Tihosi Ta Vumbirhi 14:1-29
14 Hi lembe ra vumbirhi ra ku fuma ka Yehowaxi+ n’wana wa Yowohazi hosi ya Israyele, Amaziya n’wana wa Hosi Yehowaxi wa Yuda a va hosi.
2 A a ri ni malembe ya 25 loko a va hosi naswona u fume malembe ya 29 eYerusalema. Vito ra mana wakwe a ku ri Yehodini wa le Yerusalema.+
3 U ye emahlweni a endla leswi lulameke eka Yehovha, kambe a nga endlanga ku fana na Davhida+ kokwa wakwe. U endle hinkwaswo leswi Yehowaxi tata wakwe a swi endleke.+
4 Hambiswiritano, tindhawu leti tlakukeke a ti susiwanga+ naswona vanhu a va ha endla magandzelo va tlhela va endla leswaku nun’hwelo wa magandzelo wolawo wu tlhandluka etindhawini leti tlakukeke.+
5 Hi ku hatlisa loko mfumo wakwe wu sungula ku tiya, a dlaya malandza yakwe lama dlayeke tata wakwe loyi a a ri hosi.+
6 Kambe a nga va dlayanga vana va vona, hilaha Yehovha a vuleke hakona ebukwini ya Nawu wa Muxe loko a ku: “Vatatana a va fanelanga va fela swidyoho swa vana va vona naswona vana a va fanelanga va fela swidyoho swa vatata wa vona; kambe un’wana ni un’wana u ta fela xidyoho xakwe.”+
7 U dlaye Vaedomu+ eNkoveni wa Munyu,+ vavanuna va 10 000, a teka muti wa Sela+ kutani vito ra wona ri va Yokitele ku ta fikela namuntlha.
8 Hiloko Amaziya a rhuma vanhu eka Yehowaxi n’wana wa Yowohazi n’wana wa Yehu hosi ya Israyele a ku: “Tana, a hi hlangane hi lwa.”+
9 Hosi Yehowaxi wa Israyele a rhumela rito eka Hosi Amaziya wa Yuda a ku: “Mfava wa mitwa wa le Lebanoni wu rhumele rito eka mukedari wa le Lebanoni wu ku, ‘Pfumelela n’wana wa wena leswaku a va nsati wa n’wana wa mina.’ Kambe xivandzana xa le Lebanoni xi hundza xi kandziyela mfava wa mitwa.
10 I ntiyiso leswaku u hlule Edomu+ naswona sweswo swi ku tlhoma tinsiva. Tidzunise hi swona, kambe tshama endlwini ya wena. Hikwalaho ka yini u fanele u tivitanela khombo u wa, u wisa na Yuda?”
11 Kambe Amaziya a nga yingisanga.+
Hiloko Hosi Yehowaxi wa Israyele a ya hlangana na Hosi Amaziya wa Yuda eBeta-xemexe+ lowu nga muti wa Yuda,+ kutani va sungula ku lwa.
12 Tiko ra Israyele ri hlula ra Yuda, kutani un’wana ni un’wana a balekela emutini* wakwe.
13 Hosi Yehowaxi wa Israyele a khoma Hosi Amaziya wa Yuda, n’wana wa Yehowaxi, n’wana wa Ahaziya eBeta-xemexe. Kutani va ya eYerusalema va fika va mbundzumuxa khumbi ra Yerusalema, ndhawu leyi ringanaka timitara ta kwalomu ka 178* ku sukela eGedeni ya Efrayimi,+ ku ya fika eGedeni ya le Khonweni.+
14 A teka nsuku hinkwawo, silivhere ni swilo hinkwaswo leswi a swi ri endlwini ya Yehovha ni le ndlwini ya hosi laha ku vekiwaka kona xuma ni vanhu lava khomiweke. Kutani a tlhelela eSamariya.
15 Loko ku ri matimu ya Yehowaxi hinkwawo, leswi a swi endleke ni mitirho yakwe ni ndlela leyi a lweke na Hosi Amaziya wa Yuda ha yona, xana a swi tsariwanga ebukwini ya matimu ya tihosi ta Israyele?
16 Yehowaxi a lahliwa ni vakokwa wakwe eSamariya+ laha tihosi ta Israyele ti lahliweke kona; kutani Yerobuwamu*+ n’wana wakwe a va hosi.
17 Amaziya+ n’wana wa Yehowaxi hosi ya Yuda u hanye malembe ya 15 endzhaku ka loko Yehowaxi+ n’wana wa Yowohazi hosi ya Israyele a file.+
18 Loko ku ri matimu ya Amaziya hinkwawo, xana a ma tsariwanga ebukwini ya matimu ya tihosi ta Yuda?
19 Hi ku famba ka nkarhi, va n’wi bohela xikungu xo n’wi dlaya+ eYerusalema, hiloko a balekela eLakixi, kambe ku rhumiwa vanhu leswaku va n’wi landza, va fike va n’wi dlayela kwalaho.
20 Hiloko va vuya na yena va n’wi rhwale hi tihanci naswona u lahliwe eYerusalema ni vakokwa wakwe eMutini wa Davhida.+
21 Endzhaku ka sweswo, vanhu hinkwavo va Yuda va teka Azariya*+ loyi a a ri ni malembe ya 16,+ va n’wi endla hosi, a siva Amaziya tata wakwe.+
22 A pfuxa muti wa Elata+ a wu tlherisela eYuda endzhaku ka loko hosi* yi lahliwe ni vakokwa wa yona.+
23 Hi lembe ra vu-15 ra ku fuma ka Amaziya n’wana wa Yehowaxi hosi ya Yuda, Yerobuwamu+ n’wana wa Hosi Yehowaxi wa Israyele a va hosi eSamariya naswona u fume malembe ya 41.
24 U ye emahlweni a endla swo biha emahlweni ka Yehovha. A nga swi tshikanga swidyoho leswi Yerobuwamu n’wana wa Nebati, a dyohiseke Israyele ha swona.+
25 U pfuxe ndzilakana lowu a wu ri wa Israyele lowu a wu sukela eLebo-hamati*+ ku ya eLwandle ra Araba,*+ hilaha Yehovha Xikwembu xa Israyele a vuleke hakona hi ku tirhisa nandza wakwe Yonasi+ n’wana wa Amitayi, muprofeta loyi a a huma eGati-hefere.+
26 Hikuva Yehovha u vone ndlela leyi Vaisrayele a va xaniseka ha yona.+ A ku nga ha ri na munhu loyi a ta pfuna Vaisrayele, hambi xisiwana kumbe munhu loyi a nga pfuniki nchumu.
27 Kambe Yehovha a a tshembise leswaku a nge ri herisi vito ra Israyele emisaveni.+ Hiloko a va ponisa hi ku tirhisa Yerobuwamu n’wana wa Yehowaxi.+
28 Loko ku ri matimu ya Yerobuwamu hinkwawo, hinkwaswo leswi a swi endleke ni mitirho yakwe, tinyimpi leti a ti lweke ni ndlela leyi a vuyiseke muti wa Damaska+ ni wa Hamati+ ha yona eka Yuda eIsrayele, xana a swi tsariwanga ebukwini ya matimu ya tihosi ta Israyele?
29 Hiloko Yerobuwamu a lahliwa ni vakokwa wakwe laha tihosi ta Israyele ti lahliweke kona; kutani Zakariya+ n’wana wakwe a va hosi.
Tinhlamuselo ta le hansi
^ Hi Xiheveru, “etendeni.”
^ Hi Xiheveru, “swisungunu swa 400.” Vona Xiengetelo B14.
^ Ku nga Yerobuwamu wa Vumbirhi.
^ Leswi vulaka “Yehovha U Pfunile.” U vitaniwa Uziya eka 2Th 15:13; 2Tk 26:1-23; Esa 6:1; na Zk 14:5.
^ Ku nga tata wakwe Amaziya.
^ Ku nga Lwandle ra Munyu kumbe Lwandle leri Feke.
^ Kumbe “enyangweni ya Hamati.”
