Ezekiyele 10:1-22
10 Loko ndzi ri karhi ndzi languta, ehenhla ka lwangu leri hatimaka leri nga ehenhla ka tinhloko ta makerubu, ndzi vona nchumu lowu fanaka ni ribye leri vuriwaka safiri ehenhla ka wona naswona a wu languteka ku fana ni xiluvelo.+
2 Hiloko a byela wanuna loyi a ambaleke xiambalo xa lapi a ku:+ “Nghena exikarhi ka mavhilwa lama rhendzelekaka,+ ehansi ka makerubu, u tata mavoko ya wena hi makala lama pfurhaka+ lama nga exikarhi ka makerubu kutani u ma haxa emutini.”+ Hiloko a nghena ndzi ri karhi ndzi langutile.
3 Makerubu a ma yime etlhelweni ra xinene ra yindlu loko wanuna loyi a nghena naswona papa a ri tate xivava* xa vaprista.
4 Kutani ku vangama ka Yehovha+ ku suka eka makerubu ku ya enyangweni ya yindlu, hakatsongotsongo yindlu yi funengetiwa hi papa,+ xivava xi tala hi ku vonakala ka Yehovha loku vangamaka.
5 Mpfumawulo wa timpapa ta makerubu a wu twala exivaveni xa mani na mani, ku fana ni mpfumawulo wa Xikwembu xa Matimba Hinkwawo loko xi vulavula.+
6 Hiloko a byela wanuna loyi a ambaleke xiambalo xa lapi a ku: “Teka ndzilo exikarhi ka mavhilwa lama rhendzelekaka ni le xikarhi ka makerubu,” kutani a nghena a yima etlhelo ka vhilwa.
7 Hiloko kerubu rin’wana ri yisa voko ra rona endzilweni lowu a wu ri exikarhi ka makerubu.+ Ri teka ndzilo wun’wana ri wu veka emavokweni ya wanuna loyi a ambaleke xiambalo xa ntsembyana,+ loyi a nga wu teka a huma.
8 Makerubu a ma ri ni leswi fanaka ni mavoko ya munhu ehansi ka timpapa ta wona.+
9 Loko ndzi ri karhi ndzi languta, ndzi vona mavhilwa ya mune etlhelo ka makerubu, vhilwa rin’we ri ri etlhelo ka kerubu naswona mavhilwa a ma hatima ku fana ni ribye leri vuriwaka krisolita.+
10 Hi mune ka wona a ma fana, a ma languteka ku fana ni loko vhilwa ri nghenisiwe exikarhi ka vhilwa rin’wana.
11 Loko ma ri karhi ma famba, a ma kota ku ya ematlhelweni hinkwawo ya mune handle ko jika, hikuva a ma ya laha nhloko yi langutaka kona handle ko jika.
12 Mimiri ya wona, mihlana ya wona, mavoko ya wona, timpapa ta wona ni mavhilwa, mavhilwa ya makerubu hinkwawo ya mune a ma tele hi matihlo matlhelo hinkwawo.+
13 Mayelana ni mavhilwa, ndzi twe rito ri ma huwelela ri ku, “Mavhilwa lama rhendzelekaka!”
14 Rin’wana ni rin’wana* a ri ri ni swikandza swa mune. Xikandza xo sungula a xi ri xa kerubu, xikandza xa vumbirhi a xi ri xa munhu, xikandza xa vunharhu a xi ri xa nghala kasi xikandza xa vumune a xi ri xa gama.+
15 Makerubu a ma tlakuka, a ma ri swivumbiwa leswi hanyaka leswi ndzi swi voneke enambyeni wa Kebari,+
16 loko makerubu ma famba, mavhilwa a ma famba etlhelo ka wona; naswona loko makerubu ma tlakusela timpapa ta wona ehenhla ka misava, mavhilwa a ma nga jiki kumbe ku suka etlhelo ka wona.+
17 Loko makerubu ma yima, mavhilwa na wona a ma yima; naswona loko ma tlakuka na wona a ma tlakuka, hikuva moya lowu a wu tirha eka swivumbiwa* leswi hanyaka a wu tirha ni le ka wona.
18 Kutani ku vangama ka Yehovha+ ku suka ehenhla ka nyangwa ya yindlu ku ya yima ehenhla ka makerubu.+
19 Makerubu ma tlakusa timpapa ta wona ma tlakuka ehenhla ka misava ndzi ma langutile. Loko ma tlakuka, mavhilwa na wona a ma ri etlhelo ka wona. Makerubu ma fike ma yima enyangweni ya le vuxeni ya yindlu ya Yehovha naswona ku vangama ka Xikwembu xa Israyele a ku ri ehenhla ka wona.+
20 Leswi a ku ri swivumbiwa leswi hanyaka leswi ndzi swi voneke ehansi ka xiluvelo xa Xikwembu xa Israyele enambyeni wa Kebari,+ hiloko ndzi swi tiva leswaku a ku ri makerubu.
21 Hinkwawo ka wona a ma ri ni swikandza swa mune, timpapa ta mune ni leswi a swi fana ni mavoko ya munhu ehansi ka timpapa ta wona.+
22 Swikandza swa wona a swi fana ni swikandza leswi ndzi swi voneke enambyeni wa Kebari.+ Hinkwaswo a swi ya emahlweni.+
Tinhlamuselo ta le hansi
^ Vona Tinhlamuselo.
^ Ku nga kerubu rin’wana ni rin’wana.
^ Hi Xiheveru, “moya wa xivumbiwa lexi hanyaka.”
