Ezekiyele 12:1-28
12 Yehovha a tlhela a vulavula na mina a ku:
2 “N’wana wa munhu, u tshama exikarhi ka vanhu lava xandzukeke. Va ni matihlo kambe a va voni, va ni tindleve kambe a va twi,+ hikuva i vanhu lava xandzukeke.+
3 Wena n’wana wa munhu, longa xijumba onge hi loko u ya evuhlongeni. Kutani ninhlikanhi u fanele u endla onge u ya evuhlongeni va ri karhi va ku langutile. Suka ekaya ka wena u endla onge u ya evuhlongeni endhawini yin’wana va ri karhi va ku langutile. Kumbexana va ta swi twisisa leswi sweswo swi vulaka swona, hambileswi va nga vanhu lava xandzukeke.
4 Humesa xijumba lexi u nga ta famba na xona evuhlongeni ninhlikanhi va ri karhi va ku langutile, kutani nimadyambu u fanele u famba ku fana ni munhu loyi a yisiwaka evuhlongeni va ri karhi va ku langutile.+
5 “Boxa mbhovo ekhumbini va ri karhi va ku langutile kutani u humesa xijumba xa wena hi wona.+
6 Pakatsa xijumba xa wena va ku langutile kutani u famba na xona emunyameni. Funengeta xikandza xa wena leswaku u nga yi voni misava, hikuva ndzi ku endla xikombiso eka Vaisrayele.”+
7 Ndzi endle hilaha ndzi lerisiweke hakona. Ninhlikanhi ndzi humese xijumba lexi a ndzi ta famba na xona evuhlongeni kutani nimadyambu ndzi boxa mbhovo ekhumbini hi voko. Loko se ri phumerile ndzi teka xijumba xa mina ndzi xi pakatsa va ndzi langutile.
8 Yehovha a tlhela a vulavula na mina nimixo a ku:
9 “N’wana wa munhu, xana Vaisrayele, vanhu lava xandzukeke, a va ku vutisanga va ku, ‘U endla yini?’
10 Va byele u ku, ‘Yehovha Hosi Leyi Tlakukeke u ri: “Loku i ku avanyisiwa ka ndhuna+ ya le Yerusalema ni Vaisrayele hinkwavo lava nga emutini.”’
11 “Vula u ku, ‘Ndzi xikombiso eka n’wina.+ Leswi ndzi swi endleke hi leswi va nga ta endliwa swona. Va ta yisiwa evuhlongeni.+
12 Ndhuna leyi nga exikarhi ka vona yi ta pakatsa xijumba xa yona kutani yi famba emunyameni. Yi ta boxa mbhovo ekhumbini yi humesa xijumba xa yona hi wona.+ Yi ta funengeta xikandza xa yona leswaku yi nga voni misava.’
13 Ndzi ta n’wi hoxa hi nete naswona u ta phasiwa hi nete ya mina yo hlota ha yona.+ Kutani ndzi ta n’wi yisa eBabilona, etikweni ra Vakalidiya, kambe a nge ri voni; u ta fela kwale.+
14 Hinkwavo lava n’wi rhendzeleke, lava n’wi pfunaka ni masocha yakwe, ndzi ta va hangalasela ematlhelo hinkwawo;+ ndzi ta hlomula banga ndzi va hlongorisa.+
15 Va ta swi tiva leswaku hi mina Yehovha loko ndzi va hangalasa exikarhi ka matiko.
16 Kambe ndzi ta siya vanhu vatsongo leswaku va nga dlayiwi hi banga, ndlala ni ntungu, leswaku va ta byela vanhu va matiko lawa va nga ta yisiwa eka wona mayelana ni mikhuva ya vona hinkwayo leyi nyenyetsaka; kutani va ta swi tiva leswaku hi mina Yehovha.”
17 Yehovha a tlhela a vulavula na mina a ku:
18 “N’wana wa munhu, u fanele u dya xinkwa xa wena u ri karhi u rhurhumela naswona u nwa mati ya wena u karhatekile ni ku vilela.+
19 Byela vanhu va tiko u ku, ‘Yehovha Hosi Leyi Tlakukeke u byela vaaki va Yerusalema etikweni ra Israyele, a ku: “Va ta dya xinkwa xa vona va ri karhi va vilela va tlhela va nwa mati ya vona va ri karhi va chava, hikuva tiko ra vona ri ta va rhumbi+ hikwalaho ka madzolonga lama endliwaka hi vanhu hinkwavo lava tshamaka eka rona.+
20 Miti yi ta lovisiwa, tiko ri ta va rhumbi;+ kutani mi ta swi tiva leswaku hi mina Yehovha.”’”+
21 Yehovha a tlhela a vulavula na mina a ku:
22 “N’wana wa munhu, xana xi vula yini xivuriso lexi mi nga na xona eIsrayele lexi nge, ‘Masiku ma hundzile naswona xivono xin’wana ni xin’wana a xi hetisekanga’?+
23 Hikwalaho va byele u ku, ‘Yehovha Hosi Leyi Tlakukeke u ri: “Ndzi ta endla leswaku xivuriso lexi xi nga ha tirhi, a va nge he xi tirhisi eIsrayele.”’ Kambe va byele u ku, ‘Masiku ma tshinele+ naswona xivono xin’wana ni xin’wana xi ta hetiseka.’
24 Hikuva a ku nge he vi na xivono xa mavunwa kumbe ku hlahluva ka vukanganyisi endlwini ya Israyele.+
25 ‘“Hikuva mina Yehovha ndzi ta vulavula. Hinkwaswo leswi ndzi nga ta swi vula swi ta endliwa hi xihatla.+ Emasikwini ya n’wina,+ n’wina vanhu lava xandzukeke, ndzi ta vula rito ndzi tlhela ndzi ri endla,” ku vula Yehovha Hosi Leyi Tlakukeke.’”
26 Yehovha a tlhela a vulavula na mina a ku:
27 “N’wana wa munhu, Vaisrayele va ri, ‘Xivono lexi a xi vonaka a xi nge endleki sweswi naswona u profeta hi swilo leswi nga ta endleka enkarhini lowu taka.’+
28 Hikwalaho va byele u ku, ‘Yehovha Hosi Leyi Tlakukeke u ri: “‘Leswi ndzi swi vuleke a swi nge hlweli; hinkwaswo leswi ndzi swi vulaka swi ta endleka,’ ku vula Yehovha Hosi Leyi Tlakukeke.”’”
