Swivuriso 10:1-32
10 Swivuriso swa Solomoni.+
N’wana wo tlhariha hi loyi a tsakisaka tata wakwe,+ naswona n’wana wo hunguka i gome eka mana wakwe.+
2 Xuma xa lowo homboloka a xi nge pfuni nchumu,+ kambe ku lulama hi kona loku nga ta kutsula eku feni.+
3 Yehovha a nge endli leswaku moya-xiviri wa munhu wo lulama wu va ni ndlala,+ kambe ku navela ka lowo homboloka u ta ku bakanya.+
4 Loyi a tirhaka hi voko ro loloha u ta pfumala,+ kambe voko ra munhu la gingiritekaka hi rona leri nga ta fuwisa+ munhu.
5 N’wana la nga ni ku twisisa wa hlengeleta hi nkarhi wa ximumu; n’wana la nyumisaka u etlela vurhongo hi nkarhi wa ntshovelo.+
6 Mikateko i ya nhloko ya lowo lulama,+ kambe loko ku ri nomu wa lavo homboloka, wu funengeta madzolonga.+
7 Ku tsundzukiwa ka lowo lulama ku tisa nkateko,+ kambe vito ra lowo homboloka ri ta bola.+
8 Loyi a tlhariheke embilwini u ta amukela swileriso,+ kambe loyi a nga xiphukuphuku emilon’wini yakwe, u ta kandziyeriwa.+
9 Loyi a fambaka hi ku tshembeka u ta famba a sirhelelekile,+ kambe loyi a endlaka tindlela takwe ti homboloka u ta endla leswaku a tiviwa.+
10 Loyi a tsopetaka tihlo u ta vanga ku vaviseka,+ ni loyi a nga xiphukuphuku emilon’wini yakwe, u ta kandziyeriwa.+
11 Nomu wa munhu wo lulama i xihlovo xa vutomi;+ kambe loko ku ri nomu wa lavo homboloka, wu funengeta madzolonga.+
12 Rivengo ri pfuxa timholovo,+ kambe rirhandzu ri funengeta ku tlula nawu hinkwako.+
13 Vutlhari byi kumeka emilon’wini ya vanhu lava nga ni ku twisisa,+ kambe nhonga i ya nhlana wa la nga ni mbilu yo hunguka.+
14 Lavo tlhariha hi lava va tekaka vutivi byi ri bya risima,+ kambe nomu wa xiphukuphuku wu le kusuhi ni ku tilovisa.+
15 Swilo swa nkoka swa munhu la fuweke i muti wakwe lowu tiyeke.+ Ku lova ka swisiwana i vusiwana bya swona.+
16 Xiendlo xa lowo lulama xi tisa vutomi;+ ntshovelo wa lowo homboloka wu vanga xidyoho.+
17 Loyi a khomelelaka ndzayo u le ndleleni ya vutomi,+ kambe loyi a tshikaka ku tshinyiwa wa tsendzeleka.+
18 Laha ku nga ni loyi a funengetaka rivengo ku ni milomu ya mavunwa,+ naswona loyi a nyikelaka xiviko xo biha i xihunguki.+
19 Ku tlula nawu a ku pfumaleki emaritweni yo tala,+ kambe loyi a tshamaka a kambela milomu yakwe u endla hi vutlhari.+
20 Ririmi ra lowo lulama i silivhere leyi hlawulekeke;+ mbilu ya lowo homboloka yi ni ntikelo lowutsongo.+
21 Milomu ya lowo lulama yi byisa vo tala,+ kambe xiphukuphuku xa fa hi ku navela ka le mbilwini.+
22 Nkateko wa Yehovha—hi wona lowu fuwisaka,+ naswona a nga engeteli ku vaviseka eka wona.+
23 Eka xihunguki, ku tikhoma ko biha ku fana ni ntlango,+ kambe vutlhari i bya munhu la twisisaka.+
24 Nchumu lowu chavisaka munhu wo homboloka—hi wona wu nga ta ta eka yena;+ kambe leswi vanhu vo lulama va swi navelaka va ta nyikiwa swona.+
25 Ku fana niloko mheho yi hundza, hi ndlela leyi fanaka lowo homboloka a nga ha ri kona;+ kambe lowo lulama i masungulo hilaha ku nga riki na makumu.+
26 Ku fana ni ntsuvi emenweni ni musi ematihlweni, munhu wo loloha u tano eka lava va n’wi rhumaka.+
27 Ku chava Yehovha ku ta engetela masiku,+ kambe malembe ya lavo homboloka ma ta hungutiwa.+
28 Lavo lulama va langutela ku kuma ku tsaka,+ kambe ntshembo wa lavo homboloka wu ta hela.+
29 Ndlela ya Yehovha i khokholo eka loyi a pfumalaka xisandzu,+ kambe ku lova i ka lava va hanyaka hi swo biha.+
30 Loko ku ri lowo lulama, a nge tshetsheleki hilaha ku nga riki na makumu;+ kambe loko ku ri lavo homboloka, a va nge hambeti va tshama emisaveni.+
31 Nomu wa lowo lulama—wu tswala mbhandzu wa vutlhari,+ kambe ririmi leri vulavulaka leswi humeke endleleni ri ta tsemiwa.+
32 Milomu ya lowo lulama—yi tiva vunene,+ kambe nomu wa lavo homboloka wu vulavula leswi humeke endleleni.+
