bai sekim sapos ol sain i klia long kisimgut na ol tok i stap long dispela vidio i stret na klia.
Ol trenslesen tim long Finlan i stori long ol tok long tokples sain
Ol trensleta bilong tokples sain i go long ol miting bilong kongrigesen we ol i mekim long tokples sain. Na tu, ol i save mekim ol Baibel stadi wantaim ol yaupas manmeri long komiuniti husat i no Witnes. Long dispela rot, ol trensleta i kisim save long tokples sain.
Wanpela trensleta long Tokples Sain Bilong Brasil i rekodim tok i go long vidio.
Wai na ol i mekim bikpela wok?
Baibel i tok olsem olgeta manmeri bilong “olgeta kantri na olgeta traib na olgeta lain pipol na olgeta tokples” bai putim yau long tok bilong mekim isi bel na ol samting bai kamap long bihain. (Revelesen 7:9) Namel long ol dispela lain em ol manmeri i mekim tokples sain.
Ol trensleta i amamas long yusim taim na save bilong ol long mekim dispela gutpela wok. Wanpela trensleta nem bilong em Tony i tok: “Mi yaupas, olsem na mi ken pilim tru hevi i painim ol yaupas manmeri. Em bikpela laik tru bilong mi long helpim planti yaupas na stori long ol long ol gutpela tok bilong Baibel.”
Amanda, husat i wok wantaim trenslesen tim bilong tokples sain i tok: “Mi pilim olsem wok bilong mi i kamap gutpela taim mi trensletim ol pablikesen i stori long ol tok bilong Baibel bilong ol yaupas winim wok mi bin mekim bipo.
Hau yu ken painim ol vidio long tokples sain bilong yu?
Dispela vidio “Find Sign-Language-Content” i gat ol wan wan step we inap helpim yu long kisim ol vidio long tokples sain long jw.org websait.