Ezekiyele 4:1-17
4 “Kutani wena n’wana wa munhu, teka xitina u xi veka emahlweni ka wena. Kovotla muti wa Yerusalema ehenhla ka xona.
2 U fanele u lwa ni muti lowu,+ u aka khumbi u wu hlasela,+ u aka ni makhumbi yo ku pfuna ku hlasela muti,+ u dzima matende u tlhela u rhendzela muti hi swo hirimuxa khumbi.+
3 Teka pani ra nsimbhi u ri veka exikarhi ka wena ni muti ku fana ni khumbi ra nsimbhi. Kutani u honolela muti, u fanele u kombisa ndlela leyi wu nga ta rhendzeriwa ha yona. Lexi i xikombiso eka Vaisrayele.+
4 “Kutani u fanele u etlela hi rimbambu ra ximatsi, u rhwala xidyoho xa Vaisrayele.+ U ta rhwala xidyoho xa Vaisrayele ku ringana masiku lawa u nga ta va u etlele hi rimbambu ra ximatsi.
5 Kutani u ta etlela masiku ya 390 hi ku ya hi malembe ya xidyoho xa vona,+ u ta rhwala xidyoho xa Vaisrayele.
6 U fanele u ma heta.
“Kutani u ta etlela ra vumbirhi hi rimbambu ra xinene, u ta rhwala xidyoho xa tiko ra Yuda+ ku ringana masiku ya 40. Siku rin’we ri yimela lembe rin’we. Ndzi ku nyike nawu wa leswaku siku rin’we ri yimela lembe rin’we.
7 U ta honolela muti wa Yerusalema lowu rhendzeriweke,+ u ta koka mavoko ya xiambalo xa wena naswona u fanele u profeta ku lwa ni muti lowu.
8 “Waswivo! Ndzi ta ku boha hi tintambhu leswaku u nga hundzulukeli eka tlhelo rin’wana, ku fikela loko u heta masiku ya ku rhendzela ka wena muti.
9 “U fanele u teka koroni, maxalana, tinyawa, swinyawana, n’wahuva ni koroni yo tshwuka, u swi chela exibyeni xin’we u tiendlela xinkwa ha swona. U ta dya xona ku ringana masiku ya 390 lawa u nga ta va u etlele hi rimbambu.+
10 U ta pima swakudya leswi ringanaka kwalomu ka 230 wa tigiramu* hi siku u dya swona. U ta swi dya hi nkarhi lowu vekiweke.
11 “U ta nwa mati lama pimiweke lama lavaka ku ringana ni hini.* U ta ma nwa hi nkarhi lowu vekiweke.
12 “U ta xi dya hilaha a wu ta xi dya hakona xinkwa xa maxalana; u ta xi baka hi vulongo bya vanhu va ku langutile.”
13 Yehovha a tlhela a ku: “Vaisrayele va ta dya xinkwa xa vona xi nga tenganga exikarhi ka matiko lawa ndzi nga ta va hangalasela eka wona.”+
14 Hiloko ndzi ku: “E-e, Yehovha Hosi Leyi Tlakukeke! Ku sukela loko ndza ha ri muntshwa ku ta fikela sweswi, a ndzi si tshama ndzi tinyamisa hi ku dya nyama ya xiharhi lexi tifeleke kumbe lexi dlayiweke hi swiharhi swin’wana+ naswona a ndzi si tshama ndzi dya nyama leyi nga tengangiki.”+
15 Hiloko a ku eka mina: “Swi lulamile, ndzi ta ku pfumelela leswaku u tirhisa vulongo bya tihomu ematshan’weni ya vulongo bya vanhu, u ta tibakela xinkwa hi byona.”
16 A tlhela a ku eka mina: “N’wana wa munhu, ndzi ta endla leswaku ku nga ha vi na swakudya eYerusalema,+ va ta dya xinkwa xa vona lexi pimiweke va ri karhi va chava swinene+ naswona va ta nwa mati ya vona lama pimiweke va ri karhi va chava.+
17 Leswi swi ta endleka leswaku leswi va nga ta va va pfumala xinkwa ni mati, va ta hlamalana va tlhela va ondza hikwalaho ka xidyoho xa vona.
Tinhlamuselo ta le hansi
^ Hi Xiheveru, “20 wa tixikele.” Vona Xiengetelo B14.
^ Kwalomu ka 0,6 wa tilitara. Vona Xiengetelo B14.
