Petro Wa Vumbirhi 1:1-21
1 Hi mina Simoni Petro, nandza tlhelo muapostola wa Yesu Kreste, eka lava kumeke ripfumelo ra nkoka ro fana ni ra hina hikwalaho ka ku lulama ka Xikwembu xa hina ni Muponisi Yesu Kreste:
2 Onge mi nga engeteleriwa musa lowukulu ni ku rhula hileswi mi tivaka ntiyiso+ hi Xikwembu na Yesu Hosi ya hina,
3 hikuva matimba ya xona ma hi nyike swilo hinkwaswo leswaku hi kota ku hanya ni leswaku hi tinyiketela eka xona, hi leswi hi tivaka ntiyiso hi Loyi a hi vitaneke+ hi ku vangama kakwe ni vunene.
4 Hikwalaho ka swilo leswi u hi nyike switshembiso swa risima leswikulu+ leswaku ha swona mi ta vangama ku fana ni Xikwembu,+ hileswi mi nga tshika swilo swo biha leswi endliwaka hi misava hikwalaho ka ku navela swo biha.
5 Hikwalaho ka sweswo, tikarhateleni+ ku engetela vunene eka ripfumelo ra n’wina,+ eka vunene mi engetela vutivi,+
6 eka vutivi mi engetela ku tikhoma,+ eka ku tikhoma mi engetela ku tiyisela, eka ku tiyisela mi engetela ku tinyiketela eka Xikwembu,+
7 eka ku tinyiketela eka Xikwembu mi engetela ku rhandza vamakwenu, eka ku rhandza vamakwenu mi engetela ku rhandza vanhu hinkwavo.+
8 Hikuva loko mi ri ni swilo leswi swi tlhela swi khapakhapa, swi ta endla leswaku mi nga tsani kumbe mi nga veki mihandzu+ eka vutivi bya ntiyiso lebyi mi nga na byona hi Hosi ya hina Yesu Kreste.
9 Hikuva mani na mani loyi a pfumalaka swilo leswi u fe matihlo, u tipfala matihlo leswaku ma nga voni ku vonakala+ naswona u rivele hi ta ku basisiwa kakwe eka swidyoho swakwe+ swa khale swinene.
10 Hikwalaho vamakwerhu, tikarhateleni ku tshama mi tshembekile leswaku mi tshama mi ri exikarhi ka lava Xikwembu xi va vitaneke+ ni ku va hlawula, hikuva loko mi ya emahlweni mi endla swilo leswi, a mi nge pfuki mi wile.+
11 Kahlekahle hi ku endla tano mi ta pfumeleriwa ku nghena eMfun’weni+ lowu nga ta va kona hilaha ku nga heriki wa Hosi tlhelo Muponisi wa hina Yesu Kreste.+
12 Hikwalaho ka sweswo, ndzi tiyimisele ku tshama ndzi ri karhi ndzi mi tsundzuxa swilo leswi, hambileswi mi swi tivaka naswona mi tiyeke entiyisweni lowu mi wu dyondzeke.
13 Kambe ndzi vona swi lulamile ku mi tsundzuxa,+ loko ntsena ndza ha ri etabernakeleni*+ leyi,
14 hikuva ndza swi tiva leswaku tabernakela ya mina yi ta susiwa ku nga ri khale, hilaha Hosi ya hina Yesu Kreste a ndzi byeleke hakona.+
15 Ndzi ta ringeta hi matimba leswaku mi ta kota ku sala mi swi tsundzuka swilo leswi loko ndzi nga ha ri kona.
16 Loko hi mi byela hi ta matimba ni nkarhi wa ku vuya ka Hosi ya hina Yesu Kreste, a ku nga ri hi leswi hi tweke mavarivari, kambe a hi ri timbhoni leti ku voneke hi mahlo ku vangama kakwe lokukulu.+
17 Hikuva u amukele ku xiximeka ni ku vangama eka Xikwembu tlhelo Tatana loko marito lawa ma vuriwe eka yena hi ku vangama lokukulu ngopfu: “Loyi i N’wananga, loyi ndzi n’wi rhandzaka, loyi mina hi ndzexe ndzi n’wi tsakelaka.”+
18 Ina, marito lawa hi ma twe ma huma etilweni loko hi ri na yena entshaveni yo kwetsima.
19 Hikwalaho hi ni rito ra vuprofeta leri tiyisekisiweke swinene naswona mi endla kahle loko mi ri tekela enhlokweni ku fana ni rivoni+ leri voningaka endhawini ya munyama (kukondza ku va vurhonga kutani nyeleti ya nimixo+ yi tsuvuka) etimbilwini ta n’wina.
20 Hikuva xo sungula mi swi tiva kahle leswaku a ku na vuprofeta bya Matsalwa lebyi humaka eka vanhu.
21 Phela vuprofeta a byi vanga kona hi ku rhandza ka munhu,+ kambe vanhu a va vulavula leswi humaka eka Xikwembu va kongomisiwa hi moya lowo kwetsima.+
Tinhlamuselo ta le hansi
^ Kumbe “etendeni,” ku nga miri wa nyama.
