Ezekiyele 25:1-17
25 Yehovha a tlhela a vulavula na mina a ku:
2 “N’wana wa munhu, languta eka Vaamoni+ kutani u profeta ku lwa na vona.+
3 U fanele u vula leswi mayelana ni Vaamoni, ‘Yingisani leswi Yehovha Hosi Leyi Tlakukeke a swi vulaka. Yehovha Hosi Leyi Tlakukeke u ri: “Leswi mi nga te ‘Aha,’ loko ndhawu ya mina yo kwetsima yi thyakisiwa, loko tiko ra Israyele ri sale ri ri rhumbi ni loko tiko ra Yuda ri yisiwa evuhlongeni,
4 hikwalaho ndzi mi nyiketa eka vanhu va le Vuxeni leswaku va mi fuma. Va ta dzima matende ya vona exikarhi ka n’wina. Va ta dya mihandzu ya n’wina va tlhela va nwa ntswamba wa n’wina.
5 Muti wa Rhaba+ ndzi ta wu endla madyelo ya tikamela, tiko ra Vaamoni ri ta va ndhawu leyi ntlhambi wu vundzaka eka yona; mi ta swi tiva leswaku hi mina Yehovha.”’”
6 “Hikuva Yehovha Hosi Leyi Tlakukeke u ri: ‘Hikwalaho ka leswi mi phokoteleke mavoko+ mi tlhela mi gima ehansi hi milenge, mi hlekula tiko ra Israyele swinene mi tsakile,+
7 ndzi ta tlakusa voko ra mina ndzi mi nyiketa eka matiko tanihi nchumu lowu phangiweke. Ndzi ta mi herisa evanhwini, ndzi mi lovisa ematikweni.+ Ndzi ta mi herisa, kutani mi ta swi tiva leswaku hi mina Yehovha.’
8 “Yehovha Hosi Leyi Tlakukeke u ri: ‘Leswi Mowabu+ na Seyiri+ va nga te, “Waswivo! Tiko ra Yuda ri fana ni matiko laman’wana hinkwawo,”
9 ndzi ta endla leswaku miti leyi nga endzilakaneni wa Mowabu yi hlaseriwa, ku katsa ni miti leyinene ngopfu ya tiko leri, ku nga Beta-yeximoto, Bali-meyoni hambi ku ri Kiriyatayimi.+
10 Ndzi ta nyiketa tiko rero swin’we ni Vaamoni leswaku va fumiwa hi vanhu va le Vuxeni,+ leswaku Vaamoni va nga ha tsundzukiwi exikarhi ka matiko.+
11 Ndzi ta avanyisa eMowabu+ kutani va ta swi tiva leswaku hi mina Yehovha.’
12 “Yehovha Hosi Leyi Tlakukeke u ri: ‘Edomu u rihiserile eka tiko ra Yuda kutani u tivangele nandzu lowukulu hi ku tirihisela eka vona;+
13 hikwalaho Yehovha Hosi Leyi Tlakukeke u ri: “Ndzi ta tlhela ndzi tlakusa voko ra mina ndzi lwa na Edomu, ndzi ta dlaya vanhu ni swifuwo swa yena, ndzi ta n’wi siya a ri rhumbi.+ Va ta dlayiwa hi banga ku suka eTemani ku ya fika eDedani.+
14 ‘Ndzi ta tirihisela eka Edomu hi ku tirhisa vanhu va mina ku nga Vaisrayele.+ Va ta tisa ku hlundzuka ka mina ni vukarhi bya mina eka Edomu, leswaku a ta vona ku rihisela ka mina,’+ ku vula Yehovha Hosi Leyi Tlakukeke.”’
15 “Yehovha Hosi Leyi Tlakukeke u ri: ‘Hikwalaho ka rivengo ra vona lerikulu Vafilista va lave ku rihisela ni ku lovisa hi ndlela ya tihanyi.+
16 Hikwalaho Yehovha Hosi Leyi Tlakukeke u ri: “Ndzi tlakusa voko ra mina ku lwa ni Vafilista,+ ndzi ta herisa Vakereti+ naswona ndzi ta lovisa vaaki lava saleke va le ribuweni ra lwandle.+
17 Ndzi ta tirihisela eka vona hi ku va xupula hi ndlela yo vava, kutani va ta swi tiva leswaku hi mina Yehovha loko ndzi tirihisela eka vona.”’”
