Ezekiyele 40:1-49
40 Hi lembe ra vu-25 hi ri evuhlongeni,+ loko lembe ri sungula, hi siku ra vukhume ra n’hweti, hi lembe ra vu-14 endzhaku ka loko muti wu lovisiwile,+ hi siku rero matimba* ya Yehovha ma sungule ku tirha eka mina, a ndzi teka a ndzi yisa emutini.+
2 Xikwembu xi ndzi yise etikweni ra Israyele hi ku tirhisa swivono kutani xi ndzi tshamisisa ehenhla ka ntshava leyi tlakukeke ngopfu,+ laha a ku ri ni muako lowu fanaka ni muti hi le dzongeni.
3 Loko xi ndzi yisa kwalaho, ndzi vone wanuna loyi a a languteka ku fana ni koporo.+ A a khome ntambhu ya ximilana xa ntsembyana ni rihlanga* ro pima ha rona,+ a a yime egedeni.
4 Wanuna yoloye a ku eka mina: “N’wana wa munhu languta kahle, u yingiserisisa kahle,* u xiyisisa swilo hinkwaswo leswi ndzi ku kombaka swona hikuva laha u tiseriwe sweswo. Byela Vaisrayele swilo hinkwaswo leswi u swi vonaka.”+
5 Ndzi vone khumbi leri rhendzeleke tempele. Wanuna yoloye a a khome rihlanga ro pima ha rona leri a ri lehe swisungunu swa tsevu (eka xisungunu ha xin’we a ku engeteriwa ku anama ka xandla).* Hiloko a sungula ku pima khumbi, ku bumbula ka rona a ku ringana ni rihlanga naswona ku leha ka rona a ku ringana ni rihlanga.
6 Hiloko a ta egedeni leyi languteke evuxeni,+ kutani a khandziya switepisi swa yona. Loko a pima ndhawu yo nghena ha yona, ku anama ka yona a ku ringana ni rihlanga naswona ku anama ka ndhawu leyin’wana yo nghena ha yona a ku ringana ni rihlanga.
7 Kamara rin’wana ni rin’wana ra varindzi a ri lehe ku ringana ni rihlanga, ri anama ku ringana ni rihlanga naswona mpfhuka lowu a wu hambanisa makamara+ ya varindzi a ku ri swisungunu swa ntlhanu.* Ndhawu yo nghena ha yona leyi a yi ri etlhelo ka rikupakupa* ra nyangwa leyi langutaneke ni tempele a yi ringana ni rihlanga.
8 A pima rikupakupa ra nyangwa leyi nghenaka etempeleni, a ri ringana ni rihlanga.
9 Endzhaku a pima rikupakupa ra nyangwa leri a ri lehe swisungunu swa nhungu;* a pima ni tiphuphu ta rona ta le matlhelo leti a ti lehe swisungunu swimbirhi;* rikupakupa ra nyangwa a ri ri etlhelo leri a ri langute etempeleni.
10 A ku ri ni makamara manharhu ya varindzi eka tlhelo ha rin’we ra gede ya le vuxeni. Hamanharhu ka wona a ma ringana naswona tiphuphu ta le matlhelo a ti ringana eka matlhelo hamambirhi.
11 Kutani a pima ku anama ka ndhawu yo nghena ha yona etempeleni leyi a yi ri swisungunu swa khume;* naswona nyangwa a yi lehe swisungunu swa 13.*
12 Ndhawu leyi biyeriweke emahlweni ka makamara ya varindzi a yi lehe xisungunu xin’we* matlhelo hinkwawo. Makamara ya varindzi a ma lehe swisungunu swa tsevu* matlhelo hamambirhi.
13 Kutani a pima gede ku suka elwangwini ra kamara* rin’we ra varindzi ku ya elwangwini ra kamara lerin’wana, a yi aname swisungunu swa 25;* ndhawu yin’we yo nghena ha yona a yi langutane ni leyin’wana.+
14 Hiloko a pima tiphuphu ta le matlhelo leti a ti lehe swisungunu swa 60* ku katsa ni tiphuphu ta le matlhelo etigedeni leti rhendzeleke xivava.*
15 Ku suka emahlweni ka nyangwa yo nghena ha yona ku ya emahlweni ka rikupakupa ra nyangwa ya le ndzeni ka tempele a ku ri swisungunu swa 50.*
16 Makamara ya varindzi ni tiphuphu leti nga ematlhelo ka wona endzeni ka nyangwa matlhelo hamambirhi a swi ri ni mafasitere lama nga ni tifureme+ to lala. Endzeni ka makupakupa a ku ri ni mafasitere matlhelo hinkwawo naswona tiphuphu ta le matlhelo a ti ri ni swifaniso swa murhi wa ncindzu.+
17 Hiloko a ndzi tisa exivaveni xa mani na mani, kutani ndzi vona makamara+ yo dyela eka wona ni ndhawu leyi andlariweke maribye leyi rhendzeleke xivava. A ku ri ni makamara yo dyela eka wona ya 30 endhawini yoleyo.
18 Ku anama ka ndhawu leyi andlariweke maribye leyi nga etlhelo ka tinyangwa a ku ringana ni ku leha ka tinyangwa, leyi a ku ri ndhawu leyi andlariweke maribye ya le hansi.
19 Kutani a pima mpfhuka* wo suka emahlweni ka gede ya le hansi ku ya fika emakumu ka xivava xa vaprista. A ku ri swisungunu swa 100* evuxeni ni le n’walungwini.
20 Xivava xa mani na mani a xi ri ni gede leyi languteke en’walungwini, hiloko a pima ku leha ni ku anama ka xona.
21 A ku ri ni makamara manharhu ya varindzi eka tlhelo ha rin’we. Tiphuphu ta yona ta le tlhelo ni rikupakupa ra yona a swi ringana hi mpimo ni gede yo sungula. A swi lehe swisungunu swa 50 swi anama swisungunu swa 25.
22 Mafasitere ya yona, rikupakupa ra yona ni swifaniso swa yona swa murhi wa ncindzu+ a swi ringana hi mpimo ni swa gede leyi nga evuxeni. Vanhu a va khandziya switepisi swa nkombo loko va nghena eka yona, rikupakupa ra yona a ri ri emahlweni ka vona.
23 A ku ri ni gede exivaveni xa vaprista leyi a yi langutane ni gede ya le n’walungwini kasi yin’wana a yi langutane ni gede ya le vuxeni. A pima mpfhuka wa ku suka eka gede yin’wana ku ya eka leyin’wana, a wu ri swisungunu swa 100.
24 Endzhaku ka sweswo, a ndzi yisa edzongeni, kutani ndzi fika ndzi vona gede etlhelo ra le dzongeni.+ A pima tiphuphu ta yona ta le matlhelo ni rikupakupa ra yona, a swi ringana ni swa tigede letin’wana.
25 A ku ri ni mafasitere eka tlhelo ha rin’we ra yona ni le ka rikupakupa ra yona, a ma fana ni mafasitere laman’wana. A ma lehe swisungunu swa 50 ma anama swisungunu swa 25.
26 A ku ri ni switepisi swa nkombo swo nghena ha swona+ naswona a ku ri ni rikupakupa emahlweni ka swona. A yi ri ni swifaniso swa murhi wa ncindzu eka tiphuphu ta yona ta le matlhelo, a ku ri na xin’we eka tlhelo ha rin’we.
27 Xivava xa vaprista a xi ri ni gede leyi languteke edzongeni; u pime ku suka eka gede yin’wana edzongeni ku ya eka leyin’wana naswona mpfhuka wa kona a ku ri swisungunu swa 100.
28 Endzhaku ka sweswo, a ndzi tisa exivaveni xa vaprista hi gede ya le dzongeni; loko a pima gede ya le dzongeni, a yi ringana ni tigede letin’wana.
29 Makamara ya varindzi va yona, tiphuphu ta le matlhelo ni rikupakupa ra yona a swi ringana ni laman’wana. A ku ri ni mafasitere eka tlhelo rin’wana ni rin’wana ra yona ni le ka rikupakupa ra yona. A yi lehe swisungunu swa 50 yi anama swisungunu swa 25.+
30 A ku ri ni makupakupa ematlhelo hinkwawo; a ma lehe swisungunu swa 25 ma anama swisungunu swa ntlhanu.*
31 Rikupakupa ra yona a ri langute exivaveni xa mani na mani, a ku ri ni swifaniso swa murhi wa ncindzu eka tiphuphu ta yona ta le matlhelo+ naswona a ku ri ni switepisi swa nhungu swo nghena ha swona.+
32 Loko a ndzi tise exivaveni xa vaprista hi tlhelo ra le vuxeni, u pime gede naswona a yi ringana ni tigede letin’wana.
33 Makamara ya varindzi ma yona, tiphuphu ta le matlhelo ni rikupakupa ra yona a swi ringana ni swa tigede letin’wana naswona a ku ri ni mafasitere eka tlhelo rin’wana ni rin’wana ra yona ni le ka rikupakupa ra yona. A yi lehe swisungunu swa 50 yi anama swisungunu swa 25.
34 Rikupakupa ra yona a ri langute exivaveni xa mani na mani, a ku ri ni swifaniso swa murhi wa ncindzu eka tiphuphu ta yona ta le matlhelo naswona a ku ri ni switepisi swa nhungu swo nghena ha swona.
35 Hiloko a ndzi yisa egedeni ya le n’walungwini+ kutani a yi pima; a yi ringana ni tigede letin’wana.
36 Makamara ya varindzi ma yona, tiphuphu ta yona ta le matlhelo ni rikupakupa ra yona a swi ringana ni swa tigede letin’wana. A yi ri ni mafasitere eka tlhelo rin’wana ni rin’wana ra yona. A yi lehe swisungunu swa 50 yi anama swisungunu swa 25.
37 Tiphuphu ta yona ta le matlhelo a ti langute exivaveni xa mani na mani, a ku ri ni swifaniso swa murhi wa ncindzu eka tiphuphu ta yona ta le tlhelo naswona a ku ri ni switepisi swa nhungu swo nghena ha swona eka yona.
38 Kamara ro dyela eka rona ni nyangwa ya rona a swi ri ekusuhi ni tiphuphu ta le matlhelo ka tinyangwa laha magandzelo yo hisiwa a ma hlantswiwa kona.+
39 A ku ri ni matafula mambirhi eka tlhelo rin’wana ni rin’wana ra rikupakupa ra nyangwa laha a ku dlayeriwa kona swifuwo swa magandzelo yo hisiwa,+ magandzelo ya xidyoho+ ni magandzelo ya nandzu.+
40 Endleleni leyi yaka egedeni ya le n’walungwini, a ku ri ni matafula mambirhi ehandle ka gede. Nakambe a ku ri ni matafula mambirhi eka tlhelo lerin’wana ra rikupakupa ra gede.
41 A ku ri ni matafula ya mune eka matlhelo hamambirhi ya gede, hinkwawo a ma ri nhungu, lawa a ku dlayeriwa eka wona magandzelo.
42 Matafula ya mune ya gandzelo ro hisiwa a ma endliwe hi maribye lama vatliweke. A ma lehe xisungunu xin’we ni hafu* ma anama xisungunu xin’we ni hafu naswona a ma tlakuke xisungunu xin’we.* Ehenhla ka wona a ku vekiwe swilo swo dlaya ha swona swifuwo swa magandzelo yo hisiwa ni magandzelo man’wana.
43 Emakhumbini ya le ndzeni a ku namekiwe tixelufu leti anameke ku ringana ni xandla;* naswona nyama ya tinyiko ta magandzelo a yi vekiwa ematafuleni.
44 Ehandle ka gede ya le ndzeni a ku ri ni makamara yo dyela eka wona ya vayimbeleri;+ a ma ri exivaveni xa vaprista ekusuhi ni gede ya le n’walungwini, a ma langute edzongeni. Kamara rin’wana ro dyela eka rona a ri ri ekusuhi ni gede ya le vuxeni, a ri langute en’walungwini.
45 A ku eka mina: “Kamara leri ro dyela eka rona leri languteke edzongeni i ra vaprista lava tirhaka etempeleni.+
46 Kamara ro dyela eka rona leri languteke en’walungwini i ra vaprista lava tirhaka ealtarini.+ I vana va Sadoki,+ lava humaka eka Valevhi lava averiweke ku tshinela eka Yehovha leswaku va n’wi tirhela.”+
47 Kutani a pima xivava xa vaprista. A xi lehe swisungunu swa 100, xi anama swisungunu swa 100, matlhelo hinkwawo ya mune a ma ringana. Altari a yi ri emahlweni ka tempele.
48 Hiloko a ndzi tisa erikupakupeni ra tempele,+ a pima phuphu ya le tlhelo ya rikupakupa, a yi lehe swisungunu swa ntlhanu eka tlhelo rin’wana naswona a yi lehe swisungunu swa ntlhanu eka tlhelo lerin’wana. Gede a yi aname swisungunu swinharhu* eka tlhelo rin’wana naswona a yi aname swisungunu swinharhu eka tlhelo lerin’wana.
49 Rikupakupa a ri lehe swisungunu swa 20* ri anama swisungunu swa 11.* Vanhu a va khandziya switepisi loko va ya eka rona. A ku ri ni tiphuphu etlhelo ka khumbi, yin’wana eka tlhelo rin’wana kasi leyin’wana eka tlhelo lerin’wana.+
Tinhlamuselo ta le hansi
^ Hi Xiheveru, “voko ra Yehovha ri ve ehenhla ka mina.”
^ Vona Xiengetelo B14.
^ Hi Xiheveru, “veka mbilu.”
^ Hi Xiheveru, “rihlanga ro pima ha rona ra swisungunu swa tsevu, ku nga xisungunu ni ku anama ka xandla.” I swisungunu swo leha. Vona Xiengetelo B14.
^ Kumbe “kwalomu ka 2,6 wa timitara.” Vona Xiengetelo B14.
^ Kumbe “vhurandi.”
^ Kumbe “kwalomu ka 4,1 wa timitara.”
^ Kumbe “kwalomu ka mitara.”
^ Kumbe “5,2 wa timitara.”
^ Kumbe “6,7 wa timitara.”
^ Kumbe “kwalomu ka 51,8 wa tisentimitara.”
^ Kumbe “3,1 wa timitara.”
^ Kumbexana ku vuriwa ehenhla ka khumbi ra kamara ra varindzi.
^ Kumbe “kwalomu ka 31,1 wa timitara.”
^ Hi Xiheveru, “swisungunu swa 60 swo leha.” Vona Xiengetelo B14.
^ Vona Tinhlamuselo.
^ Kumbe “25,9 wa timitara.”
^ Hi Xiheveru, “ku anama.”
^ Kumbe “kwalomu ka 51,8 wa timitara.”
^ Kumbe “2,6 wa timitara.”
^ Kumbe “kwalomu ka 77,7 wa tisentimitara.”
^ Kumbe “kwalomu ka 51,8 wa tisentimitara.”
^ Kumbe “7,4 wa tisentimitara.”
^ Kumbe “1,5 wa timitara.”
^ Kumbe “10,4 wa timitara.”
^ Kumbe “5,7 wa timitara.”
