Samuwele Wa Vumbirhi 1:1-27
1 Endzhaku ka rifu ra Sawulo, loko Davhida a vuyile hi le ku dlayeni ka Vaamaleke, Davhida u tshame eSikilaga+ masiku mambirhi.
2 Hi siku ra vunharhu, ku fika wanuna loyi a humaka enxaxeni wa Sawulo, swiambalo swakwe a swi handzukile naswona a a ri ni ritshuri enhlokweni. Loko a fika eka Davhida, u tilahlele emahlweni ka yena a khinsama.
3 Davhida a n’wi vutisa a ku: “Xana u huma kwihi?” A hlamula a ku: “Ndzi baleke enxaxeni wa Israyele.”
4 Davhida a ku: “Swi fambe njhani? Ndzi kombela u ndzi byela.” Yena a ku: “Vanhu va balekile enyimpini naswona vo tala va dlayiwile. Hambi ku ri Sawulo ni n’wana wakwe Yonathani va file.”+
5 Hiloko Davhida a vutisa jaha leri n’wi tiseleke mahungu a ku: “U swi tivisa ku yini leswaku Sawulo ni n’wana wakwe Yonathani va file?”
6 Jaha leri ri ku: “Ndzi tikume ndzi ri eNtshaveni ya Gilbowa,+ hiloko ndzi vona Sawulo a tiseketele hi tlhari rakwe, naswona makalichi ni vavanuna lava gadeke tihanci a va n’wi kumile.+
7 Loko a hundzuluka a ndzi vona, u ndzi vitanile, kutani ndzi ku, ‘Hi mina loyi!’
8 A ndzi vutisa a ku, ‘Hi wena mani?’ Ndzi ku, ‘Ndzi Muamaleke.’+
9 Kutani a ku, ‘Ndzi kombela u yima ehenhla ka mina u ndzi hetisa hikuva ndzi twa ku vava swinene, kambe ndza ha hanya.’
10 Hiloko ndzi yima ehenhla ka yena ndzi n’wi dlaya,+ hikuva a ndzi swi vona leswaku a nge hanyi hileswi a a vavisekile swinene. Kutani ndzi teka harhi leyi a yi ri enhlokweni ni sindza leri a ri ri evokweni rakwe, ndzi swi tisa laha eka hosi yanga.”
11 Endzhaku ka sweswo, Davhida a handzula swiambalo swakwe ni vavanuna hinkwavo lava a va ri na yena va endla tano.
12 Kutani va sungula ku kalakala, va rila, va titsona swakudya+ ku fikela nimadyambu va rilela Sawulo na Yonathani n’wana wakwe ni vanhu va Yehovha ni yindlu ya Israyele,+ hikuva va dlayiwile hi banga.
13 Davhida a vutisa jaha leri ri n’wi tiseleke mahungu a ku: “U huma kwihi?” Rona ri ku: “Ndzi n’wana wa Muamaleke loyi a nga muluveri.”
14 Hiloko Davhida a ku eka yena: “Hikwalaho ka yini u nga chavanga ku tlakusa voko ra wena u dlaya muhlawuriwa wa Yehovha?”+
15 Kutani Davhida a vitana un’wana wa majaha yakwe a ku: “Tshinela, u ta n’wi dlaya.” Hiloko a n’wi tlhava kutani a fa.+
16 Davhida a ku eka yena: “Ngati ya wena yi le nhlokweni ya wena, hikuva nomu wa wena wu ku avanyisile hi ku vula u ku, ‘Mina ndzi dlaye muhlawuriwa wa Yehovha.’”+
17 Kutani Davhida a yimbelelela Sawulo ni n’wana wakwe Yonathani+ risimu leri ra xirilo
18 a tlhela a vula leswaku vanhu va le Yuda va fanele va dyondzisiwa risimu leri nge “Vurha,”* leri tsariweke ebukwini ya Yaxara:+
19 “Wena Israyele, timbhuri ta wena ti dlayiwile eswintshabyanini swa wena.+
Tinhenha ti wile!
20 Mi nga swi vuli eGati;+Mi nga swi huweleli eswitarateni swa Axikeloni,Hikuva vana va xisati va Vafilista va ta tsaka,Hikuva vana va xisati va vavanuna lava nga yimbangiki va ta khana.
21 N’wina tintshava ta Gilbowa,+Mberha kumbe mpfula swi nga mi neli,Mi nga vi na masimu lama humesaka minyikelo yo kwetsima,+Hikuva xitlhangu xa tinhenha xi thyakisiwe kwalaho,Xitlhangu xa Sawulo a xa ha totiwanga hi mafurha.
22 Eka ngati ya lava dlayiweke, eka mafurha ya vanhu va matimba,Vurha bya Yonathani a byi tlhelanga+Ni banga ra Sawulo a ri nga tlheli ntsena.+
23 Sawulo na Yonathani+ a va ri vanhu lava rhandzekaka ni ku xiximeka,A va hambanisiwanga eku feni ka vona.+
A va ri ni rivilo ku tlula magama,+A va ri ni matimba ku tlula tinghala.+
24 N’wina vanhwanyana va Israyele, rilelani Sawulo,Loyi a mi ambexeke swiambalo swo tshwuka ni swo tisasekisa,Loyi a rhungeleleke swin’wetsin’wetsi swa nsuku eswiambalweni swa n’wina.
25 Vona ndlela leyi tinhenha ti weke ha yona enyimpini!
Yonathani u dlayiwe eswintshabyanini swa wena!+
26 Ndza ku rila makwerhu Yonathani;A ndzi ku rhandza swinene.+
Ndlela leyi a wu ndzi rhandza ha yona a yi tlula ni rirhandzu ra vavasati.+
27 Vona ndlela leyi tinhenha ti weke ha yonaMatlhari ya nyimpi ma herile!”
Tinhlamuselo ta le hansi
^ Kumbe “Mpaxu.”
