Tikronika Ta Vumbirhi 21:1-20
21 Hiloko Yehoxafati a fa, a lahliwa ni vakokwa wakwe eMutini wa Davhida; kutani Yehorama n’wana wakwe a va hosi.+
2 Vamakwavo, vana va Yehoxafati, a ku ri Azariya, Yehiyele, Zakariya, Azariya, Mikayele na Xefatiya; hinkwavo lava a ku ri vana va Hosi Yehoxafati wa Israyele.
3 Tata wa vona a a va nyike tinyiko to tala ta silivhere, nsuku ni swilo swa nkoka ku katsa ni miti leyi biyeriweke eYuda;+ kambe mfumo u wu nyike Yehorama,+ hikuva a a ri mativula.
4 Loko Yehorama a sungula ku fuma endzhaku ka mfumo wa tata wakwe, u tiyise vuhosi byakwe hi ku dlaya vamakwavo+ hinkwavo hi banga ku katsa ni tihosana tin’wana ta Israyele.
5 Yehorama a a ri ni malembe ya 32 loko a va hosi naswona u fume malembe ya nhungu eYerusalema.+
6 U tekelele mahanyelo ya tihosi ta Israyele,+ hilaha ndyangu wa Akabu wu endleke hakona hikuva a a teke n’wana wa Akabu a va nsati wakwe;+ kutani a ya emahlweni a dyohela Yehovha.
7 Kambe Yehovha a a nga swi lavi ku lovisa ndyangu wa Davhida hikwalaho ka ntwanano lowu a wu endleke na yena,+ hikuva a a n’wi tshembise ku n’wi nyika mfumo* yena ni vana vakwe hilaha ku nga heriki.+
8 Hi nkarhi wa ku fuma kakwe, tiko ra Edomu ri pfukela tiko ra Yuda+ kutani ri tivekela hosi.+
9 Hiloko Yehorama ni tindhuna takwe va tsemakanya ni makalichi yakwe hinkwawo kutani a pfuka nivusiku a hlula Vaedomu lava a va n’wi rhendzerile ni tindhuna ta makalichi.
10 Kambe tiko ra Edomu a ri tshikanga ku pfukela tiko ra Yuda ku fikela namuntlha. Tiko ra Libna+ na rona ri sungule ku pfukela Yehorama hi nkarhi wolowo, hikuva a a fularhele Yehovha Xikwembu xa vakokwa wakwe.+
11 U tlhele a endla tindhawu leti tlakukeke+ etintshaveni ta Yuda, leswaku vanhu va le Yerusalema va ta gandzela swikwembu, a tlhela a hambukisa vanhu va Yuda.
12 Eku heteleleni a nyikiwa papila leri humaka eka muprofeta Eliya+ ri ku: “Yehovha Xikwembu xa Davhida kokwa wa wena u ri, ‘A wu fambanga etindleleni ta tata wa wena Yehoxafati+ kumbe etindleleni ta Hosi Asa+ wa Yuda.
13 Kambe u famba etindleleni ta tihosi ta Israyele+ naswona u endle leswaku vanhu va le Yuda ni va le Yerusalema va gandzela swikwembu+ hilaha ndyangu wa Akabu+ wu endleke hakona, u tlhele u dlaya ni vamakwenu,+ vandyangu wa tata wa wena lava a va antswa ku ku tlula.
14 Hikwalaho ka sweswo, Yehovha u ta xupula vanhu va wena, vana va wena, vasati va wena ni hinkwaswo leswi u nga na swona.
15 Kutani u ta va ni mavabyi yo tala ku katsa ni vuvabyi bya marhumbu, kukondza marhumbu ya wena ma huma hikwalaho ka vuvabyi, siku ni siku.’”
16 Hiloko Yehovha a endla leswaku Vafilista+ ni Vaarabiya+ lava a va tshama ekusuhi ni Vaetiyopiya va lwa+ na Yehorama.
17 Kutani va fika emutini wa Yuda va wu hlasela, va teka swilo hinkwaswo leswi a swi ri kona endlwini ya hosi,+ ku katsa ni vasati ni vana va yona; va yi siyela Yowohazi*+ loyi a ri rikotsa.
18 Endzhaku ka leswi hinkwaswo, Yehovha a n’wi xupula hi vuvabyi bya marhumbu lebyi a byi nga tshunguleki.+
19 Hi ku famba ka nkarhi loko se ku hundze malembe mambirhi, marhumbu yakwe ma sungule ku huma hikwalaho ka vuvabyi lebyi a a ri na byona, kutani a fa a ri karhi a xaniseka swinene hi vuvabyi lebyi; naswona vanhu vakwe a va n’wi hiselanga mirhi yo nun’hwela hilaha va endleke hakona eka vakokwa wakwe.+
20 A a ri ni malembe ya 32 loko a va hosi naswona u fume eYerusalema malembe ya nhungu. A nga rileriwanga hi munhu loko a fa. Hiloko va n’wi lahla eMutini wa Davhida,+ kambe a nga lahliwanga eswilahlweni swa tihosi.+
